23
1 Kona, a Balaamu wì si Balaki wi pye fɔ: «Saraga wɔsara kɔlɔshyɛn kan na kan lagamɛ, ma napɛnɛ kɔlɔshyɛn naa simbapɛnɛ kɔlɔshyɛn gbɛgɛlɛ ma pan pe ni na kan.»
2 A Balaki wì si ŋga Balaamu wìla yo wi kan ki pye. A pè si pinlɛ ma napɛnɛ nuŋgba nuŋgba naa simbapɛnɛ nuŋgba nuŋgba wɔ saraga wa saraga wɔsara ti nuŋgba nuŋgba pyew ti na.
3 A Balaamu wì si Balaki wi pye fɔ: «Koro laga ma saraga sogowogo ki tanla, mi yaa kari yɛgɛ jɛnri. Kana Yawe Yɛnŋɛlɛ li yaa pan mbeli yɛɛ naga na na. Pa kona sɛnrɛ nda li yaa yo na kan mi yaa ti yɛgɛ yo ma kan.»
A Balaamu wì si lugu tinndi wa go na.
4 A Yɛnŋɛlɛ lì si pan mali yɛɛ naga Balaamu wi na. A Balaamu wì sili pye fɔ: «Mì ti a pè saraga wɔsara kɔlɔshyɛn kan, a mì napɛnɛ nuŋgba nuŋgba naa simbapɛnɛ nuŋgba nuŋgba wɔ saraga wa ki saraga wɔsara ti nuŋgba nuŋgba pyew ti na.»
5 Kì kaa pye ma, a Yawe Yɛnŋɛlɛ lì si sɛnrɛ le Balaamu wi yɔn maa pye fɔ: «Sɔngɔrɔ wa Balaki wi yeri ma saga sɛnrɛ nda ti yo wi kan.»
6 Kona, a Balaamu wì si sɔngɔrɔ wa Balaki wi yeri ma saa wi yan wi yɛn ma yere wa wi saraga sogowogo ki tanla wo naa Mowabu tara teele pe ni.
7 A Balaamu wì sigi lelɛɛlɛ sɛnyoro nda ti yo ma yo fɔ:
«Balaki wìlan yeri, a mì yiri wa Aramu tara ma pan.
Wo ŋa wi yɛn Mowabu tara wunlunaŋa wìlan yeri, a mì yiri wa yanwira nda wa yɔnlɔ yirisaga yeri ma pan.
Wìlan pye fɔ: ‹Pan ma Zhakɔbu setirige piile pe daŋga na kan,
pan ma naŋgbanwa sɛnrɛ yo pe na, poro mbele pe yɛn Izirayɛli woolo wele.›
8 Ɛɛn fɔ, Yɛnŋɛlɛ lii leele mbele daŋga,
mi mbe ya mbe poro daŋga mɛlɛ?
Yawe Yɛnŋɛlɛ lii naŋgbanwa sɛnrɛ yo leele mbele na,
mi mbe ya mbe naŋgbanwa sɛnrɛ yo pe na mɛlɛ?
9 «Mbanla ta wa waara ti go na, mi yɛn naga leele pe yaan;
mbanla ta wa tinndiye pe go na, na yɛgɛ yɛn pe na.
Leele pele wɛlɛ pe yɛn ma cɛn pe yɛ.
Pe woro na pe yɛɛ jate na pe yɛɛ pinlɛlɛ dunruya cɛngɛlɛ sanŋgala ke ni.
10 Ambɔ wi mbe ya mbe Zhakɔbu setirige piile lɛgɛrɛ pe jiri?
Poro mbele pè lɛgɛ paa taambugɔ yɛn we.
Ambɔ wi mbe ya mbe Izirayɛli woolo pe walaga tijɛrɛ wogo ki leele pe jiri?
Yɛnŋɛlɛ sa ti ki lesinmbele pe maa kuun yɛgɛ ŋga na mbe ka ku ma,
pe yaa ka kɔ kɔlɔmɔ mba na mbe ka kɔ ma.»
11 A Balaki wì si Balaamu wi pye fɔ: «Yiŋgi mà pye na na yɛɛn? Mɔ̀ɔ yeri ma pan mala juguye pe daŋga na kan, a mà si pan na duwaw lɛgɛrɛ piin pe kan.»
12 A Balaamu wì si Balaki wi yɔn sogo ma yo fɔ: «Mi na wogo ki kɔ wowi ŋa mbe sɛnrɛ nda Yawe Yɛnŋɛlɛ lì le na yɔn to yo ma kan.»
Balaamu wi duwaw shyɛn woo pyege Izirayɛli woolo pe kan
13 Kona, a Balaki wì sho naa Fɔ: «Koni pan we kari laga ka yɛgɛ ni, ma mbe ya koro laga ŋga na mbaa ki leele pe yaan we. Ma yaa pe walaga nuŋgba yan, ma se pe ni fuun pe yan, mbɔɔn ta wa ki laga ki na, ma pe daŋga na kan.»
