7
እስራኤልያ አሳፐ 144,000 አሳቱዋ ሶምእያን ማታፋይ ዎꬌዳ
1 ሄዋፐ ጉይያን፥ ታን ኦይዱ ኪታንቻቱ ኦይዱ ባጋ ሳኣ ጋጻን ኤቄዳዋንታ በኣድ። ሄ ኪታንቻቱ ሳኣ ቦላን፥ ዎይ አባ ቦላን፥ ዎይ አይ ምꬃ ቦላን፥ ጫርኩ ጫርከናዳን ተኤድኖ።
2 ቃይካ ደኡዋ ጾሳ ማታፋ ኦይቂደ ሀራ ኪታንቻይ አዋይ ሞክያሳፐ ከስያዋ ታን በኣድ። ሄ ኪታንቻይ ባረ ኮሻ ꬎቁ ኦꬂደ፥ ሳኣነ አባ ቆሀናዉ ዎልቃይ እመቴዳ ኦይዱ ኪታንቻቱዋ
3 ጼሲደ፥ “ኑ ጾሳ ኦሳንቻቱዋ ዴሙዋን ኑን ማታፋ ዎꬃና ጋካናዉ፥ ሳኣ ግድና ዎይ አባ ግድና፥ ዎይ ምꬃ ግድናካ ቆሆፕተ” ያጌዳ።
4 ታን ጾሳ ማታፋ ዴሙዋን ዎꬄዳዋንቱ ፓይዱዋ ስሳድ። እስራኤልያ ዛርያ ኡባፐ እት ጼታነ ኦይታማነ ኦይዱ ሻአ አሳቱዋ ዴሙዋን ማታፋይ ዎꬌዳ።
5 ይሁዳ ዛርያፐ፥
ታማነ ላኡ ሻኣ ዴሙዋን ማታፋይ፥
ዎꬌዳ።
ሮቤላ ዛርያፐ፥
ታማነ ላኡ ሻኣ።
ጋደ ዛርያፐ፥
ታማነ ላኡ ሻኣ።
6 አሴራ ዛርያፐ፥
ታማነ ላኡ ሻኣ።
ንፍታሌመ ዛርያፐ፥
ታማነ ላኡ ሻኣ።
ምናሰ ዛርያፐ፥
ታማነ ላኡ ሻኣ።
7 ስሞና ዛርያፐ
ታማነ ላኡ ሻኣ።
ሌዊያ ዛርያፐ
ታማነ ላኡ ሻኣ።
ይሳኮራ ዛርያፐ
ታማነ ላኡ ሻኣ።
8 ዛብሎና ዛርያፐ፥
ታማነ ላኡ ሻኣ።
ዮሴፎ ዛርያፐ፥
ታማነ ላኡ ሻኣ።
ቢንያማ ዛርያፐ፥
ታማነ ላኡ ሻኣ
ዴሙዋን ማታፋይ፥
ዎꬌዳ።
ቦꬃ ማዩዋ ማዬዳ ጮራ አሳቱዋ
9 ሄዋፐ ጉይያን፥ ዛርያ ኡባፐ፥ ቆሙዋ ኡባፐ፥ ያራ ኡባፐነ ዱማ ዱማ ጋድያ ቃላ ኡባፐ ኦንነ ፓይዳናዉ ዳንዳየና ዛዋይ ባይና ጮራ አሳ ታን በኣድ። ሄ አሳይ ቦꬃ ማዩዋ ማዪደ፥ ዛምባ ሀይꬃ ባረንቱ ኩሽያን ኦይቂደ፥ ካዉተꬃ ኦይድያ ስንꬃንነ ዶርሳ ስንꬃን ኤቄዳ።
10 ኡንቱንቱ ባረንቱ ቃላ ꬎቁ ኦꬂደ፥
“ኑ አቶተꬃይካ፥
ካዉተꬃ ኦይድያን ኡቴዳ፥
ኑ ጾሳፐነ ዶርሳፐ ዬ”
ያጌድኖ።
11 ኪታንቻቱ ኡባይ ካዉተꬃ ኦይድያ፥ ጭማቱዋነ ደኡዋን ደእያ ኦይዱ መታ ዩይ አꬊደ ኤቄድኖ። ኡንቱንቱ ካዉተꬃ ኦይድያ ስንꬃን ባረንቱ ዴሙዋን ጉፋኒደ ጾሳዉ ጎይኒደ፥
12 “አመንእ!
አንጁ፥ ቦንቹ፥
አꬌዳ ኤራተꬃይ፥
ጋላታይ፥ ሳባይ፥
ዎልቃይ፥ ምኖተꬃይ፥
መꬍናፐ መꬍና ጋካናዉ ኑ ጾሳዉ ግዶ።
አመንእ!”
ያጌድኖ።
13 ጭማቱዋፐ እቱ ታና፥ “ሀ ቦꬃ ማዩዋ ማዬዳ አሳቱ ኦኔ? ኡንቱንቱ ሀቃፐ ዬድኖ?” ያጊደ ኦቼዳ።
14 ታን፥ “ታ ጎዳዉ፥ ኔን ኤራሳ” ያጋድ። እ ታና ሀዋዳን ያጌዳ፦
“ሀዋንቱ ዳሮ ዋይያ ዋየቲደ ዬዳዋንታ።
ኡንቱንቱ ባረንቱ ማዩዋ ዶርሳ ሱꬃን ሜጪደ፥
ቦጼዳዋንታ።
15 ሄዋ ድራዉ፥
ኡንቱንቱ ጾሳ ካዉተꬃ ኦይድያ ስንꬃን ኤቂደ፥
ቃማነ ጋላስ፥ አ ጌሻ ጎልያን፥
አዉ ኦꬂኖ።
ቃይ እ ባረ ካዉተꬃ ኦይድያን ኡቴዳዌ፥
ኡንቱንቱ ግዱዋን ደአና።
16 ሀዋፐ ስንꬃናዉ ኡባካ፥
ኡንቱንቱ ኮሻትክኖ፤
ዎይ ሳመትክኖ።
አዋይ ኡንቱንታ ሜና፤
ቃይ አይ ሴላይካ ኡንቱንታ ጉደና።
17 አያዉ ጎፐ፥ ካዉተꬃ ኦይደዉ፥
ግዱዋን ኡቴዳ ዶርሳይ፥
ኡንቱንታ ሄማና።
ደኡዋ ሃꬃ ፑልቱዋኮካ፥
ኡንቱንታ ካለꬃና።
ጾሳይካ ኡንቱንቱ አይፍያ አፎꬃ ኡባ ቁጭ ድጋና”
ያጌዳ።