2
Yawe Yɛnŋɛlɛ li pilige kì yɔngɔ
1 Ye mbanlaga ki win wa Siyɔn ca,
yege magala li yirige ŋgbanga wa na yanwiga kpoyi ki na.
Tara woolo pe ni fuun pe yɛn na seri, katugu Yawe Yɛnŋɛlɛ li pilige ki yɛn na paan; kì yɔngɔ.
2 Ki yaa ka pye wɔwɔ naa diwi pilige,
kambaara naa diwi wɔlɔ pilige,
ki yɛn na paan
paa yɛgɛ ŋga na lalaaga ma kaa na paan yanwira na we.
Maliŋgbɔɔnlɔ fanŋga fɛnnɛ yɛn na paan wa, mbele pe se ya jiri.
Pe cɛnlɛ la fa yan ma faa,
pe cɛnlɛ la se si ka yan ma naa fyew.
3 Pe maa jɔgɔwɔ piin wa pe yɛɛ yɛgɛ na kee paa kasɔn yɛn,
na jɔgɔwɔ piin wa pe yɛɛ puŋgo na kee paa kasɔn yinnɛ yɛn.
Sanni pe sa pan, tara tìla pye ma yɔn wa pe yɛgɛ, paa Edɛn naŋgɔ kɔlɔgɔ tiyɔngɔ ki yɛn,
ɛɛn fɔ pe toroŋgɔlɔ, tara tì koro paa gbinri yɛn, ŋa pè jɔgɔ,
yaraga ko ka kpɛ si shɔ pe yeri.
4 Maga pe yan, pe yɛn paa shɔnye yɛn,
pe yɛn na fee paa shɔnye mbele na malaga gbɔnwotoroye tilele.
5 Pe yɛn na tinni paa malaga gbɔnwotoroye yɛn, mbele pe yɛn na yeni wa yanwira ti go na.
Pe yɛn na tinni
paa kasɔn yinnɛ yɛn, na li yɛn na yan waga sori.
Pe yɛn na paan paa maliŋgbɔɔnlɔ ŋgbelege fanŋga wogo yɛn, ŋga kì yere malinjɛ na.
6 Cɛngɛlɛ ke ni fuun ke yɛn na seri fyɛrɛ ti na,
ke yɛgɛ cɛnwɛ pì kanŋga ma filige fyɛrɛ ti na.
7 Pe yɛn na gbinri paa maliŋgbɔɔnlɔ wɛlimbɛlɛ yɛn.
Pe yɛn na nuru wa malaga sigembogo ki na paa maliŋgbɔɔnlɔ yɛn.
Pe ni fuun nuŋgba nuŋgba pè sin na kee pe konɔ li ni,
wa kpɛ si kɛ mbe wɔ wa wi konɔ li ni.
8 Wa kpɛ woro na wa wɔnrɔgi,
pe ni fuun nuŋgba nuŋgba pè sin na kee pe konɔ li ni.
Pe yɛn na gbinri na tooro maliŋgbɔnyaara ti go na;
yaraga ka kpɛ se ya mbe pe yerege.
9 Pe yɛn na gbinri na tinri ca ki na,
na nuru malaga sigembogo ki na,
na nuru yinrɛ ti na,
na yiin wa fenɛtiriye pe ni ndɛɛ yoolo wɛlɛ.
10 Tara ti yɛn na yɛgɛ wa pe yɛgɛ,
naayeri wi yɛn na seri,
yɔnlɔ ko naa yeŋge ki ni, tì kanŋga diwi,
wɔnŋgɔlɔ ke woro na yanwa yinrigi.
11 Yawe Yɛnŋɛlɛ li yɛn nali magala li yinrigi wa li maliŋgbɔɔnlɔ ŋgbelege ki yɛgɛ,
mà jɛn li maliŋgbɔɔnlɔ ŋgbelege kì gbɔgɔ fɔ jɛŋgɛ.
Ŋa wi yɛn na tanri li sɛnyoro ti na, wi yɛn fanŋga ni,
mà jɛn Yawe Yɛnŋɛlɛ li pilige ki yɛn piligbɔgɔ, fyɛrɛ gbɔrɔ pilige yi.
Ambɔ wi mbe ya yere mbege sige?
Yɛnŋɛlɛ li yɛn nali woolo pe yinri
pe pan li kɔrɔgɔ
12 Yawe Yɛnŋɛlɛ lì yo naa fɔ:
«Ali mbe pan mbe gbɔn wagati ŋa wi na bere,
ye sɔngɔrɔ ye pan na kɔrɔgɔ ye kotogo ki ni fuun ni.
Ye yeŋge le, yaa gbele konaa ye pye yɛsanga ni.»
13 Sanni ye sa ye yaripɔrɔ to walagi yɛsanga ki kala,
ye ye jatere wo kanŋga.
Ye sɔngɔrɔ ye pan Yawe Yɛnŋɛlɛ, ye Yɛnŋɛlɛ li kɔrɔgɔ,
mà jɛn li yɛn yuŋgbɔgɔrɔ tafɔ, naa leele yinriwɛ tafɔ;
laa la nawa ŋgbanni jaga jaga,
li kagbaraga ki yɛn ma gbɔgɔ.
Li ka jɔlɔgɔ wa mbele na, li ma pe kala yaga.
14 Ambɔ ki jɛn na kaa pye Yawe Yɛnŋɛlɛ, ye Yɛnŋɛlɛ lì se yɔn sɔngɔrɔ,
mbeli jatere wi kanŋga,
mbe duwaw ye na,
jaŋgo paa paan yarikanra naa duvɛn saara nda pe ma wo ti ni li kan?
