48
Zheruzalɛmu,
wunluŋgbɔɔ wi ca ye
1 Yurugo. Kore pinambiile pe Yɛnŋɛlɛ gbɔgɔyurugo.
2 Yawe Yɛnŋɛlɛ li yɛn ma gbɔgɔ, ki daga paa li sɔnni jɛŋgɛ,
paa li sɔnni wa li ca ki ni, wa li yanwiga kpoyi ki na.
3 Ki yanwiga ki cɛnlɔmɔ pi yɛn ma yɔn;
ki yɛn na yɔgɔrimɔ kaan dunruya woolo pe ni fuun pe yeri.
Ko ki yɛn Siyɔn yanwiga ye, Yɛnŋɛlɛ li cɛnsaga ye;
wunluŋgbɔɔ wi ca koyi.
4 Yɛnŋɛlɛ li yɛn wa Siyɔn ca wunluwɔ yinrɛ tugbɔɔrɔ ti ni,
pège jɛn ma yo lo li yɛn larasaga jɛŋgɛ ye.
5 Wele, wunlumbolo pàa saa pe yɛɛ gbogolo,
ma pinlɛ ma yiri ca ki kɔrɔgɔ.
6 Ɛɛn fɔ, naa pàa yɛgɛ taga we Fɔ wi na sanga ŋa ni, kì si to pe yɔn na,
a pe sunndo wì si kɔn pe na, a pè si fe.
7 Le ki yɔngɔlɔ nuŋgba ke ni, a pe nɛɛ seri le teere fyɛrɛ ti na,
paa yɛgɛ ŋga na jɛlɛ selara ma kaa yiri wi ni we;
8 paa yɛgɛ ŋga na yɔnlɔ yirisaga tifɛlɛgɛ ki ma kaa na gbɔɔn
mbaa Tarisisi ca tɔnmɔkɔɔrɔ tugbɔɔrɔ ti kaari we.
9 Ŋga wàa logo, ko wè yan
wa Yawe Yɛnŋɛlɛ na yawa pi ni fuun fɔ li ca ki ni,
wa we Yɛnŋɛlɛ li ca ki ni;
Yɛnŋɛlɛ li yaa yeresaga kan ca ki yeri fɔ sanga pyew.
10 E Yɛnŋɛlɛ, mbe we ta wa ma shɛrigo gbɔgɔ ki ni,
we yɛn na jatere piin ma kagbaraga ki na.
11 E, Yɛnŋɛlɛ, pe yɛn nɔɔ sɔnni fɔ wa dunruya wi kɔsaga ki na,
ma mɛgɛ kì yiri dunruya wi kɛɛ ki ni fuun ki na.
Kasinŋge ko ma maa piin ma fanŋga kɛɛ ki ni.
12 Yaa yɔgɔri wa Siyɔn yanwiga ki na,
Zhuda tara cara woolo ye yin nayinmɛ ni,
kiti ŋa mà kɔn wi kala na!
13 Ye yiri ye Siyɔn ca ki maga,
ye ki sanŋgazoye pe jiri!
14 Ye mbogo ŋga ki ca ki maga ki wele,
ye wunluwɔ yinrɛ tugbɔɔrɔ ti wele jɛŋgɛ,
jaŋgo ye kaga yege yɛgɛ yo setirige piile mbele pe yaa ka yiri puŋgo na pe kan;
15 fɔ Yɛnŋɛlɛ lo li yɛn we Yɛnŋɛlɛ sanga pyew fɔ tetete;
lo li yaa la we yɛgɛ sinni fɔ sa gbɔn kunwɔ pi na.