17
Kore woolo
pe naŋganra leyaara kala
1 Yawe Yɛnŋɛlɛ làa para Moyisi wi ni ma yo fɔ:
2 «Ki yo saraga wɔfɔArɔn wi pinambyɔ Eleyazari wi kan fɔ wi naŋganra leyaara ti wɔ wa kasɔn ki ni, kasɔn naŋganra nda ti yɛn wa ti nawa wi sari yanragi wa lege; katugu naŋganra leyaara ti yɛn kpoyi mi ŋa Yɛnŋɛlɛ na kan.
3 Leele mbele pè kapege ki pye ma ku ki yɔnlɔ, pe yaa pe naŋganra leyaara ti lɛ mberi gbɔn mberi pye papara papara, mberi tɛgɛ mbe saraga wɔsaga ki tɔn ti ni; katugu pè pan ti ni mi ŋa Yawe Yɛnŋɛlɛ na yɛgɛ sɔgɔwɔ makɔ, a tì pye kpoyi. Ti yaa pye paa kacɛn yɛn mbaa Izirayɛli woolo pe yɛrɛgi.
4 A saraga wɔfɔ Eleyazari wì si nambala mbele pàa sogo pe naŋganra leyaara nda pè gbegele tuguyɛnrɛ ni ti lɛ, ma ti a pèri gbɔn papara papara mbe saraga wɔsaga ki tɔn ti ni.
5 Ki yaara papara papara ti yaa la Izirayɛli woolo pe nawa tuun ki na fɔ lere ŋa woro Arɔn setirige pyɔ, wo wa kpɛ si daga mbe fulo Yawe Yɛnŋɛlɛ li tanla mbe wusuna nuwɔ taan sogo li yɛgɛ sɔgɔwɔ; jaŋgo kala na làa pye Kore naa wi pinlɛyɛɛnlɛ pe na, liga ka pye wi na, paa yɛgɛ ŋga na mi ŋa Yawe Yɛnŋɛlɛ mìgi yo Moyisi wi kan a wìgi yo ye kan we.»
Izirayɛli woolo
pàa pye na kɔngɔri
Moyisi naa Arɔn pe na naa
6 Ki kala li pyeŋgɔlɔ, ki goto, a Izirayɛli gbogolomɔ woolo pe ni fuun pe nɛɛ kɔngɔri Moyisi naa Arɔn pe na, na yuun fɔ: «Yoro ye ti a Yawe Yɛnŋɛlɛ li woolo pè ku.»
7 Ɛɛn fɔ, ma Izirayɛli gbogolomɔ woolo pe ta pàa pye na gbogolo mbe yiri Moyisi naa Arɔn pe kɔrɔgɔ, a pè si kanŋga ma wele wa filisaga paraga go ki yeri, mɛɛ kambaaga ki yan teere kìgi tɔn, a Yawe Yɛnŋɛlɛ li gbɔgɔwɔ yanwa pì si pi yɛɛ naga.
8 A Moyisi naa Arɔn pè si kari ma saa yere wa filisaga paraga go ki yɛgɛ sɔgɔwɔ.
9 A Yawe Yɛnŋɛlɛ lì si Moyisi wi pye fɔ:
10 «Ye laga ki gbogolomɔ mba pi na, ye lali pi ni, mi yaa pe gbo yɔnlɔ nuŋgba.»
Kona, a Moyisi naa Arɔn pè si to ma pe yɛrɛ ti jiile wa tara.
11 Ko puŋgo na, a Moyisi wì si Arɔn wi pye fɔ: «Ma naŋganra leyaraga ki lɛ fyaw, ma kasɔn naŋganra ta lɛ wa saraga wɔsaga ki na mari le wa ki ni, ma wusuna nuwɔ taan wo wa ti na, mɛɛ fyɛɛlɛ ma kari wa Izirayɛli gbogolomɔ woolo pe kɔrɔgɔ, ma kapere ti kala yagawa ja kapyege ki pye pe kan; katugu Yawe Yɛnŋɛlɛ lì nawa ŋgban, a tifɛlɛgɛ yama pì to pe na makɔ na pe kuun.»
12 A Arɔn wì si ŋga Moyisi wìla yo wi kan ki pye. Wìla wi naŋganra leyaraga ki lɛ ma fe ma kari wa Izirayɛli gbogolomɔ woolo pe sɔgɔwɔ; tifɛlɛgɛ yama pìla to leele pe na kaselege makɔ. A wì si wusuna nuwɔ taan wi sogo, ma kapere ti kala yagawa ja kapyege ki pye pe kan.
