76
S'oossaa S'oonuwaa
Zammaaretuwaa Kaappoo Diitsaa Waatsan Yes'etteedda, Asaafa mazamuriyaa
1 S'oossay Yihudaan eretteeddawaa;
Aa suntsay Israa'eeliyaan wolk'k'aama.
2 Aa dunkkaanii Saleemana;
I de'iyaasay S'iyoonena.
3 I, hewan s'onggettiyaa,
morkkatuwaa wonddaafiyaa c'ubiyaa, gonddalliyaa, mashshaanne
hara olaa miishshatuwaa mentsereetseedda.
4 Abeet S'oossaw, ne bonchchuu ay keeshshaa gitee!
Neeni ne morkkatuwaa s'oonaade,
deriyaappe simmiyaa wode,
ne anggay ayiba yashshiyaawe!
5 Gooba tooranchchatuu,
barenttoo de'iyaawaa ubbaa bonk'k'etti kichcheeddino.
Ha"i simmi unttunttu,
wolk'k'aama gem"ishshuwaa gem"isheeddino;
unttunttuppe ittuunne bare kushiyaa dentsibeenna.
6 Abeet Yaak'ooba S'oossaw, neeni seereedda wode,
paraa asatuunne paratuu kunddo saan atteeddino.
7 Shin abeet S'oossaw, neeni yashshaasa!
Ne hank'k'uu suulleedda wode,
ne sintsan oonee ek'k'anawe?
8 Neeni pirddaa saluwaappe sisseedda wode,
sa'aan de'iyaa Asay yayyiide, c'o"u geedda.
9 Neeni sa'aan k'ohetteeddawantta ashshanaw,
pirddaw denddeedda wode, hewe haneedda.
10 Asaa hank'k'uu dareedda keeshshaa neeni galatettaasa.
Olaappe atteedda asatuu ubbay,
ne baalaa gallassatuwaa bonchchana.
11 Med'inaa Godaw, hintte S'oossaw,
shiik'ettite, hewaakka gatsite.
Hinttenoo shooro kawutetsatoo,
yayettanaw bessiyaawoo immotaa ahite.
12 I kaappotuwaa otoruwaa kawushshee;
wolk'k'aama kaatetuwaakka I yashissee.