17
1 ሄዋፐ ጉይያን አክጾፌል አበሰሎማ፥ “ሀቼ ቃማ ታን ታማነ ላኡ ሻአ አሳቱዋ ዶራደ፥ ዳዊታ የደርሳደ ኦይቃናዉ ከሳይ።
2 እ ዳቡርናነ ጻላልና፥ ታን አ ቦላ ከሳና። ታን አ ዳጋንꬃና፤ ሄዋን አናና ደእያ አሳይ ኡባይካ ባቃታና፤ ታን ካትያ ጻላላ ሾጫና።
3 ያታደ ታን አሳ ኡባ ኔኮ ዛራና። ኔን እት አሳ ጻላላ ዎꬋናዉ ኮያሳ፤ ሀራ አሳይ ሳሮ አታና” ያጌዳ።
4 አክጾፌላ ዞሪ አበሰሎማነ እስራኤልያ ጭማቱዋ ኡባ ናሸቼዳ።
5 ሄዋፐ ጉይያን አበሴሎም፥ “አርክያ ሁሻያ ቃይ ጼስተ፤ አነ እ ግያዋ ስሶይተ” ያጌዳ።
6 ሁሻይ አኮ ዬዳ ዎደ፥ አበሴሎም አ፥ “አክጾፌል ዞሬዳ ዞሪ ሀዋ፤ ኑን እ ግያዋ ኦꬃናዉ በሲ? በሰናዋ ግዶፐ፥ ነ ቆፋይ አዬ?” ያጌዳ።
7 ሁሻይ አበሰሎማ፥ “አክጾፌል ዞሬዳ ዞሪ ሀ ዎድያን ሎአ ግደና።
8 ነ አዉነ ነ አዉዋ አሳቱ ምኖ ኦላንቻቱዋ ግድያዋነ ባረ ማራቱዋ ቦንቀቴዳ ማህያ ማላ ያሽያዋንታ ግድያዋ ኔን ኤራሳ። ነ አዉ ኦላዉ ሜዘ አሳ፤ እ ቃማ ባረ ኦላንቻቱዋናካ አቀና።
9 በአ፥ እ ሀኖደ ጎንጎሉዋ ግዶን ዎይ ሀራ ሳኣን ቆሰት ኡቴዳ። እ ህንተንቱ ጭታ ቦላ ኮይሮ ደንዶፐ፥ ሄዋ ስሴዳ አሳይ ኦንነ፥ ‘አበሰሎማ ካል ቤዳ አሳቱ ሾጨቴድኖ’ ያጋና።
10 ነ አዉ ቶራ ቃራ ግድያዋነ አናና ደእያ አሳቱካ ምኖ ግድያዋ እስራኤልያ አሳይ ኡባይ ኤርያ ድራዉ፥ ሀራይ አቶ ጋሙዋዳን ጻልያ ምኖቱ ዎዛናይካ ያሻን ሴራና።
11 “ሽን ታን ኔና ዞርያዌ ሀዋ፤ እስራኤልያ ዛዋን ዳናፐ ቢደ በርሳበሀ ጋካናዉ ደእያ እስራኤልያ ኡባ፥ አባ ዶናን ደእያ ሻፍያ ኬሻ ኔኮ ሺሻ፤ ያታደ ኔን ነ ሁጲያዉ ኡንቱንታ ኦላዉ ካለꬃ።
12 ያቶፐ ኑን አ ደሜዳ ሀቃንነ ሾጫና፤ ከተርሳይ ሳኣን ዎꬍያዋዳን ኑን አ ቦላ ዎꬋና። አ ግድናካ ዎይ አናና ደእያ አሳ ግድናካ እቱነ ፓጻ አተና።
13 እ ካታማ ግዶ ገሎፐካ፥ እስራኤልያ አሳይ ኡባይ ዎዶሩዋ ሄ ካታማ አሂደ፥ ካታማ ግዶን እት ሹቻይካ ቤተናዳን ኑን ሄ ካታማ ዛንጋራዉ ዱገ ጎቻና” ያጌዳ።
14 አበሰሎምነ እስራኤልያ አሳይ ኡባይ፥ “አርክያ ሁሻያ ዞሪ አክጾፌላ ዞርያፐ ሎአ” ያጌድኖ። ሄዌ ሀኔዳዌ፥ መꬍና ጎዳይ አበሰሎማ ቦላ ኢታባ አሀና ማላ፥ አክጾፌላ ዞርያ ሎኡዋ ሀልሳናዉ ቃቼዳ ድራሳ።
15 ሄዋፐ ጉይያን፥ ሁሻይ ቄሳቱ ዋ ጻዶቃነ አብያታራ፥ “አክጾፌል አበሰሎማነ እስራኤልያ ጭማቱዋ ሀዋ ሀዋ ጊደ ዞሬዳ፤ ታንካ ኡንቱንታ ሀዋ ሀዋ ጋደ ዞራድ።