14 A Balaki wì si kari wi ni wa kɛrɛ nda pàa pye na yinri Zofimu ti ni, wa Pisiga yanwiga ki go na. Wa ki laga ki na, a wì si saraga wɔsara kɔlɔshyɛn kan naa, mɛɛ napɛnɛ nuŋgba nuŋgba naa simbapɛnɛ nuŋgba nuŋgba wɔ saraga wa ki saraga wɔsara ti nuŋgba nuŋgba pyew ti na.
15 A Balaamu wì si Balaki wi pye fɔ: «Yere na ma saraga sogowogo ki tanla, mi yaa kari wamɛ sa logo Yawe Yɛnŋɛlɛ li yeri.»
16 A Yawe Yɛnŋɛlɛ lì sili yɛɛ naga Balaamu wi na, mɛɛ sɛnrɛ nda wi yaa sa yo ti le wi yɔn; kona, a lì suu pye fɔ: «Sɔngɔrɔ ma kari wa Balaki wi tanla ma saga sɛnrɛ nda ti yo wi kan paa yɛgɛ ŋga na mìri yo ma kan we.»
17 Kona, a Balaamu wì si sɔngɔrɔ wa Balaki wi tanla ma saa wi yan wi yɛn ma yere bere wa wi saraga sogowogo ki tanla wo naa Mowabu tara teele pe ni. A Balaki wì suu yewe ma yo fɔ: «Yawe Yɛnŋɛlɛ lì yo mɛlɛ?»
18 Kona, a Balaamu wì sigi lelɛɛlɛ sɛnyoro nda ti yo ma yo fɔ:
«Zipɔri pinambyɔ Balaki, yiri ma logo na yeri!
Nuŋgbolo jan ma logo na yeri jɛŋgɛ!
19 Yɛnŋɛlɛ li woro paa lere yɛn mbaa finlɛlɛ,
li woro paa sɛnwee pyɔ yɛn kala mbe ye li go na.
Li ka ŋga yo, li maga pye.
Li ka sɛnrɛ nda yo li maga kala li pye mbeli yɔn fili.
20 Wele, pège konɔ kan na yeri mbe duwaw pye ki leele pe kan,
Yawe Yɛnŋɛlɛ lì duwaw pe na, mi se ya mbege kanŋga.
21 Yawe Yɛnŋɛlɛ lii kambasinŋge yan wa Zhakɔbu setirige piile pe sɔgɔwɔ paa piin,
lii si kapege ka kpɛ yan poro mbele Izirayɛli woolo pe sɔgɔwɔ paa piin.
Ee, Yawe Yɛnŋɛlɛ, pe Yɛnŋɛlɛ le, li yɛn pe ni.
Pàa pye nali shari nali gbogo paa wunluwɔ yɛn.
22 Yɛnŋɛlɛ lo lì pe yirige wa Ezhipiti tara ti ni
li fanŋga ŋga lere se ya yere mbe sige ki ni, paa yannɔ fanŋga yɛn.
23 Lekara ti se ya yaraga ka pye Zhakɔbu setirige piile pe na,
jɛɛrɛ se ya yaraga ka pye poro mbele Izirayɛli woolo pe na.
Na ki yosanga wi ka ka gbɔn, ki yaa yo Zhakɔbu setirige piile pe kan,
ee, ki yaa yo poro mbele Izirayɛli woolo pe kan fɔ: ‹Ŋga ko ki ni fuun ko Yɛnŋɛlɛ lì pye.›
24 Wele, ki leele pe yɛn na yinrigi paa jara nɔ yɛn,
pe ma yew ma kan paa jara yɛn, ŋa wi maa kagboro ti ka,
mboo kagboro ti kasanwa pi wɔ mbe si jɛn mbe sinlɛ.»
25 A Balaki wì si Balaamu wi pye fɔ: «Kì kaa pye ma se ya mbe pe daŋga, maga ka duwaw wo wa pye pe kan.»
26 Ɛɛn fɔ, a Balaamu wì si Balaki wi yɔn sogo ma yo fɔ: «Mìgi yo ma kan ma yo Yawe Yɛnŋɛlɛ li ka sɛnrɛ nda yo na kan, ko kala lo mi yaa pye.»
Balaamu duwaw taanri woo pyege Izirayɛli woolo pe kan
27 Kona, a Balaki wì si Balaamu wi pye fɔ: «Ta paan, mi yaa kari ma ni laga ka yɛgɛ ni naa. Wa ki laga ki na, kana Yawe Yɛnŋɛlɛ li yaa yɛnlɛ ma pe daŋga na kan.»
28 A Balaki wì si kari Balaamu wi ni wa Pewɔri yanwiga ki na; wama, a pè si gbinri wi ni fuun wi yan.
29 A Balaamu wì si Balaki wi pye naa ma yo wi saraga wɔsara kɔlɔshyɛn kan wi kan wa ki laga ki ni, wi napɛnɛ kɔlɔshyɛn naa simbapɛnɛ kɔlɔshyɛn gbɛgɛlɛ wi pan pe ni wi kan.
30 A Balaki wì si ŋga Balaamu wìla yo ki pye, mɛɛ napɛnɛ nuŋgba nuŋgba naa simbapɛnɛ nuŋgba nuŋgba wɔ saraga wa saraga wɔsara ti nuŋgba nuŋgba pyew ti na.