41
Yaŋa wa Yɛnŋɛlɛ yɛnrɛwɛ sɛnrɛ
1 Yurukɔɔlɔ to wi sɛwɛ yurugo. Davidi Yɛnŋɛlɛ gbɔgɔyurugo.
2 Lere ŋa wi maa fyɔnwɔ fɔ wi jate, fɛrɛwɛ yɛn wi woo!
Jɔlɔgɔ sanga ni, Yawe Yɛnŋɛlɛ li maa shɔ.
3 Yawe Yɛnŋɛlɛ li maa wi go singi, mboo yaga yinwege na,
li ma fɛrɛwɛ kan wi yeri laga tara ti na.
Laa wi le wi juguye pe kɛɛ.
4 Mboo ta wa wi yama fuuro ti na wila jɔlɔ, Yawe Yɛnŋɛlɛ li maa saga;
li maa wi kala yɔngɔ wi yama sanga ni.
5 Mi wo na, mì yo fɔ: «Yawe Yɛnŋɛlɛ, ki yaga mala yinriwɛ ta!
Na sagala, katugu mì kapege pye ma na!»
6 Na juguye pe yɛn na sɛnpere yuun na na fɔ:
«Wi yaa ku wagati wiwiin mbe wɔ wa, jaŋgo wi mɛgɛ ki ta ki kɔ ki wɔ wa?»
7 Na wa ka pan mbanla wele, wi maa tuun na tanla wa wi sɛnyoro ti ni,
wi ma jatere pere ti gbogolo wa wi nawa,
na wi ka ka yiri mbe kari, wi ma saa nari yuun.
8 Mi yɛn ma mbele fuun mbɛn, pe maa kalɛgɛrɛ sɛnrɛ yuun pe yɛɛ kan na kanŋgɔlɔ,
pe maa tipege jate na ni.
9 Pe ma yo fɔ: «Jɔlɔgɔ gbɔgɔ kì to wi na yɛɛn!
Wi ŋa wa wì sinlɛ, wi se ya yiri naa.»
10 Ali na wɔnlɔ jɛnŋɛ, wo ŋa mìla na jigi wi taga wi na,
wo ŋa wìla pye na nii ja na ni,
wì yiri na kɔrɔgɔ.
11 Ɛɛn fɔ mboro wo na, Yawe Yɛnŋɛlɛ, na yinriwɛ ta, mala yirige,
jaŋgo mbanla kayaŋga ki wɔ pe ni.
12 Na na jugu wii cew ta na na,
pa kona mi yaa ki jɛn mbe yo fɔ na kala li yɛn mɔɔ ndanla.
13 Mi wo na, ma yɛn mala tɔgɔ, naa na nawa pi yɛn ma filige na na ki kala na;
màla tɛgɛ ma yɛɛ yɛgɛ sɔgɔwɔ na wele na na fɔ sanga pyew.
14 Sɔnmɔ yɛn Yawe Yɛnŋɛlɛ, Izirayɛli woolo Yɛnŋɛlɛ li woo, sanga pyew fɔ tetete!
Anmiina! Anmiina!