2
ሃን ዎሳ
1 ሃና ሀዋዳን ያጋደ ዎሳዱ፤
“ታ ዎዛናይ መꬍና ጎዳን ናሸቴ፤
መꬍና ጎዳን ታ ዎልቃይ ዳሬዳ።
ታ ሞርከቱዋ ቦላን ታን ጬቀታደ ሃሳያይ፤
መꬍና ጎዳይ ታና አሼዳ ድራዉ፥ ታን ናሸታይ።
2 “መꬍና ጎዳ ማላ ጌሽ እቱነ ባዋ፤
አ ማል እቱነ ባዋ።
ኑ ጾሳፐ አትና፥
ሀራ አትያ ዎጋ ዛላይ ባዋ።
3 “ኦቶሮ ሃሳያ አግተ፤
ኦቶሮ ቃላይ ህንተንቱ ዶናፐ ከሶፖ።
አያዉ ጎፐ፥ መꬍና ጎዳይ ኤርያ ጾሳ፤
አሳ ኦሱዋ እ ይግ ጼሌ።
4 “ኦላንቻቱዋ ዎንዳፊ መኤዳ፤
ሽን ꬉበቴዳዋንቱ ዎልቃ ዳንጬድኖ።
5 ካል ኡቴዳዋንቱ ኮሻቲደ፥
ቁማዉ ሀራዉ ኦꬂኖ፤
ሽን ኮሻት ኡቴዳዋንቱ ሀእ ካሌድኖ።
ማንꬃታ ላፑን ናና የላዱ፤
ሽን ጮራ ናና የሌዳና ዳቡራዱ።
6 “መꬍና ጎዳይ ዎꬌነ ፓꬄ፤
ቃይ እ ዱገ ስኦልያን የጌነ ፑደ ከሴ።
7 መꬍና ጎዳይ ማንቀꬄነ ዱረዬ፤
ቃይ እ ዝቂሴነ ꬎቂሴ።
8 እ ህዬሳቱዋ ባናፐ ደንꬄ።
መቶታንቻቱዋካ ብድንꬃ ፕቱዋፐ ደንꬄ፤
ኡንቱንታ ካፓቱዋና ኡትሴ፤
ኡንቱንታ ቦንቾ አራታ ላትሴ።
“አያዉ ጎፐ፥ ቢታ ባሳቱ መꬍና ጎዳሳ፤
እ ኡንቱንቱ ቦላን ሳኣ ኤሴዳ።
9 እ ጾሳ አሳቱዋ ገድያ ናጌ፤
ሽን ኢታቱዋ እ ꬉማን ጮኡ ኡዳና።
“አሳይ ባረ ዎልቃን ጾነና፤
10 መꬍና ጎዳና ኤቀትያዋንቱ ሊቃና።
እ ሳሉዋፐ ኡንቱንቱ ቦላ ጉጉንꬃዳን ጉማና፤
መꬍና ጎዳይ ሳኣን ደእያዋንታ ኡባ ፕርዳና።
“እ ባረ ካትያዉ ዎልቃ እማና፤
እ ባረ ኦኬዳዎ ጾኑዋ እማና”
ያጋደ ዎሳዱ።
11 ሄዋፐ ጉይያን፥ ኤልቃን ራማን ደእያ ባረ ሶይ ቤዳ፤ ሽን ናአይ ሳመል ቄስያ ኤልያፐ ጋርሳና መꬍና ጎዳዉ ኦꬄ።
ኤልያ አቱማ ናና ኢታተꬃ
12 ኤልያ አቱማ ናናይ ኢታ ናናቱዋ፤ ኡንቱንቱ መꬍና ጎዳ ኤርክኖ፥
13 ዎይ ያርሹዋ እምያ አሳዉ ቄሳቱ ኦꬅያ ዎጋ ናግክኖ። ሄዌነ፥ አሳይ ያርሹዋ ያርሽያ ዎደ፥ ቄስያ ቆማይ ሄዙ አቻ ብራታ ኮጫን አኬዳ፤ አሹ ብሮ ካእ ደእሽን፥
