ጳዉሎስ
ጽሞቶሳዉ
ጻፌዳ ላኤንꬆ ኪታ
ገሉዋ
ሀዌ ጳዉሎስ ጽሞቶሳዉ ጻፌዳ ላኤንꬆ ኪታይ፥ ጳዉሎስ ማታ ባረና ማድያነ ኦሱዋ ባረናና እትፐ ኦꬅያ ዎዳላ፥ ጽሞቶሳ ዞሬዳ ዞርያ ኦይቄዳዋ። አ ዞርያፐ ዳርያ ባጋይ ዳንዳያን ገንጫና በሴ ግያዋ። ጽሞቶሳዉ ዞርያነ መንꬁዋ ቃላይ እመቴዳዌ፥ የሱስ ክርስቶሳባ አማነትያዋ ግዲደ ማርካታናዳን፥ ምሽራቹዋ ቃላነ ኤጫ ቃላ ጫቁዋ ትምርትያ ምንሲደ ኦይቃናዳንነ መትያባይነ ኤቀትያባይ ዳሮፐካ ታማርስያዋንነ ምሽራቹዋ ቃላ ኦድያዋን ምናናሳ።
ጽሞቶስ ኤያተꬃን ኦሰትያ ፓና መላ ፓሉማፐ ሃካና ማላ፥ ዱማ ምኖ ኦዱ አዉ ኦደቴዳ። አያዉ ጎፐ፥ ሄዋ ማላ ኦዱ ስስያዋንታ ባይዝያዋፐ አትን፥ ሀራ እ እምያ ጎእ ባዋ።
ሄዋን ኡባን ጽሞቶስ ሀሳያናዉ በስያባይ ጳዉሎሳ ደኡዋነ አ ሀኖታ ሎኦ ቆፋ፥ ሄዋፐካ አ አማኑዋ፥ አ ገንጩዋ፥ አ ሲቁዋ አ ዳንዳያነ የደሳን አ ጋኬዳ መቱዋ ሌምሱዋን ካላናዳና።
ሸምፓቱዋ ኡባቶ እመቴዳ ቃንꬃ ቆፋቱዋ
ገሉዋ 1:1-2
ጽሞቶሳዉ እመቴዳ ማቁዋ 1:3—2:13
አሳይ ካድያ ዎደ አማነት ቤቱሳ 2:14—4:5
ሄ ዎደ ደእያባቱዋነ ኮሽያ ካለꬅያ ኦጋቱዋ 4:6-18
ዉርሰꬃ ቁትያ 4:19-22
1
1 ታን ጳዉሎስ፥ ጾሳይ እማና ጌዳ ክርስቶስ የሱሳና ኑዉ ደእያ ደኡዋባ ኦዳናዉ፥ ጾሳይ ጌዳዋዳን፥ ክርስቶስ የሱስ ኪቴዳዌ፥
2 ታ ሲቆ ናኣ ጽሞቶሳዉ ሀ ዳብዳቢያ ጻፋይ።
ጽሞቶሳዉ እመቴዳ ዞርያ
ጾሳ አዉዋፐነ ኑ ጎዳ ክርስቶስ የሱሳፐ፥ አꬎ ኬካተꬃይ፥ ማሮተꬃይነ ሳሮተꬃይ ነዉ ግዶ።
3 ታ ዛራቱ ኦꬄዳዋዳን፥ ታንካ ታና ዞርያ ጌሻ ዎዛናፐ ኦꬅያ ጾሳ ቃማነ ጋላስ ዎስያ ዎሳን ኡባ ዎደ ኔና ሀሳይያ ድራዉ፥ አ ጋላታይ።
4 ታን ነ አፎꬃ ሀሳያ ሀሳያደ ናሸታና ማላ፥ ኔና በአናዉ ዳሮ ላሞታይ።
5 ኔናን ደእያ ዎርዶ ባይና አማኑዋ ሀሳያይ። ሄ አማኑ በን ነ ዳይ ዳይ ሎይድንነ ነ ዳይ ኤዉኒቅን ደእያ አማኑዋ ማላ፤ ቃይ ኔናንካ ሄዌ ደእያዋ ኤራድ።
