5
Yɛnŋɛlɛ, ki yaga we sɔngɔrɔ
we pan ma kɔrɔgɔ
1 E, Yawe Yɛnŋɛlɛ, ma jatere wi tɛgɛ ŋga kì pye we na ki na,
fɛrɛ nda tì we ta ti wele mari yan!
2 We kɔrɔgɔ kì sɔngɔrɔ ma pye cɛngɛlɛ kele yɛgɛ wogo,
we yinrɛ tì sɔngɔrɔ ma pye letelewele pele yɛgɛ woro.
3 Wè pye pijiriwele, to woro we na;
we nɛɛlɛ pè pye paa naŋgunjaala yɛn.
4 We yɛn na we tɔnwɔɔ pi loo penjara ni,
kanŋgirɛ nda we maa sori ti na, we maa ti loo.
5 We jɔlɔfɛnnɛ pe yɛn we puŋgo na suyi,
wè te pe se wogosaga yaga we kan.
6 Ezhipiti tara fɛnnɛ konaa Asiri tara fɛnnɛ pe ni, poro we ma kɛɛ sanga na tali pe yeri,
jaŋgo mbe we yɔn suro ti ta mbe li mbe tin.
7 We tɛlɛye pàa kambasinnde pye, pe si woro wa nala;
pe kajɔgɔrɔ ti go kala lì to woro na.
8 Kulolo poro pè cɛn we go na,
lere kpɛ woro wa mbe we shɔ pe kɛɛ.
9 We yɛn na we go ki pɛrɛ na we yɔn suro ti jaa,
katugu beŋganri pyefɛnnɛ pe yɛn na tuun we na ti jasaga wa gbinri wi ni.
10 Fuŋgo kì ŋgban we na, ma we wire ti wɛri we na,
ndɛɛ we yɛn yira kasɔn ni.
11 Pe yɛn na tuun Siyɔn ca jɛɛlɛ pe na na sinlɛ pe ni fanŋga,
na tuun Zhuda tara sumbonɔ pe na, na sinlɛ pe ni fanŋga.
12 Pàa we tara teele pele to tire na ma pe gbo,
pe sila lelɛŋgbaara ti jate.
13 Lefɔnmbɔlɔ poro pàa pye na tira sinndɛlɛgɛ ki tungu,
lenambiile poro pàa pye na kanŋgepɔgɔlɔ ke tungu na tuunri ke ni.
14 Lelɛɛlɛ pe woro na gbogolo naa wa ca ki mbogo yeyɔngɔ ki na mbaa finliwɛ piin,
lefɔnmbɔlɔ pe woro na yuuro koo na yɔgɔri naa.
15 Yɔgɔrimɔ pì kɔ wa we kotoro ti na,
we nayinmɛ yɔrɔ tì kanŋga ma pye kunwɔ gbelege.
16 We wunluwɔ njala lì kɔw wa we go na ma to,
jɔlɔgɔ yɛn we wogo, katugu wè kapege pye.
17 Yaraga ŋga kì ti we nawa pì tanga we na,
yaraga ŋga kì ti yɛntunwɔ pì si we yɛngɛlɛ ke yin ma ke wɔ we na,
18 ko yɛn fɔ Siyɔn yanwiga kì jɔgɔ ma koro waga;
kì pye dabaala pe yanrisaga.
19 Ɛɛn fɔ mboro wo na, Yawe Yɛnŋɛlɛ, ma yɛn ma wunluwɔ pi na fɔ sanga pyew,
ma wunluwɔ pi yaa pye wa sanga pyew fɔ tetete.
20 Yiŋgi na ma yaa si ma jatere wi laga we na fɔ sanga pyew?
Naga yɛn ma, ma yaa si je we na we yinwege ki ni fuun ki ni wi le?
21 Yawe Yɛnŋɛlɛ, ki yaga ma we sɔngɔrɔ ma pan we ni ma yɛɛ kɔrɔgɔ,
pa we yaa sɔngɔrɔ mbe pan ma kɔrɔgɔ.
We sɔngɔrɔ ma we pye paa yɛgɛ ŋga na wàa pye faa we.
22 Naga yɛn ma, ma yaa je we na pew wi le?
Naga yɛn ma, ma yaa nawa ŋgban we ni fɔ sa toro ki da wi na wi le?