26
ይሁዳ ካትያ ኦዝያና
(2 ካታ. 14:21-22፤ 15:1-7)
1 ሄዋፐ ጉይያን፥ ይሁዳ አሳይ ኡባይ ታማነ ኡሱፑን ላይꬃ ግድያ ናኣ፥ ኦዝያና አ አዉዋ አመስያሳ ኮታን ካተዬዳ።
2 አ አዉ አመስያስ ሀይቄዳዋፐ ጉየ፥ እ ኤላታ ጌተትያ ካታማ ዛረꬅ ኬጺደ፥ ይሁዳን ኦራꬄዳ።
3 ኦዝያነ ካተትያ ዎደ፥ ላይꬃይ አዉ ታማነ ኡሱፑና፤ እ የሩሳላመን እሻታማነ ላኡ ላይꬃ ካተቴዳ። አ ዳይ ሱንꬃይ ይኮሎ፤ አ የሩሳላመ አሳ።
4 አ አዉ አመስያስ ኦꬄዳዋዳን፥ እካ መꬍና ጎዳ ስንꬃን ሱረባ ኦꬄዳ።
5 ጾሳ ያሻተꬃ ባረና ታማርሴዳ ዛካራስ ፓጻ ደኤዳ ዎድያን፥ ጾሳዉ እ አማነቲደ ኦꬄዳ። መꬍና ጎዳዉ እ ኦꬄዳ ዎደ ኡባን፥ ጾሳይ አ አንጄዳ።
6 ኦዝያነ ፕልስጼማቱዋና ኦለታናዉ ከሲደ፥ ጋተ ካታማ ዩሹዋ ግምቢያ፥ ያብነ ካታማ ዩሹዋ ግምቢያነ አሽዶዳ ግምቢያ ላሌዳ፤ ያቲደ አሽዶዳ ካታማ ማታንነ ፕልስጼማቱዋ ግዶን ካታማቱዋ ኬጼዳ።
7 ኦዝያነ ፕልስጼማቱዋ፥ ጉርባኣላን ደእያ አራባቱዋነ ማኡናቱዋ ጾናናዳን ጾሳይ አ ማዴዳ።
8 አሞና አሳቱ ኦዝያናዉ ጊሬድኖ። ኦዝያነ ሎይꬅ ምኔዳ ድራዉ፥ አ ዎሪ ግብጼ ዛዋ ጋካናዉ ስሰቴዳ።
9 ቃይ ኦዝያነ ዞዝያ ፐንግያ ማታን፥ ዛንጋራ ፐንግያ ማታንነ ድርሳይ ሶኮ ባቂያ ዞዝያ ማታን አዱሳ ግምበቱዋ ግምቢሲደ፥ የሩሳላመ ጌሶቱዋ ምንሴዳ።
10 አዉ ጮራ መሂ ደእያ ድራዉ፥ መላ ቢታቱዋን አዱሳ ግምቢያ ግምቤዳ፤ ዳሮ ኦላካ ቦኬዳ። እ ቃይ ጎሻ ዶስያ ድራዉ፥ ዞዘቱዋንነ አራዳ ጋድያን አዉ ዳሮ ጎሻንቻቱነ ዎይንያ ቱራ ቶክያዋንቱ ደኢኖ።
11 ቃይካ ኦዝያናዉ ኦላዉ ጊጌዳ ሎይꬅ ዳሮ ኦላንቻቱ ደኢኖ። ኦላንቻቱ ጻፊ ይእኤልነ ካፑ ማእሴይ ኦላንቻቱ ሱንꬃ ማዝጎብያን ጻፌድኖ። ኡንቱንቱ ካፑ ጋዳዋ ሀናንያ።
12 ባረንቱ አዎቱዋ ጎለዉ ካፖትያ ምኖ አሳቱ ላኡ ሻአነ ኡሱፑን ጼታ።
13 ካትያ ሞርከቱዋና ኦለቲደ፥ ባረንቱ ኩመንꬃ ዎልቃን ካትያ ማዳናዉ ከስያ ሄዙ ጼታነ ላፑን ሻአነ እቼሹ ጼቱ ኦላንቻቱ ኡንቱንቱ ኩሽያን ደኢኖ።
14 ኦዝያነ ኦላንቻቱ ኡባዉ ጎንዳልያ፥ ቶራ፥ ሁጲያን ዎꬅያ ብራታ ቆጲያ፥ ትራን ማይያ ኦላ ሚሻ፥ ዎንዳፍያን፥ ያምባርሻነ ሙሉሙቀ ሹቻ ጊግሴዳ።
