59
ኢታቱዋ ኤቀቲደ ሺቆ ዎሳ
ዛማረቱዋ ካፖ የጸቴዳ፥ ዳዊታ ዎꬋናዉ አ ጎልያ ናጋና ማላ ሳኦል አሳቱዋ ኪት ስምና ዳዊታ ማዝሙርያ። “ꬋይሶፓ” ጊደ ዲꬃ ጊግሱዋን የጸቴዳ ዎሳ
1 አቤት ታ ጾሳዉ፥ ታ ሞርከቱዋፐ ታና አሻ፤
ታ ቦላ ደንድያዋንቱፐ ታና ናጋ።
2 ኢታ ኦꬅያዋንቱፐ ታና አሻ አካ፤
ሱꬃ ጉስያ አሳቱዋፐ ታና አሻ።
3 አቤት ጾሳዉ፥ ኡንቱንቱ ታና ዎꬋናዉ
ኩኩሊደ ናግያዋ በአ!
ሄ ዎልቃማ ኢታ አሳቱ ታ ቦላ ያኢኖ።
አቤት መꬍና ጎዳዉ፥ ታ ባይዙዋ ድራዉ
ዎይ ታ ናጋራ ድራዉ ግደና።
4 ኡንቱንቱ ታና ኦላናዉ ዎꬃ ጃምያዌ፥
ታ ባላ ድራሳ ግደና።
ቤጎታ፥ ታኮ ሃ ያደ በአ።
5 አቤት ኡባፐ ዎልቃማ መታ ኡባ ጎዳ ጾሳዉ፥
እስራኤልያ ጾሳዉ፥
ካዉተꬃቱዋ ኡባ ፕርዳናዉ ቤጎታ፤
ማካላ ኦꬅያዋንታ ማሮፓ።
6 ኡንቱንቱ ኦማርሳን ስሚኖ፤
ካናቱዋዳን ቦጪደ፥ ካታማ ግዶን ዩዪኖ።
7 ሄኮ፥ ኡንቱንቱ ባረንቱ ዶናን ሃሳዪደ ሳልክኖ፤
ኡንቱንቱ እንጻርሳይ ማሻ ማላ።
ኡንቱንቱ ብሮ፥ “ኦንነ ስሰና” ጊደ ቆፒኖ።
8 ሽን አቤት መꬍና ጎዳዉ፥
ኔን ኡንቱንቱ ቦላ ሚጫሳ፤
ካዉተꬃቱዋ ኡባ ቦላ ቅሊጫሳ።
9 ጾሳዉ፥ ኔን ታዉ ቆሰታ አትያ ሳኣ ግድያ ድራዉ፥
ታን ነ ዎልቃን አማነታይ።
10 ታ ጾሳይ አገና ባረ ሲቁዋን ታኮ ያና፤
ታ ጾሳይ ታ ሞርከቱዋ ጾንያዋ እ ታና በሳና።
11 ታ አሳቱ ዶገና ማላ፥ ኔን ኡንቱንታ ዎꬎፓ።
አቤት ጾሳዉ፥ ኑ ጎንዳልያዉ፥
ነ ዎልቃን ኡንቱንታ ላላደ ጾና።
12 ኡንቱንቱ ባረንቱ ዶና ናጋራ ድራዉነ
ባረንቱ እንጻርሳ ቃላ ድራዉ፥
ባረንቱ ኦቶሩዋን ኦይቀትኖ።
ኡንቱንቱ ሸቃ ድራዉነ ኡንቱንቱ ሃሳይያ ዎርዱዋ ድራዉ፥
13 ነ ሀንቁዋን ኡንቱንታ ꬋይሳ።
ጾሳይ ያቆባ ዛራቱዋ ሞድያዋነ
ሳኣ ጋጻ ጋካናዉ ደእያ ቢታ ሞድያዋ አሳይ ኤራና ማላ፥
ኡንቱንታ ሙለ አተናዳን ꬋይሳ።
14 ታ ሞርከቱ ኦማርሳን ስሚኖ፤
ካናቱዋዳን ቦጪደ፥
ካታማ ግዶን ዩዪኖ።
15 ኡንቱንቱ ምያዋ ደማናዉ ቶይላካቲኖ፤
ካላና ꬋዮፐ ላዊኖ።
16 ሽን ታን ነ ዎልቃ ሳባና፤
ዎንታ አገና ነ ሲቁዋባ የጻና።
አያዉ ጎፐ፥ ኔን ታዉ ታ ዋይያ ጋላስ፥
ታን ባቃታ አትያ ሳነ ቆሰታ አትያሳ ግዳዳ።
17 አቤት ታዉ ዎልቃ ግዴዳ ጾሳዉ፥
ታን ኔና ሳባና።
አያዉ ጎፐ፥ ታን ቆሰታ አትያ ሳአይነ
አገና ሲቁዋ ታና በስያ ጾሳይ ኔና።