22
1 ሄዋፐ ጉይያን፥ ኪታንቻይ ታና ጾሳ ካዉተꬃ ኦይድያፐነ ዶርሳ ካዉተꬃ ኦይድያፐ ጎግያ ብርሊያዳን ጶልያ ደኡዋ ሃꬃ ሻፋ በሴዳ።
2 ሄ ሻፋይ ካታማ ኦግያ ግዱዋና ዱገ ጎጌ። ሻፋፐ ሄፍንꬃ ባጋናነ ሀፍንꬃ ባጋና አገናን እት ገደነ ላይꬃን ታማነ ላኡ ገደ አይፍያ ደኡዋ ምꬃይ ደኤ። ሄ ምꬃ ቦንቹ ደእያዌ፥ ዛርያ ኡባ ሀርግያፐ ፓꬃናሳ።
3 ሄ ካታማን ጾሳ ሸቃይ አይነ ባዋ። ጾሳ ካዉተꬃ ኦይዲነ ዶርሳ ካዉተꬃ ኦይዲ ሄ ካታማን ደአና። ጾሳ ኦሳንቻቱ ጾሳዉ ጎይናና።
4 ኡንቱንቱ አ ዴሙዋ በአና፤ አ ሱንꬃይ ኡንቱንቱ ዴሙዋን ጻፈታና።
5 ሄዋፐ ስንꬃዉ ሀራ ቃማይ ባዋ። ኡንቱንቶ ጾምፕያ ዎይ አዋ ፖኡዋ ኮሸና፤ አያዉ ጎፐ፥ ጎዳይ ጾሳይ ኡንቱንቶ ጾምፕያ ግዳናዋ። ኡንቱንቱ መꬍ መꬍናዉ ካተታና።
የሱሳ ዩሳ
6 ሄዋፐ ጉይያን፥ ኪታንቻይ ታና ሀዋዳን ያጌዳ፤ “ሀ ታን ሃሳይያዌ ቱሙዋነ አማነትያዋ። ናባቶ ባረ ጌሻ አያና እምያ ጎዳይ ጾሳይ፥ ማታን ሀናናዉ በስያዋ ባረ ኦሳንቻቱዋ በሳናዉ ባረ ኪታንቻ ኪቴዳ” ያጌዳ።
7 የሱስ፥ “በአ! ታን ኤለካ ያና። ሀ ማጻፋን ደእያ ትምቢትያ ናግያዋንቱ አንጀቴዳዋንታ” ያጌዳ።
8 ታን ዮሃንስ፥ ሀ ኡባባ ስሳድነ በኣድ። ታን ሀዋ ስሴዳ ዎደነ በኤዳ ዎደ፥ ሄዋ ታና በሴዳ ኪታንቻዉ ጎይናናዉ፥ አ ገድያን ኩንዳድ።
9 ሽን ኪታንቻይ ታና፥ “ሄዋ ኦꬆፓ። ታን ኔናዳንነ ናበ ግዴዳ ነ እሻቱዋዳን፥ ቃይ ማጻፋን ደእያባዉ አዛዘትያ ኡባቱዋዳን አይልያ። ጾሳዉ ጎይና” ያጌዳ።
10 ሄዋፐ ጉይያን፥ ኪታንቻይ ታና፥ “ሀናና ጌዳ ሀ ማጻፋ ቃላ ማታፋን ጎርዶፓ። አያዉ ጎፐ፥ ሀ ኡባባይ ፖለትያ ዎዲ ማታቴዳ።
11 ኢታባ ኦꬅያዌ ጉጂደካ ኢታባ ኦꬆ፤ ቱናይ ጉጂደካ ቱኖ። ሎኦባ ኦꬅያዌ ጉጂደካ ሎኦባ ኦꬆ፤ ጌሻይነ ጉጂደካ ጌሻ ግዶ” ያጌዳ።
12 የሱስ፥ “በአ! ታን ኤለካ ያና። አሳ ኡባዉ አ ኦሱዋዳን እማናዉ፥ ታ ዎይታ አካ ያና።
13 ታን አልፋነ ኦሜጋ፤ ኮይሩዋነ ዉርሰꬃ፤ ዶመꬃነ ፖሉዋ” ያጌዳ።
14 ባረንቱ ማዩዋ ጌሽ ሜጭያዋንቱ አንጀቴዳዋንታ። ደኡዋ ምꬃ አይፍያ ማናዉነ ካታማ ፐንግያና ገላናዉ ኡንቱንቶ ማታይ እመቴዳ።
15 ሽን ካናቱ፥ ብትያዋንቱ፥ ዎሹምያዋንቱ፥ ሸምፑዋ ዎꬍያዋንቱ፥ ኤቃዉ ጎይንያዋንቱነ ባረንቱ ሃሳያንነ ባረንቱ ኪታን ዎርዶትያዋንቱ ካረና ደኢኖ።
16 “ታን የሱስ፥ ሀ የዉዋ ህንተንቶ ዎሳ ጎለቱዋን ማርካታና ማላ፥ ታ ኪታንቻ ኪታድ። ታን ዳዊታ ጎልያ የለታ። ታን ፖእስያ ዎንታ ባካልያ” ያጌዳ።
17 ጌሻ አያናይነ ገለዉና፥ “ሃያ” ያጊኖ። ቃይ ሀዋ ስስያዌ ኦንነ፥ “ሃያ” ያጎ። ሳመቴዳ አሳይ ኦንነ ሃ ዮ። ደኡዋ ሃꬃ ኮይያ አሳይ ኦንነ ጮ አኮ።
18 ታን ሀ ማጻፋን ጻፈቴዳ ሀናና ጌዳ ቃላ ስስያ ኦናነ ዞራይ። ኦንነ ሀ ቃላ ቦላ እትባ ጉጆፐ፥ ጾሳይ ሀ ማጻፋን ጻፈቴዳ ቦሻ አ ቦላ ጉጃና።
19 ኦንነ ማጻፋን ደእያ ትምቢትያ ቃላፐ አያነ ፓጭሶፐ፥ ሀ ማጻፋ ግዶን ቆንጭሴዳ ደኡዋ ምꬃ አይፍያፐነ ጌሻ ካታማፐ አ ጋክያ ግሹዋ ጾሳይ ፓጭሳና።
20 ሀ ኡባባዉ ማርካትያዌ፥ “ቱማ! ታን ኤለካ ያና” ያጌ።
አመንእ። ጎዳ የሱሳ፥ ኔን ሃያ።
21 ጎዳ የሱስ ክርስቶሳ አꬎ ኬካተꬃይ ህንተናና ኡባና ግዶ። አመንእ።