14 ዶይስያ ዎጋ ኦቱዋን ዎይ ከርያን ሄ ኮጫ የዲደ፥ ኮጫይ ኦይቂ ከስያ አይ ቆሞ አሹዋ ግዶፐነ አፊደ፥ ቄስያዉ እሜ። ያርሹዋ ያርሻናዉ ሴሎ ይያ እስራኤልያ አሳ ኡባ ኡንቱንቱ ሀዋዳን ኦꬂኖ።
15 ቃይ ሞꬉዋ ያርሽያ ሳኣን ጺጻናፐ ካሰቲደ፥ ቄስያ ቆማይ ያርሹዋ ያርሽያ ብታንያኮ ቢደ፥ “ቄሲ ቃየ አሹዋፐ አትና፥ ዶይሳ አሹዋ ኔፐ አከና ድራዉ፥ አዉ ጺጻናዉ አማሬዳ አሹዋ ሀማ” ያጌ።
16 ሄዋፐ ጉየ ብታኒ ዛሪደ፥ “ዎጋዳን ቄሳቱ ሞꬉዋ ኮይሮ ጹግኖ፤ ሄዋፐ ጉይያን፥ ኔን ኮይያዋ አካ” ያግያ ዎደ ቄስያ ቆማይ፥ “ቱይት፤ ታዉ ሀእ እማ፤ ኡባ ኔን ድጎፐ፥ ታን ኔፐ ዎልቃን አካና” ያጌ።
17 መꬍና ጎዳዉ እምያ ያርሹዋ ኤልያ ናናይ ካꬌዳ ድራዉ፥ ኡንቱንቱ ናጋራይ መꬍና ጎዳ ስንꬃን ሎይꬅ ዳሬዳ።
ናኣ ሳመላ
18 ሽን ሳመል ናአተꬃን ደኢደ፥ ሱፍያ ጌተትያ ክርያፐ ዳደቴዳ ኤፉደ ጌተትያ ማዩዋ ማዪደ፥ መꬍና ጎዳዉ ኦꬄ።
19 ሳመላ ዳያ ላይꬃን ላይꬃን ጉꬃ ቆልያ ጊግሳደ፥ ላይꬃ ያርሹዋ ያርሻናዉ ባረ አስናና ባደ ሳመላዉ አካደ ባዉ።
20 ኤል ኤልቃናነ አ ማቻቶ፥ “ነ ማቻታ መꬍና ጎዳዉ እሜዳ ናኣ ድራዉ መꬍና ጎዳይ ነዉ ሀ ምሽራትን ሀራ ናና እሞ” ያጊደ አንጄ፤ ያትና፥ ኡንቱንቱ ባረንቱ ሶይ ስሚኖ።
21 መꬍና ጎዳይ ሃኖ አንጅና፥ ሻሃራደ ሄዙ አቱማ ናናነ ላኡ ማጫ ናና የላዱ። ናአይ ሳመል መꬍና ጎዳ ስንꬃን ድጬዳ።
ኤልያነ አ ናና
22 ኤል ሎይꬅ ኤጬዳ። አ ናናይ እስራኤልያ አሳ ኡባ ቦላ ኦꬄዳ ኡባባነ ቃይ ጾሳ ዱንካንያ ፐንግያን ጾሳዉ ኦꬅያ ማጫ አሳቱዋና ግሴዳዋ ስሴዳ።
23 ኡንቱንታ፥ “ህንተንቱ ሀዋ ማላ አያዉ ኦꬂቴ? ህንተንቱ ኢታ ኪታ ታን አሳ ኡባፐ ስሳይ።
24 ታ ናቶ፥ ሀዋ አግተ፤ መꬍና ጎዳ አሳይ ህንተንታ ግያዋ ታን ስሴዳዌ ሎኦባ ግደና።
25 እት አሳይ አሳ ናቆፐ፥ ጾሳይ አዉ ጋናታና፤ ሽን አሳይ መꬍና ጎዳ ናቆፐ፥ ኦኔ አዉ ጋናታናዌ?” ያጌዳ።
መꬍና ጎዳይ፥ “ታን ኡንቱንታ ዎꬋና” ጌዳ ድራዉ፥ ኡንቱንቱ ባረንቱ አዉዋ ሴራ ስሰናን እጼድኖ።
