10
1 ሄ ዎደ ሳመል ትግያባና ዛይትያ አኪደ፥ ሳኦላ ሁጲያን ትጊደ ሳኦላ የሪደ፥ ሀዋዳን ያጌዳ፤ “ባረ አሳ እስራኤልያ ሞዳና ማላ መꬍና ጎዳይ ኔና ኦኬዳ ግደኔ? ኔን አ አሳ ካለꬃደ፥ ኡንቱንቱ ዩሹዋን ደእያ ሞርከቱዋ ኩሽያፐ ኡንቱንታ አሻና። አ አሳ ኔን ሞዳና ማላ፥ ጾሳይ ኔና ኦኬዳዎ ማላታይ ሀዋ።
2 ኔን ሀቼ ታፐ ሻከትያ ዎደ፥ ራሄል ዱፉዋ ማታን፥ ቢንያማ ዛዋን ደእያ ጸልጻሀ ግያ ሳኣን ላኡ አሳቱዋና ጋከታናሳ ኡንቱንቱ ኔና፥ ‘ኔን ኮሻ ቤዳ ሀረቱ ቤቴድኖ፤ ሀእ ነ አዉ ሀረቱዋ ቆፕያዋ አጊደ፥ “ታ ናአይ ꬋዬዳ፤ ሽን ዋኖሻ?” ያጊደ ነባ ህርጌ’ ያጊደ ኦዳናዋ።
3 “ኔን ሄ ሳፐ ደንዳደ፥ ታቦራ ጌተትያ ዎልቃማ ምꬃ ጋካናዉ ባናሳ፤ ኔን ቢሽን፥ ጾሳኮ ቤቴለ ብያ ሄዙ አሳቱ ኔናና ጋከታናዋንታ። ኡንቱንቱፐ እቱ ሄዙ ዴሻ ማራቱዋ ቶኬዳ፤ ላኤንꬁ ሄዙ ኡክꬃ ቶኬዳ፤ ሄዘንꬁ ኦጎሩዋ ኩሜዳ ዎይንያ ኤሳ ቶኬዳ።
4 ኡንቱንቱ ኔና ሳሮታና፤ ነዉ ላኡ ኡክꬃ ኡንቱንቱ እማና፤ ኔን ኡንቱንቱ ኩሽያፐ ሄ ኡክꬃ አካናሳ።
5 “ሄዋፐ ጉይያን፥ ኔን ፕልስጼማ ኦላንቻቱ ጭታይ ደእያ ጾሳ ግብኣ ግያ ካታማ ባና። ኔን ሄ ካታማ ጋክያ ዎደ፥ ዲꬃና ካራቡዋና፥ ፑላልያናነ ማስንቁዋና ካኢድነ ትምቢትያ ኦዲደ፥ ጎይንያ ꬎቃ ሳኣፐ ዱገ ዎꬍያ ትምቢትያ ኦድያዋንቱ ጩጉዋና ጋከታናሳ፤
6 መꬍና ጎዳ አያናይ ነ ቦላ ዎልቃፐ ዎꬍና ኔንካ ኡንቱንቱና ትምቢትያ ኦዳናሳ፤ ኔን ላመታደ ሀራ አሳ ግዳና።
7 ሀ ማላታቱ ፖለትያ ዎደ፥ ነ ኩሽያን ጋከቴዳባ አያነ ኦꬃ፤ አያዉ ጎፐ፥ ጾሳይ ኔናና ደኤ።
8 “ኔን ታፐ ስንꬃታደ ገልጋላ አꬋ። ታንካ ቱሙፐ ጹግያ ያርሹዋነ ሳሮተꬃ ያርሹዋ ያርሻናዉ ኔኮ ዱገ ባና። ታን ኔኮ ባደ ኔን ኦꬃናባ ኦዳና ጋካናዉ፥ ላፑን ጋላሳ ጋምኣሳ” ያጌዳ።
9 ሳኦል ሳመላፐ ሻከትሽን፥ ጾሳይ ሳኦላ ዎዛና ላሜዳ፤ ቃይ ሄ ማላታቱ ኡባይ ሄ ጋላሳ ሀኔድኖ።
10 ሳኦልነ ቆማይ ግብኣ ጋክና፥ ትምቢትያ ኦድያዋንቱ ጩጉ አናና ጋከቴዳ፤ ጾሳ አያናይ አ ቦላ ዎልቃፐ ዎꬌዳ፤ ኡንቱንቱ ግዶን ትምቢትያ ኦዴዳ።
11 ሳኦላ ካሰ ኤርያዋንቱ ኡባይ ትምቢትያ ኦድያዋንቱና ትምቢትያ ኦድያዋ በኢደ፥ እቱ እቱዋ፥ “ቂሳ ናአይ ዋን ክቼዴ? ቃይ ሳኦለካ ትምቢትያ ኦድያዋንቱ ዛቴየ?” ያጌድኖ።
12 ሄ ሳኣን ደእያ እት ብታኒ ኡንቱንቶ፥ “ኡንቱንቱ አዉ ኦኔ?” ያጊደ ዛሬዳ። ሄዋ ድራዉ፥ “ሳኦለካ ትምቢትያ ኦድያዋንቱ ዛቴየ?” ጉሳይ ቶሳ ግዴዳ።
