7
Yawe Yɛnŋɛlɛ làa Izirayɛli tara
ti kɔsanga wogo ki yo
1 Yawe Yɛnŋɛlɛ làa li sɛnrɛ ti kan na yeri, ma yo fɔ:
2 Mboro wo na, sɛnwee pyɔ, mi ŋa ye Fɔ, Yawe Yɛnŋɛlɛ le, pa mì yo yɛɛn Izirayɛli tara woolo pe wogo na fɔ: «Izirayɛli tara ti kɔsanga wì gbɔn, kɔsanga wì gbɔn tara ti kɛɛ tijɛrɛ ki ni fuun ki na.
3 Koni ye wogo ki kɔsanga wì gbɔn; mi yaa na naŋgbanwa kala li wa ye na. Mi yaa kiti kɔn ye na mbe yala ye tangalɔmɔ pi ni, mbe ye katijangara nda fuun yè pye ti go kala li taga ye na.
4 Mi se ka ye wele ye yuŋgbɔgɔrɔ mbe pye na na, mi se ka ye yinriwɛ ta; katugu mi yaa ye tangalɔmɔ pi fɔgɔ tɔn ye na konaa ye katijangara ti ni, to nda ye koro na piin wa ye yɛɛ sɔgɔwɔ. Pa kona ye yaa ki jɛn fɔ muwi mi yɛn Yawe Yɛnŋɛlɛ le.»
5 Pa we Fɔ, Yawe Yɛnŋɛlɛ lì yo yɛɛn fɔ: «Jɔlɔgɔ, jɔlɔgɔ yɛn na paan, ŋga lere faga cɛnlɛ yan!
6 Kɔsanga wi yɛn na paan! Ee, kɔsanga wi yɛn na paan! Jɔlɔgɔ ki yɛn na paan ye mɛgɛ ni; ki wele kila paan.
7 Yoro mbele ye yɛn ma cɛn wa tara ti ni, ye tɔngɔsanga wì gbɔn. Wagati wì gbɔn, kiti kɔnwagati wì yɔngɔ. Jatere piriwɛn tinmɛ pi yɛn wa yanwira ti na, yɔgɔrimɔ tinmɛ ma pi yɛn wa.
8 Koni, mi yaa na naŋgbanwa gbɔɔ kala li wa ye na, mbanla naŋgbanwa ndorogo kala li pye ye na fɔ sa gbɔn wa li kɔsaga ki na. Mi yaa kiti kɔn ye na mbe yala ye koŋgolo ke ni, mbe ye katijangara ti go kala li taga ye na.
9 Mi se ka ye wele ye yuŋgbɔgɔrɔ mbanla ta, mi se ka ye yinriwɛ ta; katugu mi yaa ye tangalɔmɔ pi fɔgɔ tɔn ye na konaa ye katijangara ti ni, to nda ye koro na piin wa ye yɛɛ sɔgɔwɔ. Pa kona ye yaa ki jɛn fɔ muwi mi yɛn Yawe Yɛnŋɛlɛ le, na li yɛn na ye gbɔɔn.
10 «Kiti kɔnpilige ki wele! Ki ŋga ki yɛn na paan! Jɔgɔwɔ pi yɛn na paan. Lewɛlɛwɛ kapyere ti yɛn na lege na kee yɛgɛ, yɛɛ gbɔgɔwɔ pi yɛn na gbogo na kee yɛgɛ.
11 Lewɛlɛwɛ kapyere tì kanŋga ma pye paa kanŋgaga yɛn, ŋga pè yirige mbaa kapege piin ki ni. Lere wo wa kpɛ se ka koro wa pe ni, pe yarijɛndɛ ta kpɛ se ka koro, pe lɛgɛwɛ po naa pi ni fuun, wa se ka koro, pe gbɔgɔwɔ pa se ka koro.
12 Wagati wì gbɔn, kiti kɔnpilige kì yɔngɔ. Kii daga lɔfɔ wila yɔgɔri, kii daga pɛrɛfɔ wi pye yɛsanga ni; katugu na naŋgbanwa gbɔɔ pi yaa yiri leele pe ni fuun pe kɔrɔgɔ.
13 Pɛrɛfɔ wi se ka ya mboo yaripɛrɛgɛ ki ta naa, ali na wiga koro go na o; katugu yariyanga ŋga ki yɛn naga nari fɔ ki janwa ŋa wi ni fuun wi yaa ka tɔngɔ, ki kala li se koro mbapyewe. Pe ni fuun nuŋgba nuŋgba pe kambasinŋge ki kala na, lere kpɛ se ka ya mboo yɛɛ shɔ.
14 Pe yaa ka mbanlaga ki win mbe kala pyew li gbɛgɛlɛ, ɛɛn fɔ lere kpɛ se ka ta mbe kari wa malaga ki na, katugu na naŋgbanwa pi yaa yiri janwa wi ni fuun wi kɔrɔgɔ.»