13 A wì si saa yere gboolo poro naa weele pe sɔgɔwɔ, a tifɛlɛgɛ yama pì si kɔ.
14 Ki tifɛlɛgɛ yama pìla leele mbele gbo pàa pye lere waga kɛ ma yiri tijɛrɛ naa cɛnmɛ kɔlɔshyɛn (14 700). Poro la pye pe yɛ mbele pàa pinlɛ ma ku Kore wi ni pe ni.
15 A Arɔn wì si sɔngɔrɔ wa Moyisi wi tanla wa filisaga paraga go ki yɔn na; katugu tifɛlɛgɛ yama pìla kɔ.
Arɔn wi gbɔtangala kala
16 Yawe Yɛnŋɛlɛ làa para Moyisi wi ni ma yo fɔ:
17 «Ki yo Izirayɛli woolo pe kan fɔ cɛngɛlɛ ke ni fuun nuŋgba nuŋgba ke pan gbɔtangala nuŋgba nuŋgba ni ma kan. Cɛngɛlɛ teele poro pe yaa pan mbege gbɔtangaŋgala kɛ ma yiri shyɛn ke kan ma yeri. Ma naŋa nuŋgba pyew wi mɛgɛ ki yɔnlɔgɔ wi gbɔtangala li na.
18 Ma Arɔn mɛgɛ ki yɔnlɔgɔ wa Levi cɛnlɛ li gbɔtangala li na. Pa kona gbɔtangala nuŋgba nuŋgba yaa pye cɛnlɛ nuŋgba nuŋgba pyew li to wi mɛgɛ na.
19 Kona mɛɛ sa ki gbɔtangaŋgala ke tɛgɛ wa filisaga paraga go ki ni, wa yɔn finliwɛ sɛnrɛ kɛsu wi yɛgɛ sɔgɔwɔ, wa laga ŋga mi maa fili ye ni we.
20 Lere ŋa mi yaa ka wɔ, wi gbɔtangala li yaa fun. Pa kona Izirayɛli woolo pe kɔngɔrimɔ mba paa kɔngɔri ye na, mi yaa pi kɔ.»
21 A Moyisi wì sigi sɛnrɛ ti yo Izirayɛli woolo pe kan. A cɛngɛlɛ teele pe ni fuun pè si pan ma gbɔtangaŋgala nuŋgba nuŋgba kan wi yeri. Cɛnlɛ nuŋgba la pan gbɔtangala nuŋgba ni. Gbɔtangaŋgala ke ni fuun, mbe Arɔn wolo li taga wa, kàa pye kɛ ma yiri shyɛn.
22 A Moyisi wì si saa ke tɛgɛ Yawe Yɛnŋɛlɛ li yɛgɛ sɔgɔwɔ wa yɔn finliwɛ kɛsu wi yɛn paraga go ŋga ni ki ni.
23 Ki goto, a Moyisi wì si ye wa paraga go ŋga yɔn finliwɛ sɛnrɛ kɛsu wi yɛn ma tɛgɛ wa ki ni, mɛɛ ki yan Levi cɛnlɛ gbɔtangala na pàa Arɔn mɛgɛ ki yɔnlɔgɔ li na, lì fun ma fyɛɛnrɛ yiri, ma amandi tige pire sɛ a tì lɛ makɔ.
24 A Moyisi wì si gbɔtangaŋgala ke ni fuun ŋgele kàa pye wa Yawe Yɛnŋɛlɛ li yɛgɛ sɔgɔwɔ ke lɛ, ma saa ke kan Izirayɛli woolo pe yeri; a pè ŋga kìla pye ki yan. A cɛngɛlɛ teele pe ni fuun nuŋgba nuŋgba pè si pe gbɔtangaŋgala ke shɔ.
25 A Yawe Yɛnŋɛlɛ lì si Moyisi wi pye fɔ: «Arɔn gbɔtangala li sɔngɔrɔ mali tɛgɛ wa yɔn finliwɛ kɛsu wi yɛgɛ sɔgɔwɔ. Li yaa tɛgɛ le mbe pye paa kacɛn yɛn mbaa mbele pe ma yiri ma je pe yɛrɛgi. Pa kona ma yaa kɔngɔrimɔ mba pe maa kɔngɔri na na pi kɔ, jaŋgo paga ka ku.»
26 A Moyisi wì si tanga Yawe Yɛnŋɛlɛ li sɛnrɛ ti na.
27 Kona, a Izirayɛli woolo pè sigi yo Moyisi wi kan ma yo fɔ: «Wele, we yaa kɔ wa ki ni, we yaa ku, ee, we ni fuun we yaa ku.
28 Katugu lere ŋa fuun ka fulo wa Yawe Yɛnŋɛlɛ li cɛnsaga paraga go ki tanla, wo yaa ku. Kì cɛn we ni fuun we yaa ku ki kulɔmɔ nuŋgba pi na sa kɔ win?»