6
Zheruzalɛmu ca juguye pe pan
maga maga, maga fili
1 «Yoro Bɛnzhamɛ cɛnlɛ woolo, ye fe ye yiri wa Zheruzalɛmu ca ki ni.
Ye mbanlaga ki win wa Tekowa ca.
Ye wirige ka yirige paa kacɛn yɛn wa Bɛti Hakɛrɛmu ca;
katugu jɔlɔgɔ naa jɔgɔwɔ gbɔɔ pà yiri wa yɔnlɔparawa kamɛŋgɛ kɛɛ yeri na paan.
2 Siyɔn ca tiyɔngɔ naa ki mɛgɛ, ko ŋga ki yɛn dɛŋgɛ ni,
mi yaa ki tɔngɔ yɛɛn pew.
3 Leele pele yɛn na paan ca ki mɛgɛ ni paa simbaala kɔnrifɛnnɛ yɛn, naa pe simbaŋgbeleye ni.
Pè pe maliŋgbɔɔnlɔ paara yinrɛ ti kan maga maga;
pe ni fuun nuŋgba nuŋgba pe simbaala pe yɛn na pe tasaga yan ki kaa.
4 Pe yɛn na yuun fɔ: ‹Ye ye yɛɛ gbɛgɛlɛ ye sa to ca ki na!
Ye yiri we sa to ki na yɔnlɔ fuŋgbanga na!
E, jɔlɔgɔ yɛn we wogo, katugu yɔnlɔ kila tuun makɔ,
yinmɛ pila tuun tara.
5 Ye yiri we sa to pe na yembinɛ,
we pe wunluwɔ yinrɛ ti jaanri.› »
6 Yawe Yɛnŋɛlɛ na yawa pi ni fuun fɔ, pa lì yo yɛɛn fɔ:
«Ye tire kɔn ye lugusara gbegele Zheruzalɛmu ca ki na.
Ca kayi ŋga ki daga jɔlɔgɔ mbe to ki na;
lewɛlɛwɛ kapyere to ti yɛn na piin wa ki ni.
7 Pulugo tɔnmɔ maa pulo na yinrigi yɛgɛ ŋga na,
pa ki ca ki tipere ti maa pulo ma.
Lewɛlɛwɛ kapyere naa jɔgɔwɔ kapyere to cɛ ti yɛn na piin wa ki ni.
Jɔlɔgɔ naa tege ki yɛn na yɛgɛ sɔgɔwɔ sanga pyew.
8 «Zheruzalɛmu ca woolo, ye yɛnlɛ na yɛrɛwɛ sɛnrɛ ti na,
nakoma mi yaa na yɛɛ laga ye na,
mi yaa Zheruzalɛmu ca ki kanŋga mbege pye laga ŋga ki yɛn waga,
laga ŋga lere se ya cɛn wa ki ni.»
Izirayɛli woolo pè je
mbe logo Yɛnŋɛlɛ li yeri
9 Yawe Yɛnŋɛlɛ na yawa pi ni fuun fɔ, pa lì yo yɛɛn fɔ:
«Izirayɛli woolo sanmbala mbele pè koro go na,
ye pe wulowulo pyew paa yɛgɛ ŋga na pe ma kaa ɛrɛzɛn pire cɔ pew we;
ko puŋgo na, ye sɔngɔrɔ yeri san paa yɛgɛ ŋga na ɛrɛzɛn pire cɔfɔ wi ma kaa ɛrɛzɛn tiire ti san we.»
10 Mi yaa para ambɔ ni?
Ambɔ mi yaa yɛrɛwɛ kan wi yeri wi logo na yeri?
Wele, pe nuŋgbogolo kè jili pe na,
pe se ya jatere tɛgɛ na sɛnrɛ ti yeri.
Yawe Yɛnŋɛlɛ li sɛnrɛ ti pye pe yeri tifagawa yaraga,
pe woro na tanwa kpɛ yaan wa ti ni.
