71
Lelɛɛ wa Yɛnŋɛlɛ yɛnrɛwɛ
1 Yawe Yɛnŋɛlɛ, mboro mìlan yɛɛ karafa ma na;
maga ka ti mbe fɛrɛ shɔ!
2 Mboro ŋa ma yɛn sinŋɛ, na shɔ, mala saga!
Nuŋgbolo jan ma logo na yeri, mala shɔ!
3 Pye paa walaga yɛn na kan, ŋga ki yɛn na larasaga,
laga ŋga mbe ya sa lara wa sanga pyew mbe shɔ.
Ee, màga kɔn maga tɛgɛ mbanla shɔ,
katugu ma yɛn paa walaga yɛn na kan konaa malaga sigeca yɛn nala go singi.
4 E, na Yɛnŋɛlɛ, na shɔ lepeele pe kɛɛ,
na shɔ ki lembasinmbele naa lewɛlimbɛlɛ pe kɛɛ.
5 Katugu na Fɔ, Yawe Yɛnŋɛlɛ, mboro ma yɛn na jigi tagasaga ye;
mboro mìlan jigi wi taga ma na maga lɛ wa na punwɛ pi ni.
6 Maga lɛ pànla se, mi yɛn ma kɛɛ kan mboro na,
maga lɛ wa na sepilige ki na, ma yɛn na wele na na.
Ki kala na, go yɛn ki na mbaa ma sɔnni suyi.
7 Mì pye paa kafɔnnɔ yaraga yɛn lelɛgɛrɛ yeri,
ɛɛn fɔ mboro ma yɛn na larasaga jɛŋgɛ ye.
8 Ma sɔnmɔ yuuro ti se kɔ wa na yɔn,
mi yaa lɔɔn gbɔgɔwɔ pi sɛnrɛ yuun pilige pyew.
9 Na lelɛwɛ sanga ni, maga kanla wa,
na na fanŋga ki ka kaa koo na ni sanga ŋa ni, maga ka je na na!
10 Katugu na juguye pe maa para na sɛnrɛ na,
mbele pe yɛn nala pɛɛlɛ, pe yɛn na yɔn nii na na.
11 Pe yɛn na yuun fɔ: «Yɛnŋɛlɛ lì laga wi na;
ye pan woo purɔ woo yigi,
lere woro wa mboo shɔ.»
12 E, Yɛnŋɛlɛ, maga kɔɔn yɛɛ laga lali na ni!
Mboro ŋa na Yɛnŋɛlɛ, fyɛɛlɛ ma pan mala saga!
13 Mbele pe yɛn na baga na na, poro mbe fɛrɛ shɔ pe kɔ pe wɔ wa!
Mbele paa ki jaa mbe tipege pye na na, fɛrɛ mbe pe yigi, pe go ki sogo pe na!
14 Mi wo na, na jigi wi yɛn ma na sanga pyew,
mi yaa koro mbaa ma sɔnni suyi.
15 Mi yaa laga yɛgɛ yuun yɛgɛ ŋga na ma yɛn sinŋɛ,
mbaa ma shɔwɔ pi sɛnrɛ yuun,
katugu ma kajɛŋgɛ pyege ki se ya jɛn mbe kɔ.
16 We Fɔ, Yawe Yɛnŋɛlɛ, mi yaa kari wa ma yeri saa ma yawa kagbɔgɔlɔ ke sɛnrɛ yuun;
mi yaa lɔɔn kasinŋge ki sɛnrɛ yuun, mboro nuŋgba wogo ye.
17 E, Yɛnŋɛlɛ, màla naga maga lɛ wa na punwɛ pi ni,
ali ma pan ma gbɔn nala, mi yɛn nɔɔ kagbɔgɔlɔ ke sɛnrɛ yuun.
18 E, Yɛnŋɛlɛ, ali na mi ka ka lɛ, na yinzire ti ka filige,
maga kanla wa,
pa kona mi yaa lɔɔn fanŋga ki sɛnrɛ yuun nala pilige woolo pe kan,
mbaa ma yawa pi sɛnrɛ yuun setirige piile mbele fuun pe yaa ka yiri puŋgo na pe kan!
19 E, Yɛnŋɛlɛ, ma yɛn ma sin yɛgɛ ŋga na, kì yiri ma gbɔn fɔ wa naayeri,
katugu mà kagbɔgɔlɔ pye.
E, Yɛnŋɛlɛ, ambɔ wi yɛn paa ma yɛn?
20 Mboro kala na, tege lɛgɛrɛ naa jɔlɔgɔ lɛgɛrɛ gbɔn na na,
ɛɛn fɔ, ma yaa pan mbe yinwege kan na yeri naa;
ma yaa kanla yirige mbanla wɔ wa wegbɔgɔ tijugo ki ni.
21 Ki yaga mala gbɔgɔwɔ pi kan na yeri naa fɔnŋgɔ,
mala kotogo ki sogo na na naa fɔnŋgɔ.
22 Kona mi wo na, mboro ŋa na Yɛnŋɛlɛ, mi yaa lɔɔn sɔnni ŋgɔni ni, ma yɛn sɛnrɛ nuŋgba yofɔ yɛgɛ ŋga na ki kala na.
Mboro ŋa Izirayɛli woolo Yɛnŋɛlɛ kpoyi le, mi yaa la juru gbɔɔn mbaa ma gbogo.
23 Na mi ka kaa yarigbɔnrɔ gbɔɔn mbaa ma gbogo, mi yaa la jɔrɔgi nayinmɛ ni;
mi yaa la yuuro koo mbaa ma sɔnni, katugu màla go shɔ.
24 Ma yɛn sinŋɛ yɛgɛ ŋga na, mi yaa laga sɛnrɛ yuun wa na yɔn pilige pyew,
katugu mbele pàa pye naga jaa tipege mbanla ta, pè fɛrɛ shɔ, a pe go kì sogo pe na.