15 Ye mbanlaga ki win wa Siyɔn ca,
yege yari fɔ pe yeŋge le,
ye gbogolomɔ gbɔɔ pye mbe Yɛnŋɛlɛ li gbɔgɔ.
16 Ye leele pe gbogolo,
ye janwa wi gbogolo mbe Yɛnŋɛlɛ li gbɔgɔ,
ye lelɛɛlɛ pe gbogolo,
ye piile pe gbogolo, ali piyɛngɛlɛ ŋgele ke yɛn na wɔnri o.
Japɔlɔ wi yiri wa jayire go ki ni,
pijɔ wi yiri wa pijɔ go ki ni.
17 Saraga wɔfɛnnɛ mbele paa tunŋgo piin Yawe Yɛnŋɛlɛ li kan,
pe yɛn na gbele wa ndɔgɔrɔ to naa saraga wɔsaga ti sɔgɔwɔ pi ni.
Paa ki yuun fɔ:
«E, Yawe Yɛnŋɛlɛ, ma woolo pe yinriwɛ ta;
poro mbele pe yɛn ma kɔrɔgɔ ye, maga ka ti fɛrɛ mbe pe ta;
maga ka ti cɛngɛlɛ sanŋgala kaa tɛgɛ pe na.
Mɛlɛ pe sila ki yuun wa cɛngɛlɛ sanŋgala ke sɔgɔwɔ fɔ:
‹Pe Yɛnŋɛlɛ li yɛn se yeri?› »
Yɛnŋɛlɛ làa li woolo
pe yɔn sogo
18 Yawe Yɛnŋɛlɛ li tara tìli ndanla fɔ jɛŋgɛ,
li woolo pe yinriwɛ lì ta.
19 Yawe Yɛnŋɛlɛ lìli woolo pe yɔn sogo ma yo fɔ:
«Ye wele, mi yaa yarilire, naa duvɛn fɔnŋɔ konaa sinmɛ kan ye yeri,
ti yaa ye bɔ fɔ jɛŋgɛ.
Mi se ti ye tifaga naa cɛngɛlɛ ke sɔgɔwɔ.
20 Ye juguye mbele pè yiri wa yɔnlɔparawa kamɛŋgɛ kɛɛ ki yeri na paan,
mi yaa pe laga lali ye ni,
mi yaa pe purɔ mbe kari pe ni tara nda tì waga ma pye lere woro wa ti ni ta ni.
Mi yaa pe maliŋgbɔɔnlɔ ŋgbelege ŋga wa yɛgɛ ki wa wa kɔgɔje kuwo wi ni,
mbe pe maliŋgbɔɔnlɔ ŋgbelege ŋga wa puŋgo na ki wa wa Mediterane kɔgɔje wi ni.
Pè gboolo pe yaa ka fɔngɔ la lugo,
pe nuwɔ pi yaa ka jaraga mbe laga ki shɔ, katugu pè kagbɔgɔlɔ pye ma ye jɔlɔ.»
21 Mboro tara,
maga ka fyɛ.
Ta yɔgɔri, ma yin nayinmɛ ni,
katugu Yawe Yɛnŋɛlɛ lì kagbɔgɔlɔ pye.
22 Woŋgaala, yaga ka fyɛ,
katugu naniwɛ mba wa gbinri wi ni pi yɛn na yinrigi.
Tire ti yɛn na sɛni.
Figiye tire naa ɛrɛzɛn tiire ti yɛn na pire lɛgɛrɛ sɛni.
23 Yoro Siyɔn ca woolo, yaa yɔgɔri ye yin nayinmɛ ni Yawe Yɛnŋɛlɛ, ye Yɛnŋɛlɛ li kala na,
katugu lì tisaga ki kan ye yeri ma yala ki kansanga wi ni.
Lì tisara koŋgbannda naa tisara puŋgo woro ti kan ye yeri, mari lɛgɛ paa yɛgɛ ŋga na kìla pye faa we.
24 Yarilire sunsara ti yaa yin yarilire ti ni.
Kopɛrɛ ti yaa yin la wuun duvɛn fɔnŋɔ naa sinmɛ liwoo pi ni.
25 Na maliŋgbɔɔnlɔ lɛgɛrɛ mbele mìla wa ye na,
poro mbele pe yɛn gbatɔ, naa kambɛɛrɛ, naa kambɛɛrɛ tugbɔɔrɔ konaa kondo wi ni,
yɛgɛlɛ ŋgele pàa ki yarilire ti ka,
mi yaa ki yarilire ti yɔngɔ sɔngɔrɔ ye na.
26 Ye yaa kaa kaa mbaa tinni.
Ye yaa kaa Yawe Yɛnŋɛlɛ, ye Yɛnŋɛlɛ li mɛgɛ ki sɔnni,
lo na lì kagbɔgɔlɔ pye ye kan.
Na woolo pe se ka fɛrɛ shɔ naa fyew.
27 Pa kona ye yaa ki jɛn fɔ mi yɛn wa yoro Izirayɛli woolo ye sɔgɔwɔ,
fɔ muwi mi yɛn Yawe Yɛnŋɛlɛ, ye Yɛnŋɛlɛ le,
fɔ Yɛnŋɛlɛ la yɛgɛ woro wa naa mi puŋgo na.
Na woolo pe se ka fɛrɛ shɔ naa fyew.