19
Zhɔbu wi yɔn sogomɔ:
Wì yo Yɛnŋɛlɛ lo li yaa kaa go shɔ
1 Kona, a Zhɔbu wì si Bilidadi wi yɔn sogo ma yo fɔ:
2 Ye yɛn nala nawa pi tanga na na yɛgɛ ŋga na,
konaa nala sugulo ye sɛnrɛ ti ni yɛgɛ ŋga na, ye yaa koro mbaa ki piin ma fɔ sa gbɔn wagati wiwiin?
3 Wele, yànla tɛgɛlɛ yɔnlɔ lɛgɛrɛ na!
Naa yaa na jɔlɔ yɛɛn, ki fɛrɛ woro ye na wi le?
4 Ali na kaa pye kaselege yi mì puŋgo,
ki puŋguwɔ pi yɛn mi nuŋgba go kala.
5 Ɛɛn fɔ na kaa pye yaa jaa mbege naga fɔ ye mbɔnrɔ na na,
mbe koro mbaa na jɛrɛgi na tifagawa kala li wogo na,
6 kona ye daga mbege jɛn fɔ Yɛnŋɛlɛ lo jate lìlan wogo ki pɛn,
lo lìlan yigi wa li mɛrɛ ti ni.
7 Ali na mi ka jɔrɔgɔ mbe yo fɔ: «Pe yɛn nala jɔlɔ,»
lere woro wa mbanla yɔn sogo.
Na mi ka yeri mbe yo panla shɔ,
lere na ta mbanla tanga ki yo.
8 Yɛnŋɛlɛ lì konɔ li tɔn na na, mi se ya toro,
lì diwi le wa na torokonɔ li ni.
9 Lìlan gbɔgɔwɔ pi shɔ na yeri,
mala wunluwɔ njala li kɔw wa na go na.
10 Lìlan jɔgɔ kɛɛ ki ni fuun ki na, mbanla wogo ki kɔ;
lìlan jigi tagasaga ki kɔ na yeri paa pe ma kaa tige kɔw we.
11 Lì nawa ŋgban na ni fɔ jɛŋgɛ,
mala pye paa li jugu wa yɛn.
12 Li maliŋgbɔɔnlɔ ŋgbeleye yì pinlɛ na paan,
pè konɔ yɛngɛ fɔ ma pan ma gbɔn laga na na;
pè pe cɛnsaga ki kan mala paraga go ki maga.
13 Lìlan sefɛnnɛ pe laga lali na ni,
na jɛnfɛnnɛ pè laga na na.
14 Mbele pè yɔngɔ na ni, pè laga na na,
na wɔnlɔŋgbaala pè fɛgɛ na na.
15 Na laga woolo poro naa na tunmbyeele jɛɛlɛ pe ni, paa na piin paa nambanŋa yɛn;
mì pye pe yeri paa letelewe yɛn.
16 Mi mala tunmbyee wi yeri, wila shɔ na yeri;
ali na mi kaa yɛnri ŋgbanga o.
17 Na nuwɔ pì la kɔ na jɔ wi na,
na la kì kɔ na piile pe na.
18 Ali yɛrɛ piile pe yɛn nala tifaga,
na mi ka yiri, pe maa tɛgɛ na na.
19 Mbele mìla pye na wɔnlɔŋgbaala, mì pye pe yeri yaritijaanga;
mbele pe kala làa na ndanla, pè yiri na kɔrɔgɔ.
20 Mì cɔgɔ fɔ a na kajeere tì yiri funwa na;
kì koro jɛnri mi se jɛn naga go li.
21 Yanla yinriwɛ ta, na wɛnnɛ, yanla yinriwɛ ta,
katugu Yɛnŋɛlɛ li kɛɛ kì gbɔn na na!
22 Yiŋgi na yoro fun ye nɛɛ na jɔlɔ paa Yɛnŋɛlɛ li yɛn?
Na jɔlɔgɔ ŋga yaa jɔlɔ ki fa ye yɛnlɛ tin bere?
23 E, ndɛɛ na sɛnrɛ peri yɔnlɔgɔ, ki jɛn na tanla na ni!
Ndɛɛ pe mbe ja ya mberi yɔnlɔgɔ sɛwɛ wa ni!
24 Ndɛɛ ki pye pe mbe ja ya mberi keregi keregi walaga ki na
tugurɔn wanga konaa sunmu ni,
jaŋgo ti koro wa fɔ sanga pyew!
25 Ɛɛn fɔ, mi wo na, mìgi jɛn ma yo na go shɔfɔ wi yɛn yinwege na,
wo wi yaa ka pye puŋgofɔ mbe yiri mboo yɛɛ naga laga tara ti na.
26 Ali na na wire ti ka jɔgɔ sa kɔ,
mi jate mi yaa ka Yɛnŋɛlɛ li yan yɛnlɛ ni.
27 Mi jate mi yaa ka li yan,
na yɛngɛlɛ ke yaa ka li yan, ki se ka pye lere wa yɛgɛ yɛngɛlɛ ni;
mi yɛn naga wagati wi singi ma saa jori wi kala.
28 Yoro mbele ye yɛn naga yuun fɔ: «We yaa taga wi na mbaa wi puro mɛlɛ san?
Yiŋgi kala we yaa yan wi na, mbe ta mboo kiti?»
29 Yaa fyɛ tokobi wi yɛgɛ, wiga ka gbɔn ye na,
katugu yege ŋgban na na yɛgɛ ŋga na, ki mbe ya mbe tokobi kunwɔ kan ye yeri,
kona ye yaa ki jɛn fɔ kiti kɔngɔ yɛn na ye singi.