124
Yɛnŋɛlɛ lo li yɛn Izirayɛli woolo
pe shɔfɔ we
1 Tangala yurugo mbe kari wa Zheruzalɛmu ca. Davidi Yɛnŋɛlɛ gbɔgɔyurugo.
Ndɛɛ ki pye Yawe Yɛnŋɛlɛ li sila pye we ni,
Izirayɛli woolo pege yo fɔ:
2 Ndɛɛ ki pye Yawe Yɛnŋɛlɛ li sila pye we ni,
sanga ŋa ni leele pàa yiri we kɔrɔgɔ,
3 naa pàa nawa ŋgban we ni,
pe mbaa we kɔ mbe we wɔ wa weele.
4 Pa kona tɔnmɔ pi mbaa we li,
lafogo tɔnmɔ pi mbaa fo mbe toro we go na.
5 Tɔnmɔ mba pi maa yinrigi na tuun ŋgbanga pi mbaa fo
mbe toro we go na.
6 Ɛɛn fɔ sɔnmɔ yɛn Yawe Yɛnŋɛlɛ li woo!
Lo na lii yɛnlɛ ki na mbe we le we juguye pe kɛɛ, paa pe kagboro yɛn.
7 Wè shɔ pe kɛɛ, paa yɛgɛ ŋga na sannjɛlɛ ma fegele mali yɛɛ shɔ sannjɛgɛlɛ yigifɔ wi mɛrɛ ti kɛɛ we;
mɛrɛ tìla kɔɔnlɔ, a wè fe ma shɔ.
8 We sagawa pa pi ma yiri wa Yawe Yɛnŋɛlɛ li yeri,
lo na lì naayeri wo naa tara ti da we.