11 Na nawa pì yin na na Yawe Yɛnŋɛlɛ li naŋgbanwa pi ni,
mi se ya mboo kun na yɛɛ ni naa.
Yɛnŋɛlɛ, ma naŋgbanwa kala li wa piile pe na wa ca nawa koŋgolo ke ni,
konaa lefɔnmbɔlɔ mbele pè gbogolo pe na.
Pe yaa ka ki naŋgbanwa kala li wa naŋa wo naa jɛlɛ wi na,
naa lelɛɛlɛ poro naa lelɛŋgbaŋgala ke na.
12 Pe yinrɛ ti yaa ka pye leele pele yɛgɛ woro,
naa pe kɛɛrɛ konaa pe jɛɛlɛ pe ni;
katugu mi yaa kɛɛ wa ki tara nda ti woolo pe na.
Yawe Yɛnŋɛlɛ lo lì yo ma.
13 Mbege lɛ piile pe na mbe saga wa lelɛɛlɛ pe na,
pe ni fuun pe yɛɛra tɔnli wo pe yɛn na jaa;
mbege lɛ Yɛnŋɛlɛ yɔn sɛnrɛ yofɛnnɛ pe na mbe saga wa saraga wɔfɛnnɛ pe na,
pe ni fuun pe yɛn yagbogolo yofɛnnɛ.
14 Pe woro na yɛgɛ teri na woolo pe yama wogo ki yeri,
mbe pe wɛrɛ pye tiyɔngɔ.
Pe yɛn naga yuun wi cɛ fɔ: «Yɛyinŋge pan, yɛyinŋge pan!»
Ma si yala, yɛyinŋge woro wa.
15 Naga yɛn ma, fɛrɛ pe yigi pe katijangara nda pè pye ti kala na wi le?
Ayoo, ali yɛrɛ fɛrɛ yana lo si pe yigi,
pee fɛrɛ jɛn naa.
Ki kala na, pe yaa ka to mbe tɔngɔ,
mbe pinlɛ mbele pe yaa ka to mbe tɔngɔ pe ni.
Na mi ka ka jɔlɔgɔ wa pe na sanga ŋa ni,
pe yaa ka kurugo mbe to.
Yawe Yɛnŋɛlɛ lo lì yo ma.
16 Pa Yawe Yɛnŋɛlɛ lì yo yɛɛn fɔ: «Ye sa yere wa koŋgolo ke na, ye welewele!
Ye yewe kolɛgɛlɛ ke wogo na,
ye konɔ jɛnnɛ li lagaja yaa tanri li na.
Pa kona ye yaa yɛyinŋge ta.»
Ɛɛn fɔ, a yè sho fɔ: «We se tanga ki konɔ li na.»
17 «Kona, a mì si kɔrɔsiri pyefɛnnɛ tɛgɛ wa ye sɔgɔwɔ paa ye yɛrɛgi,
yaa nuŋgbolo jaan mbanlaga magala li yeri.
Ɛɛn fɔ, a yè sho fɔ: ‹We se logo li yeri!›
18 ‹Ki kala na, cɛngɛlɛ woolo, ye nuŋgbolo jan ye logo!
Yoro janwa woolo, yege jɛn ye wali ki na, kala na li yaa ka pe ta we.
19 Tara woolo, yege sɛnrɛ nda ti logo!
Mi yaa jɔlɔgɔ gbɔgɔ wa ki leele mbele pe na;
ko ki yɛn pe jatere pere tɔnli we;
katugu pee yɛnlɛ mbanla sɛnrɛ ti jate,
pè je na lasiri sɛnrɛ ti na.
20 Wusuna nuwɔ taan ŋa wì yiri wa Saba tara, mi yaa yiŋgi pye wo ni?
Gbagara kanŋgirɛ nuwɔ taan woro nda tì yiri wa taleere ti ni, mi yaa yiŋgi pye to ni?
