97
Yɛnŋɛlɛ li yɛn wunluwɔ
dunruya wi go na
1 Yawe Yɛnŋɛlɛ lo li yɛn wunluwɔ we,
tara na woolo yaa yɔgɔri,
lɔgɔ furo janwa woolo ye yin nayinmɛ ni!
2 Kambaaga naa diwi wɔlɔ yɛn mali maga,
kasinŋge ko naa kaselege ki ni, to tɔɔn wunluwɔ pi teŋge.
3 Kasɔn maa yiin wa li yɛgɛ,
ŋga ki maa wi juguye pe sorogi kɛɛ ki ni fuun ki na.
4 Li yɛnŋɛlɛ yɛngɛlɛmɛ pi ma yanwa yirige dunruya wi kan,
tara woolo pe maga yan nɛɛ seri fyɛrɛ ti kala na.
5 Yanwira ti yɛn na yanni Yawe Yɛnŋɛlɛ li yɛgɛ sɔgɔwɔ paa sɛnriŋguro yɛn
ti yɛn na yanni Yɛnŋɛlɛ na dunruya wi ni fuun tafɔ li yɛgɛ sɔgɔwɔ.
6 Li yɛn ma sin yɛgɛ ŋga na, naayeri wi yɛn naga wogo ki sɛnrɛ yuun,
dunruya woolo pe ni fuun paa li gbɔgɔwɔ yanwa pi yaan.
7 Mbele fuun pe maa yaara yanlɛrɛ nda pè tɛ ti gbogo,
poro mbele pe maa pe yɛɛ gbogo yarisunndo ti kala na,
pe yaa ka fɛrɛ shɔ;
yarisunndo sannda pyew yaa kanŋguuro kanni Yawe Yɛnŋɛlɛ li yɛgɛ sɔgɔwɔ mbaa li gbogo!
8 Siyɔn ca woolo pe yaa ki wogo ki logo mbe yin nayinmɛ ni,
Zhuda tara cara ti woolo pe yɛn na yɔgɔri kiti ŋa mà kɔn wi kala na.
9 Katugu Yawe Yɛnŋɛlɛ, mboro ma yɛn Yɛnŋɛlɛ na yaara ti ni fuun ti go na laga tara ti ni fuun ti ni,
ma yɛn yarisunndo sannda pyew ti go na pew.
10 Yoro mbele Yawe Yɛnŋɛlɛ li yɛn ma ye ndanla, ye ti kapege ki ye mbɛn;
mbele pè pe yɛɛ kan li yeri li maa pe yinwege ki kɔrɔsi,
li ma pe shɔ lepee wi kɛɛ.
11 Yɛnŋɛlɛ li ma li kajɛŋgɛ yanwa pi yirige lesinŋɛ wi kan,
mbele pe nawa pi yɛn ma filige pe na, li ma nayinmɛ kan pe yeri.
12 Yoro lesinmbele wele, yaa yɔgɔri Yawe Yɛnŋɛlɛ li kala na,
ye yuuro kɔ yeli sɔn li yɛn kpoyi yɛgɛ ŋga na ki kala na!