24
ዳዊተ አሳ ፓይድሴዳ
(1 ኦዱዋ 21:1-27)
1 ቃይካ መꬍና ጎዳ ሀንቁ እስራኤልያ ቦላ ኤጽ ከሴዳ፤ ያትና፥ ጾሳይ ዳዊታ ኡንቱንቱ ቦላ ደንꬂደ፥ “ባ፤ እስራኤላነ ይሁዳ አሳ ፓይዳ” ያጌዳ።
2 ሄዋ ድራዉ፥ ካቲ እዮኣባነ አናና ደእያ ኦላንቻቱዋ ካፓቱዋ ሀዋዳን ያጌዳ፤ “እስራኤልያ ዛራቱዋ ግዶ ዳናፐ ቢደ በርሳበሀ ጋካናዉ ቢደ ኡንቱንቱ አፑነንቶ ታን ኤራና ማላ፥ እስራኤልያ አሳ ፓይድተ” ያጌዳ።
3 ሽን እዮኣበ ካትያ፥ “መꬍና ጎዳይ ነ ጾሳይ ሀ ደእያ አሳ ቦላ ጼቱ ኩሽያ ጉጆ! ሄዋ ነ አይፊ፥ ታ ጎዳ ካትያ አይፊ በኦ! ሽን ታ ጎዳይ ካቲ አያዉ ሄዋ ማላ ኦꬃናዉ ኮዪ?” ያጌዳ።
4 ሽን ካትያ ቃላይ እዮኣባነ ኦላንቻቱ ካፓቱዋ ጾኔዳ። ኡንቱንቱ ካትያ ስንꬃፐ ከሲደ፥ እስራኤልያ አሳ ፓይዳናዉ ቤድኖ።
5 ኡንቱንቱ ዮርዳኖሳ ሻፋ ፕኔዳዋፐ ጉይያን፥ ዛንጋራፐ ገድሳ ባጋን ደእያ አሮኤራ ካታማን ኡቴድኖ፤ ሄዋፐ ቃይ ጋደ አꬊደ ያእዜራ ጋኬድኖ።
6 ሄዋፐ ጉይያን፥ ኡንቱንቱ ጋላኣደነ ሂተቱዋ ቢታን ደእያ ቃዴሳ ቤድኖ፤ ሄ ሳፐ ቃይ ዳና ካታማ ቤድኖ፤ ሄዋና ሲዶና ካታማ ቤድኖ።
7 ሄ ሳፐ ደንዲደ፥ ጺሮሳ ካታማ ጌሱዋነ ሂዌቱዋነ ካናነቱ ካታማ ኡባ ቤድኖ። ዉርሰꬃን ቃይ ይሁዳ ኔጌባን ደእያ በርሳበሀ ካታማ ቤድኖ።
8 ኡንቱንቱ ቢታ ኡባ ዩዪደ፥ ኡዱፑን አግናነ ላታሙ ጋላሳ ጋምኤዳዋፐ ጉይያን፥ የሩሳላመ ካታማ ስሜድኖ።
9 እዮኣበ ፓይዴዳ አሳ ፓይዱዋ ካትያ ኤርሴዳዋዳን እስራኤላን ማሻን ኦለታናዉ ዳንዳይያ ሆስፑን ጼቱ ሻአ፤ ምኖ ኦላንቻቱ ደኢኖ፤ ይሁዳን ቃይ እቼሹ ጼቱ ሻአይ ደኢኖ።
10 አሳ ፓይዴዳዋፐ ጉይያን፥ ዳዊታ ዎዛናይ ሻበረቴዳ፤ ሄዋ ድራዉ፥ ዳዊተ መꬍና ጎዳ፥ “ታን ሀ ኪታን ዎልቃማ ናጋራ ኦꬃድ። ሽን ሀእ አቤት መꬍና ጎዳዉ፥ ታን ኔና ዎሳይ፤ ታ ባይዙዋ፥ ነ ቆማ ባይዙዋ ቁጫ። ታን ዳሮ ኤያባ ሀናድ” ያጌዳ።
11 ዎንተꬃ ጋላስ ጉራ፥ ዳዊተ ግሱዋፐ ደንዴዳ ዎደ፥ ዳዊታዉ ትምቢትያ ኦድያ ጋዳኮ መꬍና ጎዳ ቃላይ ዪደ፥
12 “ባ፤ ዳዊታ፥ ‘መꬍና ጎዳይ ኔና፥ “ታን ኔና ሄዙባፐ ዶሩዋ በሳይ፤ ታን ነ ቦላ ፖላናዉ ታዉ ኡንቱቱፐ እቱዋ ዶራ” ያጌ’ ያጋ” ያጌዳ።
13 ጋድ ዳዊታኮ ቢደ፥ “ሄዙ ላይꬃ ነ ቢታይ ኮሻታናዋ ዶራይ? ዎይ ነ ሞርከቱ ኔና የደርስሽን፥ ሄዙ አግና ኔን ኡንቱንቱ ስንꬃፐ ባቃታናዋ ዶራይ? ዎይ ነ ቢታ ቦላ ሄዙ ጋላሳ ኢታ ሀርጊ ያናዋ ዶራይ? አነ ሀእ ቆፋ ቃቻደ፥ ታን ታና ኪቴዳዎ ዛርያዋ ኦዳ” ያጌዳ።
