45
Ala ka baara min di Sirusi ma
1 Matigi Ala k’a fɔ a ta mɔgɔ ɲanawolomanin Sirusi ta ko ra, ko:
«Ne bɛna a boro mina,
ka siya tɔw majigi a ta fanga kɔrɔ;
ne bɛna siya tɔw ta masacɛw ta kurusijaraw foni,
ka dondaw bɛɛ dayɛlɛ ale ɲa fɛ,
janko daw si kana datugu tuun.
2 Ne yɛrɛ bɛna bla ele Sirusi ɲa fɛ,
ne bɛna kuruw yɛrɛgɛ i tagatɔ ɲa fɛ,
ne bɛna siranɛgɛ konw kari,
ka o sɔgɔnan nɛgɛramanw tigɛtigɛ.
3 Ne bɛna naforo dogoninw di i ma,
naforo minw bɛ gundo yɔrɔw ra,
janko i y’a lɔn ko ne le ye Matigi Ala ye,
Izirayɛli ta Ala, min bɛ i wele i tɔgɔ ra.
4 «Ne ta jɔncɛ Yakuba le kosɔn,
ani ne ta siya ɲanawolomanin Izirayɛli le kosɔn,
ne ka ele wele i tɔgɔ ra,
ka bonya la i kan, k’a sɔrɔ ele ma ne lɔn.
5 Ne le ye Matigi Ala ye, Ala wɛrɛ tɛ yi,
Ala wɛrɛ tɛ yi ne kɔ.
Ne ka i cɛsiri ka baraka don i ra, k’a sɔrɔ ele ma ne lɔn,
6 janko k’a ta terebɔyanfan na
ka taga a bla fɔ terebenyanfan na,
mɔgɔw y’a lɔn ko ni ne tɛ, batofɛn tɔw bɛɛ ye fɛngbansanw le ye;
ne le ye Matigi Ala ye, Ala wɛrɛ tɛ yi ne kɔ.
7 Ne bɛ yeelen bɔ, ne bɛ dibi don,
ne bɛ hɛra lana, ne bɛ tɔɔrɔ lana.
Ne Matigi Ala, ne le bɛ nin kow bɛɛ kɛ.
8 «Sankolo ye terenninya lajigi i ko gɔmiji,
sankabaw fana y’a lajigi i ko sanji;
dugukolo ye dayɛlɛ janko kisiri ye falen,
k’a to terenninya fana ye nugu.
Ne Matigi Ala, ne le bɛ nin bɛɛ kɛ.»
Mɔgɔ ni a danbaga
9 Bɔnɔ bɛ ele sɔrɔ, ele min bɛ i danbaga sɔsɔ;
k’a sɔrɔ ele fana ye bɔgɔdaga dɔ le ye bɔgɔdaga tɔw cɛ ra!
Yala bɔgɔ bɛ se k’a fɔ a lalagabaga ma wa, ko: «Ele bɛ mun le kɛra tan?»
walama k’a fɔ ko: «I ta baara ma ɲa i boro!»
10 Bɔnɔ bɛ ele sɔrɔ, ele min b’a fɔ i facɛ ma ko: «Mun na i ka ne woro?»
K’a fɔ i bamuso ma ko: «Mun na i ka ne woro?»
11 Matigi Ala, Izirayɛli ta Ala saninman,
Izirayɛli danbaga ko:
«Ne ta denw bɛna kɛ min ye, yala aw le ka kan ka ne ɲininka o ra wa?
Aw le ka kan ka ne ta kokɛtaw yira ne ra wa?
12 Ne le ka dugukolo dan,
ka adamadenw dan ka o sigi a kan.
Ne yɛrɛ boro le ka sankolo foni k’a se yɔrɔ bɛɛ,
ne le bɛ sankolokɔnɔfɛnw bɛɛ mara.
13 Ne le ka Sirusi lawuri ne ta terenninya kama;
ne bɛna a ta siraw bɛɛ dakaɲa.
Ale le bɛna ne ta dugu lɔ kokura,
ka ne ta mɔgɔ minaninw labla o ye taga,
o tɛna wari sara a ye, o fana tɛna bonyafɛn di a ma.