Ye saara sogoworo ti silan ndanla;
ye yaayoro saara ti la woro na na.› »
21 Ki kala na, pa Yawe Yɛnŋɛlɛ lì yo yɛɛn fɔ:
«Ye wele, mi yaa kurugo yaraga tɛgɛ wa konɔ, wa ki leele mbele pe yɛgɛ pe kurugo ki na;
teele naa piile pe yaa kurugo ki na,
pe cɛnyɛɛnlɛ naa pe wɛnnɛ pe yaa kurugo ki na,
pe ni fuun pe yaa ka tɔngɔ.»
Izirayɛli woolo pe juguye
pe yɛn na paan
22 Pa Yawe Yɛnŋɛlɛ lì yo yɛɛn fɔ: «Ye wele, cɛnlɛ là yiri wa yɔnlɔparawa kamɛŋgɛ kɛɛ tara ti yeri na paan,
cɛnlɛ gbenɛ la na yinrigi fɔ wa tara ti kɔsaga ki na na paan.
23 Sandira naa njaanra yɛn pe kɛɛ, pèri yirige.
Pe yɛn lewɛlimbɛlɛ, paa lere yinriwɛ ta.
Pe tinmɛ pi yɛn paa kɔgɔje tinmɛ yɛn,
pe yɛn ma lugu shɔnye na.
Pè gbɛgɛlɛ malaga ki na paa lere nuŋgba yɛn,
mbe pan mbe malaga gbɔn mboro Siyɔn ca ma ni.»
24 «Naa wège sɛnrɛ ti logo,
a we wire tì si fanla we na;
we sunndo wì kɔn we na,
a waa jɔlɔ paa jɛlɛ selara ma kaa yiri wi ni we.
25 Yaga ka yiri mbe kari wa wasege ki ni dɛ,
yaga ka kari wa koŋgolo ke ni dɛ;
katugu juguye pe yɛn wa, tokobiye pe yɛn pe kɛɛ,
sunndo kɔngɔ ki yɛn kɛɛ ki ni fuun ki na.»
26 «Na woolo, ye jatere piriwɛn yaripɔrɔ le ye yɛɛ na,
yaa koŋgi wa cɔnrɔ ti ni yɛsanga ki kala na.
Yaa gbele paa yɛgɛ ŋga na lere ma kaa na wi pinambyɔ nuŋgba kunwɔ gbele we;
yaa gbele yaa yuŋgbɔgɔrɔ sɛnlɛgɛrɛ yuun,
katugu jɔgɔwɔ pyefɔ wi yaa ka pan mbe fo mbe to ye na.»
Izirayɛli woolo
pe jatere wi se ya kanŋga
27 «Zheremi, mɔ̀ɔ tɛgɛ wa na woolo pe sɔgɔwɔ paa fɛnlɛ yɛn, ŋa wì ma tugurɔn ti sɛgɛsɛgɛ ma wele;
jaŋgo ma pe sɛgɛsɛgɛ ma pe tangalɔmɔ pi jɛn.
28 Pe ni fuun pe yɛn leele mbele pè yiri ma je konaa nuŋgboŋgbanla fɛnnɛ,
pe yɛn leele mɛgɛ jɔgɔfɛnnɛ;
pe kotoro tì ŋgban pe na paa tuguyɛnrɛ naa tuguwɔrɔ yɛn,
pe ni fuun pe yɛn jɔgɔwɔ pyefɛnnɛ.
29 Fɛnlɛnaŋa wi fugufugu wi ma kasɔn ki fɛ jɛŋgɛ,
kasɔn ki ma sunmu wi sogo mboo yan;
ɛɛn fɔ wi maa wi yɛɛ tege jaga, ma yo fɔ wi yaa tugurɔn ti yan mberi fire ti wɔ ti ni,
katugu fire ti se ya wɔ ti ni.
30 Pe yaa kaa ki leele pe yinri warifuwe ŋa wi yɛn tɔnli fu,
katugu Yawe Yɛnŋɛlɛ li je pe na.»