7
ጾሳይ ዳዊተዉ እማና ጌዳ ህዶታ
(1 ኦዱዋ 17:1-15)
1 ካቲ ዳዊተ ባረ ካትያ ጎለን ኡቴዳዋፐ ጉይያንነ መꬍና ጎዳይ አ፥ አ ሞርከቱዋ ኡባፐ ሸምፕሴዳዋፐ ጉይያን፥
2 ትምቢትያ ኦድያ ናታና፥ “ታን ዝጋፐ ኬጸቴዳ ጎለን ደአይ፤ ሽን ጾሳ ታቦታይ ዱንካንያን ደኤ” ያጌዳ።
3 ናታን ዳዊታ፥ “ኦꬃናዉ ነ ዎዛናይ ቆፔዳዋ ኡባ ኪተታ፤ መꬍና ጎዳይ ኔናና ደኤ” ያጌዳ።
4 ሽን ሄ ጋላሳ ቃማ መꬍና ጎዳ ቃላይ ናታናኮ ዪደ፥
5 “ባ፤ ታ ቆማ ዳዊታ ሀዋዳን ያጋ፤ መꬍና ጎዳይ ሀዋዳን ያጌ፤ ‘ታን ደአና ጎልያ ኬጻናዌ ታና ጋደ ቆፓይ?
6 አያዉ ጎፐ፥ ታን እስራኤላቱዋ ግብጼ ጋድያፐ ከሴዳ ጋላሳፐ ዶማደ ሀቼ ጋካናዉ ጎለን ደአበይከ፤ ታን ዱንካንያን ያነ ሃነ ዩያደ ደኣድ።
7 ታን እስራኤልያ አሳ ኡባና ዩዬዳ ሳኣ ኡባን፥ ታ አሳ እስራኤልያ ሄማና ማላ፥ ታን ሱንꬄዳዋንቱፐ እቱዋነ ታዉ ዝጋ ጎልያ አያዉ ኬጻበይኪ? ጋደ ኦቻበይከ’ ” ያጌ ያጋ።
8 “ሄዋ ድራዉ፥ ሀእካ ታ ቆማ ዳዊታዉ ኦዳ፤ ‘ኡባፐ ዎልቃማ መꬍና ጎዳይ ኔና ሀዋዳን ያጌ፤ “ታን ኔና ሄንꬃ ጋደፐ፥ ዶርሳ ሄምያ ሳፐ ደንꬃደ፥ ታ አሳ እስራኤልያ ካለꬃናዳን አካድ።
9 ኔን ቤዳ ሳኣ ኡባን ታን ኔናና ግዳድ፤ ነ ሞርከቱዋ ኡባ ታን ነ ስንꬃፐ ድጋድ። ሀእ ስም ታን ሀ ሳኣን ኤረቴዳ ዎልቃማ አሳቱዋ ሱንꬃዳን ነ ሱንꬃ ግታያና።
10-11 ቃይ ታን ታ አሳዉ እስራኤልያዉ ሳኣ እማደ፥ ኡንቱንታ ሄ ሳኣን ቶካና። ሄዋ ድራዉ፥ ኡንቱንቱ ባረንቱ ሳኣን ደአና፤ ላኤንꬆ ኡንቱንቱ ሻባረትክኖ። በን ዎድያንነ ታ አሳ እስራኤልያ ቦላ ዳናትያዋንታ ታን ሱንꬄዳ ዎድያዳን፥ ኢታቱ ኡንቱንታ ዛረꬂደ ናቂክኖ። ቃይ ታን ኔና ነ ሞርከቱዋ ኡባፐ ሸምፕሳና።
“ ‘ “ሄዋ ቦላንካ መꬍና ጎዳይ ባረ ሁጲያዉ ነ ዛራቱ ደአናዳን ነዉ ጎልያ ኬጻናዋ ኦዴ።
12 ነ ላይꬃይ ዉርና ሀይቃደ፥ ነ ማይዛ አዎቱዋን ጋከትያ ዎደ፥ ነ ጉልባታፐ የለቴዳ ናኣ ታን ደንꬃና፤ አ ካዉተꬃ ምንሳና።
13 ታ ሱንꬃዉ ጎልያ ኬጻናዌ አ፤ ታን አ ካዉተꬃ አራታ መꬍናዉ ምንሳ ኤሳና።
14 ታን አዉ አዉዋ ግዳና፤ እካ ታዉ ናኣ ግዳናዋ። እ ባልያ ዎደ፥ ታን አ አሳ ጻምአን፥ አሳይ ሾጭያ ልሱዋን አ ሴራና።
15 ሽን ታን ነ ስንꬃፐ ድጌዳ ሳኦላፐ ታ ሲቁ አከቴዳዋዳን፥ አፐ ኡባካ አከተና።
16 ነ ዛራቱነ ነ ካዉተꬃይ ታ ስንꬃን መꬍናዉ ጋምአና፤ ነ ካዉተꬃ አራታይካ መꬍናዉ ምን ኤቃና” ያጌ’ ያጋ” ያጌዳ።
17 ናታን ጾሳይ አዉ ሳጻን ቆንጭሴዳ ቃላ ኡባ ዳዊታዉ ኦዴዳ።
ዳዊታ ዎሳ
(1 ኦዱዋ 17:16-27)
18 ሄዋፐ ጉይያን፥ ካቲ ዳዊተ ዱንካንያ ገሊደ፥ መꬍና ጎዳ ስንꬃን ኡቴዳ። ሀዋዳን ያጊደ ዎሴዳ፤ “አቤት ኡባ ሞድያ መꬍና ጎዳዉ፥ ኔን ሀዋ ኡባ ታዉ ኦꬃናዉ ታን ኦኔ? ታ ሶ አሳይካ አዬ?
