33
Musa ka dugawu kɛ Izirayɛlimɔgɔw ye
1 Matigi Ala ta jɔncɛ Musa ka dugawu minw kɛ Izirayɛlimɔgɔw ye sani a ye sa, o dugawuw le ye nin ye:
2 A ko:
«Matigi Ala nana ka bɔ Sinayi kuru kan,
a wurira i ko tere, ka bɔ Seyiri jamana ra.
A tora Paran kuruyɔrɔw ra, ka manamana.
Mɛlɛkɛ waga caman le tun k’a lamini;
a nana a ta mɔgɔw fɛ,
a nana ni sariya manamanatɔ ye a boro, i ko tasuma.
3 Can lo, Matigi Ala le bɛ a ta mɔgɔw kanu;
a ta mɔgɔ saninmanw bɛɛ bɛ a boro kɔnɔ.
O bɛɛ bɛna o kinbiri gban a sen kɔrɔ,
janko k’a ta ciw lamɛn.
4 Musa ka o sariyaw le di an ma,
o le ye Yakuba ta mɔgɔw ta cɛn ye.
5 Wagati min Izirayɛlimɔgɔw ɲamɔgɔw lajɛnna
ni Izirayɛli ta gbaw ye,
ale le tun kɛra Yesurun ta masacɛ ye.»
6 «Ala y’a to Rubɛn ye si sɔrɔ, a si kana ban,
hali ni a ta mɔgɔw man ca.»
7 Musa ka min fɔ Zuda ta ko ra:
«E, Matigi Ala, Zuda kasikan lamɛn,
i ye a lana a ta mɔgɔw fan fɛ.
A ka kɛrɛ kɛ ni a yɛrɛ boro baraka ye;
na a dɛmɛ ka a juguw kɛrɛ!»
8 A ka min fɔ Levi ta ko ra:
«Matigi Ala, i ka Urimi ni Tumimi di i ta jɔn Alaɲasiranbaga ma,
minw ye Levi ye.
I ka a kɔrɔbɔ Masa ta yɔrɔ ra,
i ka Meriba ta jiko kiti ben a kan.
9 O kɔ, a ka a ɲa bɔ a bamuso ni a facɛ ra,
ka ele kelenpe kanu.
A banna a balemaw bɛɛ ra,
ka ban hali a denw na,
ka ele ta darakan dɔrɔn le lamɛn,
ka i ta jɛnɲɔgɔnya* sariya sira tagama.
10 O ka Yakuba ta mɔgɔw karan i ta ciw ra,
o ka Izirayɛlimɔgɔw karan i ta sariyaw ra.
O ka wusunan sarakaw bɔ i ye,
ka saraka jɛnitaw* jɛni i ye, i ta sarakajɛnifɛn* kan.
11 E, Matigi Ala, baraka don a ta baaraw bɛɛ ra,
ka sɔn a boro ta baara bɛɛ ma.
A juguw bɛɛ soro tigɛ,
a kɔninyabagaw si kana se ka wuri ka lɔ tuun!»
12 A ka min fɔ Boniyaminu ta ko ra:
«Ale ye Matigi Ala ta mɔgɔ kanunin le ye!
A bɛ Matigi Ala kɛrɛ fɛ hɛra ni laganfiya ra.
Matigi Ala bɛna a tanga tuma bɛɛ;
a siginin bɛ o cɛ ra.»
13 A ka min fɔ Yusufu ta ko ra:
«Matigi Ala ye baraka don a ta jamana ra,
ka sanji ɲanaman ben o ye ka bɔ san fɛ,
ka dugukolo jukɔrɔjiw di o ma fana.
14 Tere ye o ta simanw mɔ o ye,
ka simanw bɛɛ ra ɲumanman di o ma,
k’a to o ye simankuraw sɔrɔ,
o ye simanw bɛɛ ra ɲumanman sɔrɔ karo o karo.
15 Kuruw ta fɛnw bɛɛ ra ɲumanman, o ye o sɔrɔ;
kongoriw ta fɛnw bɛɛ ra ɲumanman, o ye o sɔrɔ.
