5
Yɛkeele pe yɛn na tara woolo
pe punŋgo
1 Yoro saraga wɔfɛnnɛ wele, ye logo na yeri!
Yoro Izirayɛli woolo wele, yaa nuru!
Yoro wunlunaŋa go woolo, ye nuŋgbolo jan ye logo!
Kiti yaa kɔn ye na,
katugu yè pye paa pɛnɛ yɛn leele pe na wa Mizipa ca,
ma pye paa leele yigimɛrɛ yɛn wa Tabɔri yanwiga ki na.
2 Yè wege tijugo wɔ leele pe na wa Shitimu ca.
Ɛɛn fɔ mì gbɛgɛlɛ mbe pe kapere ti fɔgɔ tɔn pe na.
3 Mi wo na, mì Efirayimu cɛnlɛ woolo pe jɛn,
Izirayɛli woolo ye kala la si lara na na.
Koni Efirayimu cɛnlɛ woolo yè nanjara pye,
Izirayɛli woolo, a yè ye yɛɛ tɛgɛ fyɔngɔ ni.
4 Izirayɛli woolo pe kapere tì pe yɛgɛ kɔn, pe se ya sɔngɔrɔ mbe pan Yɛnŋɛlɛ li kɔrɔgɔ naa,
katugu nanjara jatere wi yɛn pe ni.
Pee si Yawe Yɛnŋɛlɛ li jɛn.
5 Izirayɛli woolo pe yɛɛ gbɔgɔwɔ pi yɛn na pe jɛrɛgi.
Izirayɛli woolo naa Efirayimu cɛnlɛ woolo pe yaa ka to pe kajɔɔgɔ ki kala na.
Zhuda tara woolo pe yaa ka pinlɛ mbe to pe ni fun.
6 Pe yaa kari pe simbaala naa pe nɛrɛ ti ni mbe sa Yawe Yɛnŋɛlɛ li lagaja.
Ɛɛn fɔ pe se kali yan,
katugu lì laga pe na.
7 Pè Yawe Yɛnŋɛlɛ li java,
katugu pè kɛɛnrɛ piile se.
Koni, yeŋge nuŋgba ni, poro naa pe yarijɛndɛ ti ni pe yaa tɔngɔ mbe wɔ wa.
Malaga ŋga
ki yaa to Izirayɛli woolo
naa Zhuda tara woolo pe sɔgɔwɔ
8 Ye simbapɔlɔ yɛnnɛ mbanlaga ki win wa Gibeya ca,
ye mbanlaga ki win wa Arama ca!
Ye malaga kɔnŋgɔlɔ wa wa Bɛti Avɛni ca.
Bɛnzhamɛ cɛnlɛ woolo, ye juguye pe yɛn ye puŋgo na.
9 Efirayimu cɛnlɛ woolo pe yaa ka tɔngɔ mbe wɔ wa
jɔlɔgɔ pilige ki na.
Ŋga mi yɛn na yuun Izirayɛli tara cɛngɛlɛ ke kan, ki yɛn kaselege.
10 Zhuda tara teele pe yɛn paa leele mbele pe maa tara kɔngɔlɔ ke woo wa ke yɔngɔlɔ ke ni, na ka tari pe tara ti na.
Na naŋgbanwa kala li yaa to pe na paa lafogo tɔnmɔ yɛn.
11 Kiti ŋa wi yaa kɔn Efirayimu cɛnlɛ woolo pe na, wi yaa jɔlɔgɔ wa pe na mbe pe jɔgɔ;
katugu pège kɔn maga tɛgɛ, mbe taga yaara nda ti yɛn go fu woro to puŋgo na.
12 Ki kala na, mi yaa Efirayimu cɛnlɛ woolo pe jɔgɔ
paa yɛgɛ ŋga na fyɛnrɛ ma kaa yaraga jɔgɔ we.
Mi yaa Zhuda tara woolo pe jɔgɔ fun paa yɛgɛ ŋga na sagbanfɔɔngɔ tipege ma lere jɔgɔ we.
13 Efirayimu cɛnlɛ woolo pè pe yama pi jɛn,
Zhuda tara woolo pè pe sagbanra ti yan.
Kì pye ma, Efirayimu cɛnlɛ woolo pè kari wa Asiri tara fɛnnɛ pe yeri.
Pè pitunmbolo torogo wa ki tara ti wunluŋgbɔɔ Yarɛbu wi yeri wi pe saga.
Ɛɛn fɔ, wo se ya mbe ye sagala,
wi se ya mbe ye sagbanra ti wɛrɛ pye.
14 Katugu mi jate, mi yaa ka yiri Efirayimu cɛnlɛ woolo pe kɔrɔgɔ paa jara yɛn,
mbe yiri Zhuda tara woolo pe kɔrɔgɔ paa jara yirifɔnŋɔ yɛn.
Mi jate mi yaa ka gboro ti pye,
mbe si kari na kagboro ti ni.
Mi yaa kari ti ni lere kpɛ se ya mberi shɔ na yeri.
15 Kona mi yaa yiri mbe kari mbe sɔngɔrɔ wa na cɛnsaga,
fɔ pe ka saga jɛn fɔ pe yɛn kajɔɔgɔ pyefɛnnɛ mbe sɔngɔrɔ mbanla lagaja.
Jɔlɔgɔ ki ka ka gbɔgɔ pe na, pe yaa kanla lagaja.