13 ሳኦል ትምቢትያ ኦድያዋ ዉርሴዳዋፐ ጉይያን፥ ጎይንያ ꬎቃ ሳኣ ቤዳ።
14 ሳኦላ አዉዋ እሻይ ሳኦላነ ቆማ፥ “ሀቃ ቤድቴ?” ያጌዳ።
ሳኦል፥ “ሀረቱዋ ኮሻ ቤዶ፤ ሀረቱ ቤተናን ꬋይና፥ ሳመላኮ ቤዶ” ያጌዳ።
15 ሳኦላ አዉዋ እሻይ፥ “ሀያና ሳመል ነዉ ጌዳዋ ታዉ ኦዳርኪ” ያጌዳ።
16 ሳኦል ባረ አዉዋ እሻዉ፥ “ሀረቱ ቤቴዳዋ ሳመል ኑዉ ጌሺደ ኦዴዳ” ያጌዳ፤ ሽን ሳመል፥ “ካትያ ግዳሳ” ጊደ አዉ ኦዴዳዋ ኦድቤና።
ሳኦል ካተቴዳዌ ቆንጭያን ኦደቴዳ
17 ሄዋፐ ጉይያን፥ ሳመል ምጽጳን እስራኤልያ አሳ መꬍና ጎዳኮ ጼስ ሺሼዳ።
18 ኡንቱንታ፥ “መꬍና ጎዳይ፥ እስራኤልያ ጾሳይ ሀዋዳን ያጌ፤ ‘ታን እስራኤልያ ግብጼፐ ከሳድ፤ ግብጼ አሳቱዋ ኩሽያፐነ ህንተንታ ናቂያ ካዉተꬃቱ ኡባ ኩሽያፐ ታን አሻድ’ ያጌ።
19 ሽን ሀቼ ህንተንቱ መቱዋፐነ ዋይያፐ ኡባፐ ህንተንታ አሽያ ህንተንቱ ጾሳ እጼድታ፤ ቱይት! ‘ኑ ቦላ ካትያ ካተያ’ ያጌድታ። ሄዋ ድራዉ፥ ሀእ ህንተንቱ ህንተንቱ ዛርያንነ ህንተንቱ ያራን ግዲደ፥ መꬍና ጎዳ ስንꬃ አꬍተ” ያጌዳ።
20 ሄዎ ሳመል እስራኤልያ ዛርያ ኡባ አꬂና፥ ሳማይ ቢንያማ ዛርያን ዎꬌዳ።
21 ቢንያማ ዛርያ ያራን ያራን አꬂና፥ ሳማይ ማጽራ ያራን ዎꬌዳ፤ ዉርሰꬃን ቂሳ ናአይ ሳኦል ዶረቴዳ። ኡንቱንቱ አ ኮዬድኖ፤ ሽን እ ቤትቤና።
22 ሄዋ ድራዉ ኡንቱንቱ መꬍና ጎዳ፥ “ብሮ ሀ ሳኣ ያና አሳይ ደኢ?” ያጊደ ኦቼድኖ።
ሽን መꬍና ጎዳይ፥ “ኤ! ሳኦል ሚሻ ግዱዋን ቆሰት ኡቴዳ” ያጌዳ።
23 ኡንቱንቱ ዎጽ ቢደ፥ ያፐ አ ከስ አሄድኖ። አሳ ግዶን እ ኤቂያ ዎደ፥ ሀሽያፐ ቆሞ ባጋን አሳ ኡባፐ አዱቄ።
24 ሳመል አሳ ኡባዉ፥ “መꬍና ጎዳይ ዶሬዳ ብታንያ በኢቴ? ሀ አሳ ግዶን አ ማላትያባይ ኦንነ ቱሙ ባዋ” ያጌዳ።
ሄዋፐ ጉየ አሳይ ኡባይ ባረ ቃላ ꬎቁ ኦꬂደ፥ “ካትያ ሸምፑ ጋምኦ” ያጌዳ።
25 ሄዋፐ ጉይያን፥ ሳመል ካዉተꬃ ዎጋ አሳዉ ኦዴዳ፤ ጻጸትያ ማጻፋን ሄ ዎጋ ጻፊደ፥ መꬍና ጎዳይ ስንꬃን ዎꬄዳ። ሳመል አሳ ኡባ ሁጲያን ሁጲያን አ ሶ አ ሶ የዴዳ።
26 ሳኦለካ ባረ ሶ ግብኣ ቤዳ፤ ጾሳይ ኡንቱንቱ ዎዛና ቦቼዳ ምኖ አሳቱ ሳኦላና ቤድኖ።
27 ሽን እት እት ጬጮ አሳቱ፥ “ሀ ብታኒ ኑና ዋቲደ አሻኔ?” ያጌድኖ፤ ኡንቱንቱ አ ካꬊደ፥ አዉ አይነ እሞታ እምበይክኖ። ሽን ሳኦል ጮኡ ጌዳ።