Yɛnŋɛlɛ li yaa Izirayɛli woolo
pe kapere ti fɔgɔ tɔn pe na
15 «Tokobi wi yaa kaa jɔgɔwɔ piin wa ca ki puŋgo na, yambewe po naa fuŋgo ki ni, ti yaa ka pye wa ca nawa pi ni. Lere ŋa ka pye wa wasege ki ni, tokobi wi yaa wo gbo; lere ŋa ka pye wa ca nawa, fuŋgo konaa yambewe pi ni, ti yaa wo gbo.
16 Leele mbele ka ka koro go na, poro yaa fe mbe kari wa yanwira ti na, paa yanwira gbunlundɛrɛ keteŋgele yɛn; pe ni fuun pe yaa kaa jɛɛn pe yɛɛra kajɔgɔrɔ ti kala na.
17 Pe ni fuun pe kɛyɛn yi yaa ka fanla pe na,
pe kanŋguuro ti yaa kaa seri pe na.
18 Pe yaa ka jatere piriwɛn yaripɔrɔ le pe yɛɛ na,
sunndo kɔngɔ yaa ka pe yigi.
Fɛrɛ yaa ka pye pe yɛrɛ ti na,
pe yaa ka pe ni fuun pe yinrɛ ti kulu pe na jatere piriwɛn pi na.
19 Pe yaa ka pe warifuwe wi wa wa ca nawa koŋgolo ke ni,
pe tɛ wi yaa ka pye pe yeri paa fyɔngɔ yaraga yɛn.
Pe warifuwe nakoma pe tɛ wi se ka ya mbe pe shɔ Yawe Yɛnŋɛlɛ li naŋgbanwa pilige ki na.
Pe se ka yaraga ka ta mbe ka mbe pe fuŋgo ki kɔ,
nakoma mbe ka mbe tin;
katugu ko yarijɛndɛ to tìla pye pe puŋguwɔ pi go ye, ma ti a pè kapege pye.
20 Pe fereyaara tiyɔnrɔ tìla pye pe yɛɛ gbɔgɔwɔ pi go;
a pè si ta lɛ ma yarisunndo yanlɛrɛ gbegele ti ni, nda tì tijanga ma tisaw.
Ki kala na, mi ŋa Yɛnŋɛlɛ, mi yaa ti kanŋga mberi tɛgɛ fyɔngɔ yaara pe kan.
21 Mi yaa ti nambanmbala pele mbe pan pe pe kɛɛ yaara ti shɔ pe yeri,
mbe ti lepeele pele mbe ki yaara ti koli mbe kari ti ni, mberi tɛgɛ fyɔngɔ ni.
22 Mi yaa ka puŋgo le pe ni,
pe yaa kanla kɔrɔgɔ ki tɛgɛ fyɔngɔ ni.
Beŋganri pyefɛnnɛ pele yaa ka pan mbe ye wa ki ni, mbege tɛgɛ fyɔngɔ ni.
23 «Ye yɔngɔwɔ gbegele,
katugu tara tì yin legbogo kiti kagala ke ni,
a ca kì yin lewɛlɛwɛ kapyere ti ni.
24 Mi yaa ti cɛngɛlɛ ŋgele kè pe ke ni fuun na, ke pan,
mbe pan mbe pe yinrɛ ti shɔ pe yeri mberi ta.
Mi yaa ka pe fanŋga fɛnnɛ pe yɛɛ gbɔgɔwɔ pi kɔ,
mbe pe yarisunndo gbɔgɔsara ti tɛgɛ fyɔngɔ ni.
25 Jatere piriwɛn yaa ka pan pe yeri,
pe yaa kaa yɛyinŋge lagajaa, ɛɛn fɔ pe se sigi ta.
26 Jɔlɔgɔ ka yaa kaa tari jɔlɔgɔ ka na,
sɛnpere ta yaa kaa nuru mbaa tari sɛnpere ta na.
Pe yaa kaa Yɛnŋɛlɛ yɔn sɛnrɛ yofɛnnɛ pe yɛnri mbe yo paa yariyanra yaan pe kan,
saraga wɔfɔ wi se kaa lasiri sɛnrɛ ti nari leele pe na naa,
yɛrɛwɛ sɛnrɛ se kaa taa lelɛɛlɛ pe yeri naa.
27 Wunlunaŋa wi jatere wi yaa ka piri wi na,
wunluwɔ pyɔ wi sunndo wi yaa kaa kɔɔn wi na;
tara woolo pe kɛyɛn yi yaa kaa seri pe na fyɛrɛ ti kala na.
Mi yaa ka pe sara mbe yala pe tangalɔmɔ pi ni;
mi yaa ka kiti kɔn pe na mbe yala pe kapyegele ke ni.
Pa kona pe yaa ki jɛn fɔ muwi mi yɛn Yawe Yɛnŋɛlɛ le.»