49
Ala ta jɔnɲuman ta dɔnkiri flanan: Dunuɲa yeelen
1 Aw kɔgɔji kɔfɛmɔgɔw, aw ye ne lamɛn!
Aw yɔrɔjanmɔgɔw, aw ye aw janto nin kuma ra!
Matigi Ala ka ne wele, k’a sɔrɔ ne tun ma woro fɔlɔ;
ka ne to ne bamuso kɔnɔ, a ka ne tɔgɔ fɔ.
2 A ka ne da diya i ko kɛrɛkɛmuru dadiman,
ka ne dogo a boro jukɔrɔ;
a ka ne kɛ i ko biɲɛ dabɔnin,
ka ne dogo a ta biɲɛforogo kɔnɔ.
3 A ko ne ma ko: «Ele le ye ne ta jɔn ye,
ele Izirayɛli, ne bɛna ne ta nɔɔrɔ yira ele le sababu ra.»
4 Nka ne ko: «Ne kɔni ka ne yɛrɛ sɛgɛ gbansan le;
ne ka ne baraka ban ko lakolonw ani ko ɲacintanw le ra.
O bɛɛ n’a ta, ne ta ko bɛ Matigi Ala le boro,
ne ta baraji bɛ ale Ala le fɛ.»
5 Ayiwa, sisan, Matigi Ala kumana;
ale le ka ne kɛ mɔgɔ ye ne bamuso kɔnɔ, ka ne kɛ a ta jɔn ye,
janko ka Yakuba ta mɔgɔw lasekɔ a fɛ,
ka Izirayɛlimɔgɔw lajɛn a kɔrɔ.
Ne bɛna bonya sɔrɔ Matigi Ala ɲa kɔrɔ,
ne ta Ala le bɛna kɛ ne ta baraka ye.
6 Matigi Ala ko: «I bɛna kɛ ne ta jɔn ye
ka Yakuba ta gbaw lawuri,
ka Izirayɛlimɔgɔ tɔw lasekɔ ka na;
nka o dɔrɔn tɛ,
ne bɛna i sigi ka i kɛ siya wɛrɛ mɔgɔw ta yeelen ye,
janko ne ta kisiri ko ye se fɔ dunuɲa fan bɛɛ ra.»
Ala bɛna Izirayɛlimɔgɔw ladon
7 Matigi Ala ye Izirayɛli kunmabɔbaga,
ani a ta Ala saninman ye;
mɔgɔ mafiyɛnyanin, siyaw bɛ mɔgɔ min kɔninya,
mɔgɔ min kɛra fangatigiw ta jɔn ye, a b’a fɔ o tigi ye ko:
«Ni masacɛw nana ele ye, o bɛna wuri ka lɔ;
ni kuntigiw nana i ye, o bɛna o kinbiri gban,
Matigi Ala, Ala kankelentigi kosɔn,
Izirayɛli ta Ala saninman min ka ele ɲanawoloma, ale Ala kosɔn.»
8 Matigi Ala ko:
«Ne ka aw ta daariri lamɛn ne diyanya wagati ra,
ne ka aw kisi kisiri lon na;
ne bɛna ne janto aw ra, ka aw sigi,
janko ka jɛnɲɔgɔnya don ni mɔgɔw ye aw sababu ra,
ka jamana lɔ kokura,
ka bɛɛ ninyɔrɔ di a ma nin jamana halakinin na,
9 k’a fɔ kasodenw ye ko: ‹Aw ye bɔ,›
k’a fɔ dibiramɔgɔw ye ko: ‹Aw ye bɔ dibi ra!›
Ni o kɛra, o bɛna domuni kɛ siradaw ra,
o bɛna o ta baro sɔrɔ kurukɛrɛfɛyɔrɔw bɛɛ ra.
10 Kɔngɔ tɛna o sɔrɔ tuun, walama minlɔgɔ;
kongokolon fundɛnin walama tere tɛna o jɛni,
sabu min bɛ hina o ra ale bɛna bla o ɲa,
ka taga ni o ye bununjiw kɔrɔ.
11 Ne bɛna tɛmɛsiraw bɔ ne ta kuruw bɛɛ ra,
ne ta sirabaw bɛɛ bɛna dakaɲa.
12 «O natɔ flɛ ka bɔ fɔ yɔrɔjan!
Dɔw natɔ flɛ ka bɔ sahiliyanfan na, ani terebenyanfan na;
dɔw bɛ nana ka bɔ fɔ Sinimu jamana ra.
13 Sankolo, ele ye ɲagari ni kanba ye!
Dugukolo, ele ye ninsɔndiya!