26 ናአይ ሳመል ጾሳ ስንꬃንነ አሳ ስንꬃን ድጬዳነ ሳበቴዳ።
ኤልያ ሶይ አሳ ቦላ ኦደቴዳ ትምቢትያ
27 እት ጋላስ ጾሳ አሳይ ኤልያኮ ዪደ አ፥ “መꬍና ጎዳይ ሀዋዳን ያጌ፤ ‘ነ ማይዛ አዉ አሮነነ አ ሶ አሳይ ግብጼ ካትያ አይለተꬃን ደእያ ዎደ፥ ታን ኡንቱንቶ ቆንጫድ።
28 አሮነ ታ ያርሽያ ሳኣ ፑደ ከሳና ማላ፥ እጻና ጩዋያና ማላነ ታ ስንꬃን ኤፉድያ ማያና ማላ፥ ታዉ ቄስያ ኡዳደ እስራኤልያ ዛራቱዋ ኡባፐ አ ዶራድ። ቃይ እስራኤልያ አሳይ ታማን ያርሽያ ያርሹዋ ኡባ ታን ነ አዉዋ ዛርያዉ እማድ።
29 ታን ታ ደእያ ሳኣ ሺሻና ማላ አዛዜዳ ታ ያርሹዋነ እምያዋ ህንተንቱ አያዉ የꬍ ካኢቴ? ታ አሳይ እስራኤሊ፥ ታዉ ሺሼዳ ያርሹዋ ኡባፐ ሙሩትያዋ ህንተንቶ ሚደ ኦርድያዋን፥ ኔን ነ ናና ታፐ አꬃደ አያዉ ቦንቻድ?’ ያጌ።
30 “ሄዋ ድራዉ፥ መꬍና ጎዳይ እስራኤልያ ጾሳይ ሀዋዳን ያጌ፤ ‘ነ ዛሪነ ነ አዉዋ ዛሪ መꬍናዉ ታዉ ኦꬃና’ ጋድ፤ ሽን ሀእ፥ ሄዌ ታፐ ሃኮ! ታና ቦንችያዋንታ ታን ቦንቻና፤ ታና ካꬍያዋንታ ታን ካዉሻና።
31 ነ ዛርያን አሳይ ጭመና ማላ፥ ታን ነ ዎልቃነ ነ አዉዋ ዛርያ ዎልቃ ꬋይስያ ጋላሳቱ ያናዋ።
32 ኔን መቶታና፤ ታን እስራኤልያ አሳዉ እምያ አንጁዋ በኣደ ኔን ቃናታና፤ ሽን ነ ዛርያን ጭማና አሳይ ኦንነ ባዋ።
33 ታን ታ ያርሽያ ሳፐ ꬋይሰና አሳይ ደኦፐ፥ አ ጋሱዋን ነ አይፊ አፎጺደ ቆቃናነ ነ ዎዛናይካ ምሹዋ ጹገታና፤ ነ ዳሮ ዘረꬃ ኡባይ ያላጋተꬃን ደኢደ ሀይቃና።
34 “ነ ናናይ ላኡ ሆፍኒንነ ፒንሃስ እት ጋላስ ሀይቃና፤ ሄዌ ነዉ ማላታ ግዳናዋ።
35 ታን ታዉ አማነትያ ቄስያ፥ ታ ዎዛናዳንነ ታ ቆፋዳን ኦꬅያዋ ደንꬃና፤ ታን አ ዛራቱ ደእ በአናዳን ኦꬃና፤ ታን ዶሬዳዌ ካትያ ስንꬃን ኡንቱንቱ ኡባ ዎደ ኦꬃና።
36 ነ ዛርያን አቴዳ ኡባይ ጉꬃ ሚሻ ዎይ ባሶ ኡክꬃ ዎሳናዉ ዪደ፥ አ ስንꬃን ጉፋኒደ፥ ‘ታን ኡክꬃ ማና ማላ፥ ቄሳቱ ዋፐ እቱዋ ሳኣ ማላን ታና ዎꬃርኪ’ ያጋና ያጌ” ያጌዳ።