12
ግብጼ ይሁዳ ቦላ ዎራጄዳ
(1 ካታ. 14:25-28)
1 ሮብኣማ ካዉተꬃይ ምን ኤቄዳ ዎደ፥ እነ እስራኤልያ አሳይ ኡባይ መꬍና ጎዳ ህግያ አግ ባሼድኖ።
2 ኡንቱንቱ መꬍና ጎዳዉ አማነተናን እጼዳ ድራዉ፥ ሮብኣመ ካተቴዳ እቼሻንꬆ ላይꬃን ግብጼ ካቲ ሺሻቅ የሩሳላመ ካታማ ቦላ ዎራጄዳ።
3 አናና እትፐ ግብጼፐ ዬዳዌ እት ሻአነ ላኡ ጼቱ ፓራ ጋረቱዋ፥ ኡሱፑን ታሙ ሻአ ፓራ አሳቱዋና ፓይዱ ባይና ሊብያ ኦላንቻቱዋ፥ ሱካ ኦላንቻቱዋነ ቶጵያ ኦላንቻቱዋ።
4 ካቲ ሺሻቅ ግምበቴዳ ይሁዳ ካታማቱዋ ኦሞዲደ፥ የሩሳላመ ካታማ ዬዳ።
5 ሄዋፐ ጉይያን፥ ትምቢትያ ኦድያ ሻማኤ ሮብኣማኮነ ሺሻቃፐ ባቃቲደ፥ የሩሳላመን ሺቅ ኡቴዳ ይሁዳ ካለꬅያዋንቱኮ ዪደ፥ “መꬍና ጎዳይ ሀዋዳን ያጌ፤ ‘ህንተ ታና አጌዳ ድራዉ፥ ታንካ ህንተንታ ሺሻቃ ኩሽያን አጋድ’ ያጌ” ያጌዳ።
6 እስራኤልያ ካለꬅያዋንቱነ ካቲ ሮብኣመ ባረንታ ካዉሺደ፥ “መꬍና ጎዳይ ጽሉዋ” ያጌድኖ።
7 ኡንቱንቱ ባረንታ ካዉሼዳዋ መꬍና ጎዳይ በኤዳ ዎደ፥ ሻማእያ መꬍና ጎዳይ ሀዋዳን ያጌዳ፤ “ኡንቱንቱ ባረንታ ካዉሼዳ ድራዉ፥ ታን ኡንቱንታ ዉርሳ ꬋይስከ፤ ታን ኡንቱንታ አሻና። ታ ሀንቁ ሺሻቃ ባጋና የሩሳላመ ቦላ ትገተና።
8 ግዶፐነ፥ ኡንቱንቱ ታዉ ሞደትያዋንነ ሀራ ቢታቱዋ ካተቶ ሞደትያዋን ደእያ ዱማተꬃ ኤራና ማላ፥ ኡንቱንቱ ሺሻቃዉ ሞደታና” ያጌዳ።
9 ሄዋ ድራዉ፥ ግብጼ ካቲ ሺሻቅ የሩሳላመ ካታማ ኦለቲደ፥ መꬍና ጎዳ ጌሻ ጎልያንነ ካትያ ጎለን ደእያ ሚሻ ኡባ አኬዳ። ቃይ ሶሎሞነ ዎርቃፐ ኦስሴዳ ጎንዳለቱዋካ አኪደ አፌዳ።
10 እ አፌዳ ዎርቃ ጎንዳለቱዋ ድራዉ፥ ካቲ ሮብኣመ ናሃስያ ብራታፐ ሀራ ጎንዳለቱዋ ኦስሴዳ፤ ካትያ ጎልያ ፐንግያ ናግያዋንቱ ካፑዋ ኩሽያን ዎꬄዳ።
11 ካቲ መꬍና ጎዳ ጌሻ ጎልያ ገልያ ዎደ ኡባን፥ ፐንግያ ናግያዋንቱ ዪደ፥ ሄ ጎንዳለቱዋ ኦይቄድኖ። ሄዋፐ ስሚደ፥ ኡንቱንቱ ዛሪደ፥ ናግያዋንቱ ጎለን ዎꬅኖ።
12 ሮብኣመ ባረና ካዉሼዳ ድራዉ፥ እ ዉር ꬋየናዳን መꬍና ጎዳ ሀንቁ አፐ ክቼዳ። ኡባ ይሁዳ ቢታዉ ሙልያዉ ሳአይ እንጀቴዳ።
ሮብኣማ ካዉታ ዉርሰꬃ
13 ካቲ ሮብኣመ ባረና ምንሲደ፥ የሩሳላመን ካተቴዳ። ሮብኣመ ካተቴዳ ዎደ አ ላይꬃይ ኦይታማነ እታ፤ መꬍና ጎዳይ ባረ ሱንꬃ ያን ዎꬃናዉ እስራኤልያ ቢታ ኡባፐ ዶሬዳ የሩሳላመ ካታማን ታማነ ላፑን ላይꬃ ካተቴዳ። ሮብኣማ አታ አሞንያ ናእሞ።
14 ሮብኣመ መꬍና ጎዳዉ ዎዛናፐ ጎይናናዉ ኮይቤና ድራዉ፥ ኢታባ ኦꬄዳ።
15 ሮብኣመ ኮይሮፐ ዉርሰꬃ ጋካናዉ ሀኔዳባይነ አ የለታ ማራይ ትምቢትያ ኦድያ ሻማእያ ታርክያ ማጻፋንነ እዱ በኤዳ ሳፃ ማጻፋን ጻፈት ኡቴዳ። ሮብኣምነ እዮርባም ኡባ ዎደ ኦለቲደ ደኤድኖ።
16 ሮብኣመ ሀይቂደ፥ ባረ ማይዛን ጋከቴዳ፤ እ ዳዊታ ካታማን ሞገቴዳ። አ ኮታን አ ናአይ አቢይ ካተቴዳ።