Fangatigi Ala ko ten.»
Ala bɛ a ta mɔgɔw cɛ ra
14 Matigi Ala ko:
«Misirankaw ta sɔrɔtaw, ani Etiyopikaw ta tɔnɔw,
ani Sebakaw, o siya mɔgɔ janjanw,
o bɛɛ bɛna tɛmɛ aw fɛ, o bɛɛ bɛna kɛ aw ta ye.
O mɔgɔw bɛna na tugu aw kɔ, o sirinin bɛ ni nɛgɛjɔrɔkɔ ye.
O bɛna o kinbiri gban aw kɔrɔ,
ka aw bonya, k’a fɔ ko:
‹Ala bɛ aw dama le fɛ, Ala wɛrɛ tɛ yi.
Batofɛn tɔw ye fɛngbansanw le ye.› »
15 Can ra, ele ye Ala dogonin le ye,
Izirayɛli ta Ala, kisibaga Ala.
16 Jo lalagabagaw maroyara fɔ ka o kun suuru;
o bɛɛ kun suurunin le bɛ sekɔra ka taga.
17 Nka Izirayɛli bɛna kisi Matigi Ala baraka ra,
kisiri min tɛ ban.
Aw tɛna maroya,
aw kun tɛna suuru tuun ka ye fiyewu!
Sankolo ni dugukolo danbaga Ala
18 Matigi Ala
min ka sankolo dan,
min fana ka dugukolo lalaga, k’a labɛn, k’a sabati;
a m’a dan k’a lakolonba to,
nka a k’a dan janko mɔgɔw ye sigi a kan.
Ale ko: «Ne le ye Matigi Ala ye,
Ala wɛrɛ tɛ yi ne kɔ.
19 Ne ma kuma dogo ra,
ne ma kuma dugukolo yɔrɔ dogonin dɔ ra;
ne m’a fɔ Yakuba ta mɔgɔw ye ko:
‹Aw ye ne yɔrɔɲini yɔrɔ lakolonw na!›
Ne Matigi Ala, ne bɛ kuma terennin le fɔ,
kuma min ye can ye, ne bɛ o le lase.»
Siyaw bɛɛ bɛna Matigi Ala lɔn
20 «Aw ye ɲɔgɔn lajɛn ka na;
aw tɔ minw bɔsira siyaw cɛ ra, aw bɛɛ ye gbara ka na!
Minw bɛ o ta jo yiriramanw ta ka yaala, olugu tɛ foyi lɔn;
ala min tɛ se ka o kisi, o bɛ o le daari.
21 «Aw ye gbara ka na aw ta fɔ,
aw bɛɛ ye lajɛn ka na sigi ka kuma.
Jɔntigi le ka nin kow fɔ kabini wagatijan?
Jɔn le k’a lase kabini fɔlɔfɔlɔ?
Ne tɛ wa, ne Matigi Ala?
Ni ne tɛ, Ala wɛrɛ tɛ yi
min terennin lo, min bɛ mɔgɔ kisi;
ni ne tɛ, dɔ wɛrɛ tɛ yi.
22 Aw ye aw ɲasin ne ma janko aw ye kisi,
aw minw bɛ fɔ dunuɲa danw na;
sabu ne le ye Ala ye,
Ala wɛrɛ tɛ yi ne kɔ.
23 Ne bɛ kari ni ne yɛrɛ tɔgɔ ye;
ne da bɛ kuma terennin le fɔ,
kuma min tɛ yɛlɛma ka ye.
Adamadenw bɛɛ bɛna o kinbiri gban ne le kɔrɔ;
o bɛɛ bɛna kari ni ne tɔgɔ le ye.
24 O bɛna a fɔ ne ta ko ra, ko:
‹Terenninya ni baraka bɛ sɔrɔ Matigi Ala kelenpe le fɛ.› »
Minw bɛɛ jusu tun gbanna a kɔrɔ
olugu maroyanin bɛna sekɔ ka na a fɛ.
25 Matigi Ala le baraka ra
Izirayɛli ta denw bɛɛ bɛna terenninya sɔrɔ, ka o kun kɔrɔta.