Kuruw, aw ye ɲagari fɔ ka pɛrɛn,
sabu Matigi Ala bɛ a ta mɔgɔw jusu saaro,
a bɛ hina a ta mɔgɔ ɲanibagatɔw ra.»
Ala tɛ ɲina a ta mɔgɔw kɔ
14 «Siyɔn dugumɔgɔw tun b’a fɔra ko: ‹Matigi Ala banna an na,
Matigi ɲinana an kɔ!›
15 Yala muso bɛ se ka ɲina a ta sinminden kɔ wa?
Yala a tɛ hina a yɛrɛ woroden na wa?
Hali ni musow bɛ ɲina,
ne kɔni tɛna ɲina aw kɔ.
16 Aw m’a ye, ne ka aw tagamasiyɛn kɛ ne borotɛgɛ kɔnɔ;
aw ta dugu kogow tagamasiyɛn bɛ ne ɲa kɔrɔ tuma bɛɛ.
17 «Aw ta denw bɛ borira ka na;
aw ta dugu cibagaw, ani a cɛnbagaw bɛna bɔ aw cɛ ra.
18 Aw ye aw ɲa kɔrɔta ka aw lamini flɛ:
aw ta denw bɛɛ bɛ lajɛnna ka na aw fɛ.
Ne bɛ kari ko sigiya t’a ra, ne le ye Ala ɲanaman ye,
Matigi Ala ko ten,
ko aw bɛna aw denw siri aw yɛrɛ ra i ko masirifɛnw,
ka aw yɛrɛ masiri ni o ye i ko kɔɲɔmuso.
19 Ɔnhɔn, aw ta tomow, ani aw ta yɔrɔ lakolonw,
aw ta jamana min tun halakira,
o yɔrɔw bɛna dɔgɔya aw ta mɔgɔw ma;
aw tɔɲɔbagaw fana bɛna taga ka mabɔ aw ra.
20 Aw tun b’a miiri ko aw bɔnɔna aw ta den minw na,
olugu le bɛna to k’a fɔ aw toro kɔrɔ ko:
‹Yɔrɔ ka dɔgɔ an ma,
aw ye yɔrɔ dɔ di an ma, an bɛ se ka sigi min na!›
21 O tuma aw bɛna a fɔ aw yɛrɛ kɔnɔ ko:
‹Jɔn le ka nin denw bɛɛ woro ne ye sa?
Ne tun kɛra denntan ye, ka kɛ denworobari ye,
o tun ka ne mina, ka ne gbɛn ka taga jamana wɛrɛ ra;
o tuma jɔntigi le ka nin denw lamɔ sa?
Ne tun bɛ ne kelen na,
o tuma ninnugu bɛɛ bɔra min le?› »
22 Dunuɲatigi Ala ko:
«A flɛ, ne bɛna ne boro lawuri siyaw ma,
ka ne ta tagamasiyɛn kɔrɔta jamanaw ye;
janko o ye aw dencɛw ta o boro kɔnɔ ka na ni o ye,
ka aw denmusow sigi o kamankunw kan ka na ni o ye.
23 Masacɛw le bɛna kɛ aw lamɔfaw ye,
o ta masamusow bɛ kɛ aw lamɔbamusow ye;
o bɛna na o kinbiri gban aw ɲa kɔrɔ ka o ɲa biri dugu ma,
fɔ ka aw sennabuguri nɛmu.
Ni o kɛra, aw bɛna a lɔn ko ne le Matigi Ala ye,
ko mɔgɔ minw bɛ o jigi la ne kan, olugu tɛna maroya.»
24 Cɛfari ka fɛn minw sɔrɔ kɛrɛ ra, yala o bɛ se ka bɔsi a boro wa?
Yala kuntigi fariman ta mɔgɔ minaninw bɛ se ka bɔsi wa?
25 Ayiwa, Matigi Ala ko:
«Can lo, cɛfari ta mɔgɔ minaninw bɛna bɔsi,
kuntigi fariman ka fɛn minw sɔrɔ kɛrɛ ra, o bɛna bɔsi.
Ne yɛrɛ le bɛna aw kɛrɛbagaw kɛrɛ,
ne yɛrɛ le bɛna aw denw kisi.
26 Ne bɛna aw tɔɔrɔbagaw yɛrɛ ta sogo le di o ma o y’a domu,
o bɛna o yɛrɛ jori le min i ko duvɛnkura, fɔ ka ɲanamini.
Ni o kɛra, adamaden bɛɛ bɛna a lɔn
ko ne le ye Matigi Ala ye, aw kisibaga,
ani aw kunmabɔbaga, Yakuba ta Ala fangatigi.»