8
1 Yawe Yɛnŋɛlɛ lo lì yo ma fɔ: «Ko sanga wo ni, pe yaa ka Zhuda tara wunlumbolo pe kajeere ti wɔ wa fanra ti ni, naa tara teele pe woro ti ni, naa saraga wɔfɛnnɛ pe woro ti ni, naa Yɛnŋɛlɛ yɔn sɛnrɛ yofɛnnɛ pe woro ti ni konaa Zheruzalɛmu ca woolo pe woro ti ni.
2 Pe yaa ka ki kajeere ti jaraga yɔnlɔ naa yeŋge konaa wɔnŋgɔlɔ ke ni fuun ke yɛgɛ sɔgɔwɔ; katugu ko yaara to tìla pe ndanla, a paa saara woo ti yeri, ma taga ti na, na jɛlɛ ti yeri konaa nari gbogo. Lere se ka ta mbe ki kajeere ti wɔ mberi le fanga ni naa; ti yaa ka pye fyɔngɔ wa tara ti na.
3 Mi yaa ka ki lepeele mbele pe purɔ mbe kari pe ni laga o laga ŋga ni, sanmbala mbele fuun pe yaa ka koro go na pe ni, kunwɔ po yaa ka mbɔnrɔ pe yeri mbe wɛ yinwege ko na. Yawe Yɛnŋɛlɛ na yawa pi ni fuun fɔ lo lì yo ma.»
Yɛnŋɛlɛ li yaa ka jɔlɔgɔ wa
li woolo pe na pe kapere ti kala na
4 «Ki yo ki leele mbele pe kan fɔ Yawe Yɛnŋɛlɛ pa lì yo yɛɛn fɔ:
‹Naga yɛn ma, na lere ka to wila yiri naa wi le?
Naga yɛn ma, na lere ka puŋgo mbe konɔ li wa, wila sɔngɔrɔ wa li ni naa wi le?
5 Yiŋgi na Zheruzalɛmu ca woolo pè si yiri ma je,
ma koro wa pe mbasinmɛ pi ni sanga pyew?
Yiŋgi na pè si koro na kee yɛgɛ wa pe kombele li ni,
ma je mbe sɔngɔrɔ mbe pan mi ŋa pe Yɛnŋɛlɛ na kɔrɔgɔ?›
6 Mì nuŋgbolo jan ma logo pe yeri,
pe woro na sɛnsinnde yuun.
Wa kpɛ suu tipere ti yaga mbe yo fɔ:
‹Yiŋgi mì pye yɛɛn?›
Pe ni fuun pe yɛn na fee na kee yɛgɛ go fu,
paa yɛgɛ ŋga na shɔn ma kaa na gbinri na kee malaga na we.
7 Ali yɛrɛ jagapan mboo ta wa naayeri, wuu pansanga wi jɛn;
ketenɛ, naa ndinɛ konaa kunaagbɛ wi ni, pè pe sɔngɔrɔsanga wi jɛn.
Ɛɛn fɔ na woolo poro na, pee mi ŋa Yawe Yɛnŋɛlɛ na kakɔnndɛgɛŋgɛlɛ ke jɛn.»
8 «Mɛlɛ ye ma sila ye yɛɛ piin ma yo fɔ:
‹We yɛn kajɛnmbɛlɛ, Yawe Yɛnŋɛlɛ li lasiri wi yɛn we yeri?
Ma si yala, kaselege ko na, lasiri sɛwɛ jɛnfɛnnɛ pe sɛwɛ yɔnlɔgɔ kanŋgagala, yagbogowo sɛnrɛ ke maa yɔnlɔgi;
pè lasiri sɛnrɛ ti kanŋga mari pye yagbogowo sɛnrɛ.
9 Kajɛnmbɛlɛ pè fɛrɛ shɔ,
pe sunndo wila kɔɔn pe na, pɛnɛ pe yigi,
katugu pè Yawe Yɛnŋɛlɛ li sɛnrɛ ti tifaga.
Naga yɛn ma, pe kajɛnmɛ pi yɛn se yeri?› »
10 We Fɔ wì yo fɔ: «Mi yaa pe jɛɛlɛ pe kan nambala pele yɛgɛ yeri,
mbe pe kɛɛrɛ ti kan ti shɔfɛnnɛ pe yeri;
katugu mbege lɛ piile jɛɛlɛ jɛɛlɛ pe na mbe saga wa lelɛɛlɛ pe na,
pe ni fuun pe yɛɛra tɔnli wo pe yɛn na jaa;
mbege lɛ Yɛnŋɛlɛ yɔn sɛnrɛ yofɛnnɛ pe na mbe saga wa saraga wɔfɛnnɛ pe na,
pe ni fuun pe yɛn yagbogolo yofɛnnɛ.