15 የሩሳላመን ደእያ ኩሺ ሂላ ኤርያ አሳቱዋ ካቲ ኦዝያነ አዛዚደ፥ ዎችያ አዱሳ ግምበቱዋፐነ ካታማ ድርሳ ግምቢያ ዞዘቱዋፐ፥ ዎንዳፍያን ዎንዳፈቱዋ ዱክያ ሚሻቱዋነ ዎልቃማ ዎልቃማ ሹቻቱዋ ፕጺደ ኦልያ ሚሻቱዋ መꬍሴዳ። ጾሳይ አ ማድና፥ እ ሎይꬅ ምኔዳ፤ አ ዎሪካ ኡባሳ ጋኪደ ስሰቴዳ።
ኦዝያነ ባረ ኦቶሩዋን ሙረቴዳ
16 ሽን ኦዝያነ ምኔዳ ዎደ ኦቶረቴዳ፤ አ ኩንደꬃዉ ካለꬄዳ። ኦዝያነ መꬍና ጎዳ ባረ ጾሳ የዴዳ፤ እ እጻና ጩዋይያ ሳጽንያን እጻና ጩዋያናዉ መꬍና ጎዳ ጌሻ ጎልያ ገሌዳ።
17 ቄሲ አዛርያስነ መꬍና ጎዳ ቄሳቱ ሆስፑን ታማቱ አ ጌዱዋ ካሊደ ገሌድኖ፤ ሄ ቄሳቱ ምኖ አሳቱዋ።
18 ቄሳቱ ካትያ ኦዝያና ተኢደ፥ “ኦዝያና፥ ኔን መꬍና ጎዳዉ እጻና ጩዋያናዉ በሳካ። እጻና ጩዋይያዌ በስያዌ፥ እጻና ጩዋያናዉ ጌይ ኡቴዳ፥ አሮና ዘረꬃ ግድያ ቄሳቱዋ ጻላላሳ። ሀ ጌሻ ሳኣፐ ከሳ! አያዉ ጎፐ፥ ኔን መታ ኡባ ጎዳ ናቃዳ፤ ኔን አፐ ቦንቾ ደማካ” ያጌድኖ።
19 ሽን ኦዝያነ እጻና ጩዋያናዉ እጻና ጩዋይያ ሚሻ ባረ ኩሽያን ኦይቂ ኡቲደ ሀንቀቴዳ። ኦዝያነ ቄሳቱ ዋ ሀንቀቲደ፥ መꬍና ጎዳ ጌሻ ጎልያን እጻና ጩዋይያ ሳጽንያ ማታን ቄሳቱዋ ስንꬃን ኤቂደእሽን፥ አ ዴሙዋ ዎልቃማ ባሩዋ ሀርጊ ኦይቄዳ።
20 ቄስያ ካፑ አዛርያስነ ሀራ ቄሳቱ ኡባይ አኮ ጼልያ ዎደ፥ አ ዴሙዋ ዎልቃማ ባሩዋ ሀርጊ ኦይቄዳዋ በኢደ፥ አ ኤለካ ጌሻ ጎልያፐ ከሴድኖ። እካ መꬍና ጎዳይ አ ሙሬዳዋ ኤሬዳ ድራዉ፥ ኤለካ ሄዋፐ ከሲደ ቤዳ።
21 ካቲ ኦዝያነ ሀያና ጋካናስካ ሄ ሀርግያና ደኤዳ፤ መꬍና ጎዳ ጌሻ ጎልያ ገልያሳፐካ ኤቄዳ። ሄ ሀርግያ ጋሱዋን ዱማ ጎለን ባረካ ደኤዳ። ሄ ዎደ አ ናአይ ዮኣታመ ካትያ ጎለን ደኢደ፥ ሄ ጋድያ አሳ ሞዴዳ።
22 ካቲ ኦዝያነ ሀኔዳ ሀራባ ኡባ ኮይሮፐ ዉርሰꬃ ጋካናዉ አሞጻ ናአይ፥ ትምቢትያ ኦድያ እሳያሰ ጻፍ ዎꬄዳ።
23 ኦዝያነ ሀይቂደ፥ ባረ ማይዛን ጋከቴዳ። ያትና፥ አሳይ አ፥ “ዎልቃማ ባሩዋ ሀርግያን ኦይቀቴዳዋ” ጊደ፥ ካተቱዋ ማካና ማታን አ ሞጌድኖ። እ ሀይቂና፥ አ ሳኣን አ ናአይ ዮኣታመ ካተቴዳ።