14 ሄዋፐ ጉይያን ዳዊተ ጋደ፥ “ታን ሎይꬅ ኡንኤታድ። መꬍና ጎዳ ማሮተꬃይ ዎልቃማ ግድያ ድራዉ፥ ኑን አነ አ ኩሽያን ኩንዶይተ፤ ታና አሳቱዋ ኩሽያን ኩንድሶፓ” ያጌዳ።
15 ሄዋ ድራዉ፥ ዎንታፐ ቢደ ባረ ጌዳ ጋላሳይ ጋካናዉ፥ መꬍና ጎዳይ እስራኤልያ ቢታን ኢታ ሀርግያ ኪቴዳ፤ እስራኤልያ ዛዋን ዳናፐ ቢደ በርሳበሀ ጋካናዉ፥ ላፑን ታሙ ሻአ አሳይ ሀይቄዳ።
16 የሩሳላመ ካታማ ꬋይሳናዉ ኪታንቻይ ባረ ኩሽያ የዴዳ ዎደ፥ መꬍና ጎዳይ ሄ ጋኬዳ ቦሻዉ ካዮቴዳ፤ አሳ ሾጭያ ኪታንቻ፥ “አጋ! ሄዌ ግዳና!” ያጌዳ። መꬍና ጎዳ ኪታንቻይ ሄ ዎደ ያቡስያ ኦርና ኡዱማን ደኤ።
17 አሳ ሾጭያ ኪታንቻ ዳዊተ በኤዳ ዎደ፥ መꬍና ጎዳ፥ “በአ! ናጋራ ኦꬄዳዌ ታና፤ ታን ባይዛድ! ሀ ዶርሳቱ፥ ኡንቱንቱ አይ ኦꬄድኖ? ሀያና፥ ታናነ ታ አዉዋ ሶ አሳ ኔን ሙራና ማላ ታን ዎሳይ” ያጌዳ።
18 ሄ ጋላስ ጋድ ዳዊታኮ ዪደ፥ “ባ፤ ፑደ ያቡስያ ኦርና ኡዱማ ባደ፥ መꬍና ጎዳዉ ያርሽያ ሳኣ ያን ግምባ” ያጌዳ።
19 ዳዊተ መꬍና ጎዳይ ጋደ ባጋና አዛዜዳዋዳን ፑደ ቤዳ።
20 ኦርን ዱገ ጼልያ ዎደ፥ ካቲነ አ አሳቱ ባረኮ ይያዋንታ በኤዳ፤ ጋጻ ከሲደ፥ ባረ ዴሙዋ ሳኣ ጋꬂደ፥ ካትያዉ ጎይኔዳ።
21 ዝጊደ ኦርን፥ “ታ ጎዳይ ካቲ ባረ ቆማኮ፥ ታኮ አያዉ ዬዴ?” ያጌዳ።
ዳዊተ፥ “አሳ ቦላፐ ቦሻይ ክቻናዳን ታን መꬍና ጎዳዉ ያርሽያ ሳኣ ግምባናዉ፥ ነ ኡዱማ ሻማናዉ ያድ” ያጌዳ።
22 ኦርን፥ “ታ ጎዳይ ካቲ ባረ ኮዬዳዋ አያነ አኪደ ያርሾ! በአ፤ ጹግያ ያርሾ ቦራቱ፥ ኤꬅያ ምꬃዉ ቃይ ካꬃ ቡክያ ሚሻቱነ ቦራ ሞርገ ምꬃቱ ሀዋንቱሽ።
23 ካትያዉ፥ ሀዋ ኡባ ታን ኦርን ካትያዉ እማይ” ያጌዳ። ቃይካ ኦርን ካትያ፥ “መꬍና ጎዳይ ነ ጾሳይ ነ ያርሹዋ አኮ” ያጌዳ።
24 ሽን ካቲ ኦርና፥ “ቱይት፥ ሃኮ! ታን ቱሙፐ ሚሻን ሻማና፤ አያዉ ጎፐ፥ ሚሻ አክቤና ጹግያ ያርሹዋ ታን መꬍና ጎዳዉ፥ ታ ጾሳዉ፥ ያርሽከ” ያጌዳ።
ሄዋ ድራዉ፥ ካቲ ኡዱማፐ ቦራቱዋ ኦርናፐ እሻታሙ ጻጋራ ብራን ሻሜዳ።
25 ዳዊተ ሄ ሳኣን ያርሽያ ሳኣ ግምቢደ፥ ጹግያ ያርሹዋነ እትፐተꬃ ያርሹዋ መꬍና ጎዳዉ ያርሼዳ፤ ያትና፥ መꬍና ጎዳይ ሄ ቢታ ድራዉ ዎሰቲደ ዎሳ ስሲደ፥ ቦሻ እስራኤልያፐ ድጌዳ።