6 ሄዋ ድራዉ፥ ታን ታ ኩሽያ ላኡዋ ነ ቦላ ዎꬄዳ ዎደ፥ ጾሳይ ነዉ እሜዳ እሙዋ ኔን ዶሽሰና ማላ፥ ኔና ሀሳይሳይ።
7 አያዉ ጎፐ፥ ጾሳይ ኑዉ ዎልቃ፥ ሲቁዋነ ኑ ሁጲያ ናግያዋ እምያ ጌሻ አያና እሜዳፐ አትን፥ ያሻ አያና እምቤና።
8 ስም፥ ኑ ጎዳዉ ማርካትያዋን ዎይ አ ድራዉ ቃሹዋን ደእያ ታዋንካ ዬላቶፓ። ሽን ጾሳይ ነዉ እምያ ዎልቃ ኬናን ታናና ምሽራቹዋ ቃላዉ ዋየታ።
9 ጾሳይ ባረ ቆፋንነ ባረ አꬎ ኬካተꬃን ኑና አሺደ፥ ባረ አሳ ኦꬃናዉ ጼሶዋፐ አትን፥ ኑን ኦꬄዳ ኦሱዋ ድራዉ ግደና። እ ሀ አꬎ ኬካተꬃ ክርስቶስ የሱሳ ባጋና ዎዲ ዶመታናፐ ካሰ ኑዉ እሜዳ።
10 ሽን ሀእ ሀ አꬎ ኬካተꬃይ ኑና አሽያ ክርስቶስ የሱሳ ዩሳን ኑዉ ቆንጬዳ። ቃይ ሀይቁዋ ዎልቃካ እ ꬋይሴዳ። ዎንጋላ ምሽራቹዋ ባጋና ባየና ደኡዋ ኑዉ ቆንጭሴዳ።
11 ታን የሱስ ኪቴዳዋነ አይሁዳ ግደና አሳ ታማርስያዋ ግዳደ፥ ዎንጋላ ምሽራቹዋ ኦዳና ማላ፥ ጾሳይ ታና ዶሬዳ።
12 ቃይ ታን ሀ መቱዋ አክያዌ ሄዋ ድራሳ። ሽን ታን አማኔዳዋ ኤርያ ድራዉ፥ ዬላትከ። ቃይ እ ታዉ እሜዳ ሀዳራ ሄ ጋላሳይ ጋካናዉ፥ እ ናጋናዉ ዳንዳይያዋ ኤራይ።
13 ታን ኔና ታማርሴዳ ቱሙ ቃላ ሌምሱዋ ኡዳ ኦይቃደ፥ ክርስቶስ የሱሳን ኑዉ ደእያ አማኑዋንነ ሲቁዋን ደአ።
14 ኑ ግዶን ደእያ ጌሻ አያና ባጋና ነዉ ሀዳራ እሜዳ ሎኦባ ናጋ።
15 ኢስያ ግያ ቢታን ደእያ ኡባቱ ታፐ ባቃቴዳዋ ኤራሳ፤ ኡንቱንቱ ግዶን ፕገሉስነ ሄርሞገኔስ ደኢኖ።
16 ሄነስፎሩ ታና ዳሮ ዎደ መንꬄዳ ድራዉ፥ ጎዳይ አ ሶይ አሳዉ ማሮተꬃ እሞ። ቃይ ታን ቃሾ ጎለን ደእያዋ እ ዬላትቤና።
17 ሽን ሮመ ግያ ካታማ ጋኬዳሳና ታና ሎይꬅ ኮዪደ ደሜዳ።
18 ሄ ጋላስ ጎዳፐ ማሮተꬃ ደማናዳን፥ ጎዳይ አዉ እሞ። ቃይ ኤፈሶና ግያ ካታማን እ ታና አይ ኬና ማዴደንቶነ ኔን ሎይꬃ ኤራሳ።