19 አቤት ኡባ ሞድያ መꬍና ጎዳዉ፥ ሀዌ ነ አይፍያ ስንꬃን ጉꬃ ማላትና፥ ስንꬃፐ ነ ቆማ ዛረቶ ሀናናዋካ ሃሳያዳ። ኡባ ሞድያ መꬍና ጎዳዉ፥ ሀዌ ኔን አሳዉ ኦዉካ ኦꬅያ ኦሱዋ ግደና።
20 “ሀዋፐ አꬍያዋ ታን ዳዊተ ነዉ አይ ጋናዉ ዳንዳያይታ? ኡባ ሞድያ መꬍና ጎዳዉ፥ ኔን ታና ነ ቆማ ኤራሳ።
21 ኔን ነ ቃላ ድራዉ፥ ነ ዎዛና ቆፋዳን ሀ ዎጋባ ኦꬃደ፥ ታና ነ ቆማ ኤርሳዳ።
22 “አቤት ኡባ ሞድያ መꬍና ጎዳዉ፥ ኔን አይ ኬሻ ግቴሻ! ነ ማል እቱነ ባዋ፤ ኑን ኑ ሀይꬃን ስሴዳዋዳንካ፥ ኔፐ አትና ሀራ ጾሳይ ባዋ።
23 ኔን ነ አሳ ኦꬃናዉ ዎዜዳ ነ አሳ እስራኤልያ ማላትያ ሀራ ካዉተꬅ ሳኣ ቦላን ባዋ። ኔን ኡንቱንቶ ኦꬄዳ ግታነ ማላልስያ ኦሶቱ ጋሱዋን ነ ሱንꬃይ ቢታን ሳኣን ኤረቴዳ። ኔን ነ አሳ ስንꬃፐ ሀራ ካዉተꬃቱዋነ ኡንቱንቱ ጾሳቱዋ ላጋዳ።
24 ኔን ነ አሳ እስራኤልያ መꬍናዉ ነዋ ኦꬃዳ። አቤት መꬍና ጎዳዉ፥ ኔንካ ኡንቱንቱ ጾሳ ግዳዳ።
25 “መꬍና ጎዳ ጾሳዉ፥ ስም ሀእ ኔን ነ ቆማዉነ አ ዘረꬃዉ ኦꬃና ጌዳዋ መꬍናዉ ናጋ፤ ኔን ኦꬃና ጌዳዋዳንካ ኪተታ።
26 ሄዋን ነ ሱንꬃይ መꬍናዉ ግታታና፤ አሳይካ ኔና፥ ‘ኡባፐ ዎልቃማ ጾሳይ እስራኤልያ ጾሳ’ ያጋና። ነ ቆማ ዳዊታ ዛራቱካ ነ ስንꬃን ምኒደ ኤቃና።
27 “አቤት ኡባፐ ዎልቃማ መꬍና ጎዳዉ፥ እስራኤልያ ጾሳዉ፥ ኔን ሀዋ፥ ‘ታን ነ ዛራቱ ደአናዳን ኦꬃና’ ያጋደ ታዉ ነ ቆማዉ ቆንጫዳ፤ ሄዋ ድራዉ፥ ታን ነ ቆማይ ኔና ሀ ዎሳ ዎሳናዉ ጻላድ።
28 አቤት ኡባ ሞድያ መꬍና ጎዳዉ፥ ኔን ጾሳቴ! ነ ቃላይካ አማነትያዋ፤ ኔን ሀ ሎኦ ቃላ ታዉ ነ ቆማዉ ኦꬃና ጋዳ።
29 ነ ስንꬃን ያ መꬍናዉ ጋምአናዳን፥ ነ ቆማ ዛርያ አንጃናዉ ህዶታዳ። አያዉ ጎፐ፥ አቤት ኡባ ሞድያ መꬍና ጎዳዉ፥ ሄዋ ሃሳያዳ፤ ቃይ ነ አንጁዋን ነ ቆማ ዛራቱ መꬍናዉካ አንጀታና” ያጋ ዎꬃዳ።