61
Matigi Ala ta ciraden ta baara
1 Dunuɲatigi Ala Nin bɛ ne kan;
sabu ale Matigi Ala ka ne ɲanawoloma,
ka ne ci ka taga kibaro diman fɔ ɲanibagatɔw ye,
ka mɔgɔ jigi tigɛninw jigi tugu,
ka mɔgɔ minaninw kunmabɔri ko fɔ o ye,
ka kasodenw lablari ko fɔ o ye,
2 ka Matigi Ala ta nɛɛma wagati,
ani an ta Ala ta dimibɔlon ko fɔ mɔgɔw ye,
ka mɔgɔ kasibagatɔw bɛɛ jusu saaro.
3 Siyɔn dugumɔgɔ minw bɛ kasira, ne bɛna olugu laje;
ne bɛna nɔɔrɔ la o kan, bugurigbɛ nɔ ra;
ka ninsɔndiya turu kɛ o kun na, kasi nɔ ra;
ka tandori derege don o ra, ɲanasisi nɔ ra.
Ni o kɛra, mɔgɔw bɛna o wele ko terenninya ta yirisunw,
Matigi Ala ka yiri minw turu a ta bonya kama.
4 O bɛna tomokɔrɔw lɔ kokura;
o bɛna wagati tɛmɛninw ta bon benninw lawuri,
o bɛna dugu cininw lɔ kokura,
dugu minw tun kɛra yɔrɔ lakolonw ye kabini wagatijan.
5 Jamana wɛrɛ mɔgɔw le bɛna wuri ka na aw ta bɛganw kɔrɔsi;
siya wɛrɛ mɔgɔw le bɛna kɛ aw ta sɛnɛkɛbagaw ye, ka aw ta rɛzɛnforow sɛnɛ.
6 Aw kɔni, aw bɛna wele ko Matigi Ala ta sarakalasebagaw;
o bɛna a fɔ aw ma ko an ta Ala ta baaradenw.
Aw bɛna siya tɔw ta naforo diyabɔ,
ka o ta bonya ta ka aw yɛrɛ waso ni o ye.
7 Maroya min sera aw ma, aw bɛna bonya fla le sɔrɔ o nɔ ra;
dɔgɔyari min sera aw ma, aw bɛna ɲagari le sɔrɔ o nɔ ra.
Aw bɛna aw ta jamana ta bonya ɲɔgɔn fla le sɔrɔ;
aw ta ninsɔndiya tɛna ban ka ye.
8 «Sabu ne Matigi Ala, ne bɛ can kanu,
nka ne bɛ tɔɲɔri ni janfa kɔninya;
ne bɛna o ta koɲumanw sara o ye, ne ta kankelentigiya kosɔn,
ka jɛnɲɔgɔnya* wuribari don ni o ye.»
9 Siyaw bɛɛ bɛna o ta durujaw silɔn,
jamanaw bɛɛ bɛna o ta denw silɔn;
ni mɔgɔ o mɔgɔ ka o ye, o tigi bɛna a lɔn
ko Matigi Ala ta siya barakamanw lo.
Zeruzalɛmu ta barakalaridɔnkiri
10 Ne bɛna ninsɔndiya kosɛbɛ Matigi Ala kosɔn,
ne jusu bɛ ɲagari ne ta Ala kosɔn;
sabu a ka kisiri ta faniw don ne ra,
ka terenninya ta deregeba don ne ra,
i ko kɔɲɔcɛ bɛ jalamugu fugula siri a kun na cogo min na,
i ko kɔɲɔmuso bɛ a ta masirifɛnw don a yɛrɛ ra cogo min na.
11 Siman bɛ falen ka bɔ dugukolo ra cogo min na,
nanfɛnw bɛ falen nankɔ ra cogo min na,
Dunuɲatigi Ala bɛna terenninya ni tandori falen ten le siyaw bɛɛ ɲa na.