11 Pe woro na yɛgɛ teri na woolo pe yama wogo ki yeri
mbe pe wɛrɛ pye tiyɔngɔ.
Pe maa ki yuun wi cɛ ma yo fɔ: ‹Yɛyinŋge pan! Yɛyinŋge pan!›
Ma si yala yɛyinŋge woro wa.
12 Naga yɛn ma, fɛrɛ pe yigi pe katijangara nda pè pye ti kala na wi le?
Ayoo, ali yɛrɛ fɛrɛ yanna lo si pe yigi,
pee fɛrɛ jɛn naa.
Ki kala na, pe yaa ka to mbe tɔngɔ
mbe pinlɛ mbele pe yaa ka to mbe tɔngɔ pe ni,
na mi ka ka jɔlɔgɔ wa pe na sanga ŋa ni,
pe yaa ka kurugo mbe to.
Yawe Yɛnŋɛlɛ lo lì yo ma.»
13 Yawe Yɛnŋɛlɛ lo lì yo ma fɔ:
«Mi yɛn na jaa mbe kɔ pe ni pew.
Ɛrɛzɛn pire kpɛ se ka yan ɛrɛzɛn tiire na naa,
figiye tige pire kpɛ se ka yan figiye tire na naa.
Ti wɛrɛ ti yaa ka fanla;
yaraga ŋga mìla kan pe yeri, mi yaa kaga shɔ pe yeri.»
14 «Yiŋgi na we si koro we cɛn laga nuŋgba?
Ye pan we gbogolo we kari malaga sigecara ta ni we sa ku wa,
katugu Yawe Yɛnŋɛlɛ li yɛn na jaa mbe we gbo;
lì shɔnrɔ tɔnmɔ kan we yeri ma yo woo wɔ,
katugu wè kapege pye Yawe Yɛnŋɛlɛ li na.
15 We jigi wìla pye mbe yɛyinŋge ta, ɛɛn fɔ we si yaraga kpɛ yan;
we jigi wìla pye we jɔlɔgɔ ki kɔwɔ po na, ɛɛn fɔ sunndo kɔngɔ ki yɛn we na.
16 Pe yɛn na juguye pe shɔnye pe tinmɛ pi nuru na yinrigi wa Dan tara ti kɛɛ yeri,
pe shɔnye nambala pe gbelege ki yɛn na tara ti ni fuun ti tigile.
Pe yɛn na paan na tara to naa ti nawa yaara ti ni fuun ti nii,
konaa cara to naa mbele pe yɛn ma cɛn wa ti ni pe ni.»
17 Yawe Yɛnŋɛlɛ lo lì yo ma fɔ: «Ye wele, mi yaa wɔɔrɔ pere yirige mbe wa ye na,
nda lere se ya mbe jɛnmɛ pye mberi yigi;
ti yaa kaa ye nɔɔri.»
Yɛnŋɛlɛ li woolo pe kapyere
tìla Zheremi wi nawa pi tanga
wi na
18 E, na nawa mba pì tanga, wɛrɛ se ta mbege kɔ,
na jatere wì piri na na fɔ jɛŋgɛ.
19 Ye wele, mi yɛn nala woolo pe gbeere ti nuru
na yinrigi taleere ta ni na sagafɔ jaa.
Naga yɛn ma, Yawe Yɛnŋɛlɛ li woro wa Siyɔn ca ki ni naa wi le?
Siyɔn ca ki wunlunaŋa wi woro wa ca ki ni wi le?
Yɛnŋɛlɛ lì yo fɔ: «Yiŋgi na, a pè silan nawa pi ŋgban pe yaara yanlɛrɛ nda paa gbogo ti ni,
ki yarisunndo go fu woro nda ti yɛn cɛngɛlɛ kele yɛgɛ woro ti ni?»
20 Zheremi wì yo fɔ: «Yarilire kɔnsanga wì toro makɔ, yɔnrɔ tì kɔ,
ɛɛn fɔ ali ma pan ma gbɔn, we fa shɔ gbɛn!»
21 Jɔlɔgɔ ŋga kì to na woolo pe na, ki yɛn nala jɔlɔ wa na kotogo na fɔ jɛŋgɛ;
yɛsanga gbɔn na na, sunndo kɔngɔ na ta.
22 Naga yɛn ma, wɛrɛ faworo woro wa Galaadi tara ti ni wi le?
Wɛrɛ pyefɔ woro wa naa wi le?
Yiŋgi na, na woolo pe yama pi si woro na koo?
23 E, ndɛɛ ki pye na go ki ja kanŋga ma pye lɔgɔ,
ndɛɛ ki pye na yɛngɛlɛ ke ja kanŋga ma pye pulugo ma yin yɛntunwɔ ni,
mi jɛn naa gbele yɔnlɔ naa yembinɛ,
na woolo pe gbogo ki kala na.