16 Dugukolo fara fɛn o fɛn na, o bɛɛ ra ɲumanman,
ani Ala min tun k’a yɛrɛ yira yiritunin tasumaman ra, ale ta koɲumanw,
o bɛɛ ye kɛ Yusufu kunna
ale min kɛra a balemaw ɲamɔgɔ ye.
17 Bonya ye Yusufu ta le ye, o min ta fanga bɛ i ko misitoran den fɔlɔ cɛman ta fanga;
a gbanw bɛ i ko sigin ta gbanw.
A bɛ siya tɔw bɛɛ tu ni o gbanw ye,
fɔ ka taga se dugukolo dan na.
Efirayimu ta kɛrɛkɛjamaw bɛna a kɛ ten le,
Manase ta kɛrɛkɛjamaw bɛna a kɛ ten le.»
18 A ka min fɔ Zabulɔn ta ko ra:
«Zabulɔn ye ɲagari a ta tagamaw ra,
Isakari ye ɲagari a ta fanibonw kɔnɔ.
19 Aw bɛna siyaw wele ka na kuru kan ka na sarakaw bɔ,
saraka minw bɛnnin bɛ Ala ma.
O bɛna kɔgɔji kɔnɔfɛnw sɔrɔ ka wasa o ra;
naforo minw dogonin bɛ kɔgɔji kɛnkɛn jukɔrɔ, o bɛna o sɔrɔ.»
20 A ka min fɔ Gadi ta ko ra:
«Mɔgɔ o mɔgɔ ka Gadi bonya, Ala ye baraka don o tigi ra.
Gadi bɛ la i ko jara;
a bɛ sogo faga, k’a tigɛtigɛ, k’a ta a senw na ka taga a bla a kun na.
21 A bɛ jamana yɔrɔ bɛɛ ra ɲumanman ta a yɛrɛ ye.
Kuntigiw ninyɔrɔ ye a ta le ye.
A blara mɔgɔw ɲa,
janko o ye Matigi Ala ta sira tagama,
ani Ala ka ko minw latigɛ Izirayɛlimɔgɔw ye, ka o bɛɛ kɛ.»
22 A ka min fɔ Dan ta ko ra:
«Dan ye jarakanbelen le ye,
min bɛ pan ka bɔ Basan mara ra.»
23 A ka min fɔ Nɛfitali ta ko ra:
«Nɛfitali ka Ala ta ɲumanya sɔrɔ k’a caya,
a wasara Matigi Ala ta baraka ra.
Ale le bɛ sigi jamana terebenyanfan ni a woroduguyanfan na.»
24 A ka min fɔ Asɛri ta ko ra:
«Ala ka baraka don Asɛri ra i ko Izirayɛlimɔgɔ tɔw.
Ala ye a ko diya a balemaw ye,
k’a ta oliviyesunw caya fɔ a ye a sen tunu a turu ra!
25 A ta dugu donda sɔgɔnanw ye nɛgɛ ni siranɛgɛ le ye.
A bɛna kɔrɔ ka sa ni a baraka ye.»
26 «E, Yesurun, aw ta Ala bɔɲɔgɔnko tɛ!
A bɛ yɛlɛn ka sigi sankolo kan ka na aw dɛmɛ;
a bɛ yɛlɛn ka sigi sankabaw kan ka na, a ni a ta bonya.
27 Ala banbari le ye aw dogoyɔrɔ ye.
A boro baraka ye baraka banbari le ye.
A bɛna aw juguw gbɛn ka bɔ aw ɲa,
k’a fɔ aw ye ko aw ye o halaki.
28 «Izirayɛli bɛna to hɛra ni laganfiya ra,
Yakuba ta mɔgɔw sigira o danna jamana dɔ ra,
siman ni rɛzɛn ka ca jamana min na;
sanji bɛ ben caman jamana min na.
29 «E, Izirayɛli, i ta ɲana, sabu siya juman le bɛ i ko ele?
Matigi Ala ka i kisi.
Matigi Ala le ye i ta nɛgɛbɛnnan ye, i dɛmɛbaga;
ale le ye i ta kɛrɛkɛmuru ye, min b’a to i bɛ se sɔrɔ.
I juguw bɛna o yɛrɛ majigi i kɔrɔ;
i bɛna tagama o kan.»