16 ሀእካ ዳዊታኮ ኤለካ ኪቲደ፥ ‘ባዙዋ ፕኑዋን ሀቼ ቃማ አቆፓ፤ ሄፍንꬃ ፕና ክቻ! ህና ꬋዮፐ፥ ካቲነ አናና ደእያ አሳይ ኡባይ ꬋያና’ ያጊደ ኦድተ” ያጌዳ።
17 ዮናታንነ አህማኣጽ ቆንጭያን የሩሳላመ ካታማ ገልሽን ኡንቱንታ አሳይ በኤና ማላ፥ ኤንሮጌላ ግያ ሳኣን ኡቲደ ናጋናዉነ እት ቆማታ ያ ያደ ኡንቱንቶ ኦድና፥ ኡንቱንቱ ቢደ ካትያ ዳዊታዉ ኦዳናዉ ቆፔድኖ።
18 ሽን እት ዎዳላይ ኡንቱንታ በኤዳ፤ አበሰሎማዉ ኦዴዳ። ሄዋ ድራዉ፥ ኡንቱንቱ ላአቱካ ሄ ሳፐ ኤለካ ክች ቢደ፥ ባሁሪማ ካታማን እት ብታንያ ሶ ጋኬድኖ። ሄ ብታንያዉ ድርሳፐ ሶ ባጋና ሃꬃ ኦላይ ደኤ፤ ኡንቱንቱ ሄ ኦላ ግዶ ዱገ ገሌድኖ።
19 አያይነ ኤረተናዳን ብታንያ ማቻታ ካምያዋ አካደ ኦላ ዶናን ሂጻዱ፤ ያታደ አ ቦላ ካꬃ ምጫዱ።
20 አበሰሎማ ቆማቱ ብታንያ ሶ ዪደ ምሽራቶ፥ “አህማኣጽነ ዮናታን ሀቃን ደኢኖ?” ያጊደ ኦቼድኖ።
ምሽራታ፥ “ኡንቱንቱ ሻፋ ፕኒደ ቤድኖ” ያጋዱ፤ ኡንቱንቱ ኮይና ቤተናን ꬋይና፥ የሩሳላመ አጊደ ስሜድኖ።
21 ሄ አሳቱ ቤዳዋፐ ጉይያን፥ ላኡ አሳቱ ኦላፐ ከሲደ፥ ካትያ ዳዊታዉ ኦዳናዉ ቤድኖ፤ ዳዊታ፥ “ኤሌል ደንዲደ ሻፋ ፕንተ፤ አያዉ ጎፐ፥ አክጾፌል ህንተንቱ ቦላ ሀዋ ሀዋ ጊደ ዞር ዎꬄዳ” ያጌድኖ።
22 ዳዊተነ አናና እትፐ ደእያ አሳይ ኡባይ ዮርዳኖሳ ፕኒደ ቤድኖ። ዎንትያ ዎደ ዮርዳኖሳ ፕነናን አቴዳ እት አሳይነ ባዋ።
23 አክጾፌል ባረ ዞሪ አከትቤናዋ በኤዳ ዎደ፥ ባረ ሀርያ ኮሪደ፥ ባረ ደእያ ካታማ ቤዳ፤ አክጾፌል ባረ ሶያ ጊግሲደ፥ ባረካ ሱለቲደ ሀይቄዳ፤ ባረ አዉዋ ዱፉዋን ሞገቴዳ።
24 ዳዊተ ማህናይማ ካታማ ጋኬዳ ዎደ፥ አበሰሎምነ አናና ደእያ አሳይ ኡባይ ዮርዳኖሳ ሻፋ ፕኔድኖ።
25 አበሴሎም ባረ ኦላንቻቱ ቦላ እዮኣባ ኮታን አማሳ ሱንꬄዳ። አማስ እስራኤልያ የተራ ናኣ፤ የተር አብጋሎ አኬዳዋ፤ አብጋላ ናኦሳ ናትዉነ እዮኣባ ዳይ ጻሩይ ምቻቶ።
26 እስራኤላቱነ አበሴሎም ጋላኣደ ቢታን ኡቴድኖ።
27 ዳዊተ ማህናይማ ካታማ ጋክያ ዎደ፥ አሞና ጋድያፐ ራባፐ ዬዳ ናኦሳ ናአይ ሾቢ፥ ሎዳባራ ካታማፐ ዬዳ አምኤላ ናአይ ማኪርነ ሮጋሊማ ካታማፐ ዬዳ ጋላኣድያ ባርዝላይ
28 ሂጽያዋንታ፥ ሳምፓቱዋነ ኡርቃ ሚሻቱዋ አሄድኖ። ቃይ ኡንቱንቱ ዛርጋነ ባንጋ፥ ꬊልያነ ሻሻ፥ ባኤላነ ምስርያ፥
29 ኤሳነ መኤዳ ማꬃ፥ ሚዛ ማꬃ ፕላነ ዶርሳ ዳዊተነ አ አሳይ ማናዳን አኪደ ዬድኖ። ሄዋ ኡንቱንቱ አሄዳዌ፥ “አሳይ ዎራን ኮሻቴዳ፥ ዳቡሬነ ሳመቴ” ጊደ ቆፔዳ ድራሳ።