10
መꬍና ጎዳይ ባረ አሳ አንጃና
1 ባልጉ ጋክያ ዎደ፥ መꬍና ጎዳይ እራ እማናዳን ዎስተ። መꬍና ጎዳይ እራ ቶኬዳ ሻርያ ኪቴ፤ ቃይ እ አሳዉ እራ እሜ፤ አታክልትያካ ሾይቃን ሞክሴ።
2 ሶ ኤቃ ምስለቱ ኦድያዌ ሀዳ፤ ካይያዋንቱ ዎርዶ ሳፃ በኢኖ፤ አኩመትያዋንቱካ ዎርዶ አኩሙዋ ኦዲኖ፤ ሀዳ ምንꬁዋካ ምንꬂኖ። ሄዋ ድራዉ፥ አሳይ ዱጼዳ ዶርሳዳን ቶይላካቴ፤ ኡንቱንታ ሄምያዌ ባይና ድራዉ፥ ኡንቱንቱ ቆሄቲኖ።
3 ታ ሀንቁ ሄንꬃንቻቱዋ ቦላ ኤጽ ከሴዳ፤ ሄ ካለꬅያዋንታ ታን ሙራና። አያዉ ጎፐ፥ ኡባፐ ዎልቃማ መꬍና ጎዳይ ባረ ዶርሳ ዉደ ግድያ ይሁዳ አሳ እ ሄሜ፤ እ ኡንቱንታ ኦላዉ ሳልፔዳ ባረ ዎልቃማ ፓራ ማላ ኦꬃና።
4 ይሁዳ አሳ ግዶፐ ካለꬅያዋንቱ ከሳና፤ ኡንቱንቱ ጎልያዉ ጎዳ ጻጱዋ ምንስያ ሹቻዳን፥ ዱንካንያ ꬎጌዳዋዳንነ ኦላ ሚሻዳን ምኖ ግዳናዋ።
5 ኡንቱንቱ ኦግያ ኡርቃ የꬍያ ምኖ ኦላንቻቱዋ ማላ ግዳናዋንታ፤ መꬍና ጎዳይ ኡንቱንቱና ደእያ ድራዉ፥ ኡንቱንቱ ኦለታና፤ ፓራ አሳቱዋካ ጾናና።
6 “ታን ይሁዳ አሳ ምንꬃና፤ ዮሴፎ አሳካ አሻና፤ ታን ኡንቱንቶ ቃረትያ ድራዉ፥ ኡንቱንቱ ዛራደ አሀና፤ ቃይ ኡንቱንቱካ ታን ኡንቱንታ ካሰካ አጋቤናባ ማላ ግዳናዋ። ታን መꬍና ጎዳ ኡንቱንቱ ጾሳ ግድያ ድራዉ፥ ኡንቱንቱ ዎሳ ስሳና።
7 ኤፍሬማ አሳይ ምኖ ኦላንቻ ማላ ግዳናዋ፤ ዎይንያ ኤሳ ኡሼዳ አሳዳን፥ ኡንቱንቱ ዎዛናይ ናሸታና። ኡንቱንቱ ናናይካ ሄዋ በኢደ፥ ሀሹ ጋና፤ ኡንቱንቱ ዎዛናይ መꬍና ጎዳን ናሸታና።
8 “ታን ታ አሳ ሱይቃደ ጼሳና፤ ያታደ፥ ኡንቱንታ እትፐ ሺሻና። አያዉ ጎፐ፥ ታን ኡንቱንታ ዎዛድ፤ ኡንቱንቱ ካሰዋዳንካ ጮራ ግዳናዋንታ።
9 ታን ኡንቱንታ አይሁዳ ግደና ካዉተꬃቱዋ ግዶን ላልንቶካ፥ ኡንቱንቱ ባረንቱ ደእያ ሃኮ ጋድያን ታና ሀሳያና፤ ቃይ ኡንቱንቱካ ኡንቱንቱ ናናይካ ፓጻ አታናነ ባረንቱ ቢታ ስማና።
10 ታን ኡንቱንታ ግብጼ ጋድያፐ ዛራና፤ አሶረ ቢታፐካ ታን ኡንቱንታ ሺሻና። ኡንቱንቶ ኡትያ ሳአይ ꬋያና ጋካናዉ፥ ታን ኡንቱንታ ጋላኣደ ቢታንነ ሊባኖሳ ጋድያን ኩንꬃና።
11 ኡንቱንቱ መቶ አባ ግዶና አꬍሽን፥ ታን ጾሳይ አባ ቤታ ሾጫና፤ ጪማ ግዴዳ ናይለ ሻፋይካ መላና። አሶረ ቢታ ኦቶሩ ጊያና፤ ግብጼ ካተቱዋ ጻምአይካ መአና።
12 ታን ኡንቱንታ መꬍና ጎዳን ምንሳና፤ ኡንቱንቱካ አ ሱንꬃን ሀመታና። ታን መꬍና ጎዳይ ሀዋ ኦዳይ” ያጌ።