29
Ofiya wa Yaakhumpa nti wa Harani
1 Yaakhumpa khurutela safwari yawe khulawa mpakha nti oriiye phantte lintthamuwaawo njuwa.
2 Siikhu moote, khweekesa nkerekhere wa nttapo khoona nlipu mmote ozukuleliwe ti maphanko mattatthu a pwittipwitthi zirapaleliye. Waari nlipu zaari onywisiwaavo maati, liwe laari ofinikhaniwakaaye nlipu opule laari liwululene.
3 Ti eto amakhampuzi aari owejelanakaaye yoori asusise liwe ntthile enkhe nyama zaya maati oonywa, nawiisha khurutiselavo liwe ntthile.
4 Yaakhumpa khuwoozela amakhampuzi apale araka: “Mweeyo attwiizaku, mwaavayi?”
Yo khujipu araka: “Fweeyo nti etthu Harani.”
5 Ye khuri: “Mwininjuwa Labani ntuulu wa Nahoori?”
Yo khujipu araka: “Aa, nininjuwa!”
6 Khuwoozela theenya yoori: “Nkumi?”
Yo khujipu yoori: “Aa, nkumi! Mwanawe Rakeele ti oto antaaye apho na pwittipwitthi za papaawe.”
7 Yaakhumpa khulupa yoori: “Nalelo khunaripe, khunafiye wakathi wookusanya maphanko. Mwinkhe maati pwittipwitthi epo mwilawe mwajise opheya.”
8 Ila yo khujipu araka: “Khaninwahi, nina yoowejela pwittipwitthi zooshi zikusanyeye attaapha nisusise liwe ntthi lifinikhaniweeyo nlipu, ninkhe pwittipwitthi zetthu maati zinywe.”
9 Eettaka ottakhula etthiipile khusala ata Rakeele na pwittipwitthi za papaawe, mwaasa yoori aari nshuki.
10 Yaakhumpa n'oomoona Rakeele mwaana wa halwiye Labani eettaka ota na pwittipwitthi, khulawa khufunula nlipu khwinkha maati pwittipwitthi za halwiye.
11 Nawiisha khumwinkha peezhu khusala alila.
12 Aphano Yaakhumpa khumuuza Rakeele yoori: “Miiyo ki jaama wa papaawo, ki mwaana wa Rapekha.” Ye khutthira alawaka omuuza papaawe.
13 Labani n'oosiila hapari za Yaakhumpa mwaana wa nlupuwe, khusala atthira alawaka okutthanana. N'onsikana khumpatikha khumpejari, khunthuula khusala alawana owawe. Ye khumuuza Labani zooshi epile zanvireliyeezo.
14 Aphano Labani khulupa yoori: “Weeyo khweele ojamaayaku, taamu yetthu moote.”
Yaakhumpa khwiikhala mpakha wiisha mweezi ari ottuukho.
15 Elottelanaka Labani khuri: “Hatha nkhama ojamaayaku, onakhola khaazi mahala? Kuuze phakari yawo.”
16 Labani aarina aanaawe awiri aakha; otu nwulu aari wiitthiwa Liiya. Nttiitthi aya aari wiitthiwa Rakeele.
17 Liiya aari woosizila maasho, ila Rakeele aari wooshapweya mwiili awe na omaasho wawe.
18 Yaakhumpa mwaasa wootuveliwa ti Rakeele, khulupa yoori: “Kintta okhola khaazi nyaakha sapa okilooze mwanawo otu nttiitthi aya.”
19 Labani khujipu yoori: “Kemaani! Ti yooshapweya wuulooza weeyo zayita onlooza ntthu nkinoko. Osala wiikhala attaapha na-miyo.”
20 Yaakhumpa khukhola khaazi nyaakha sapa yoori anrale Rakeele. Nyaakha epile sapa ye khoona nkhama siikhu vattitthiiru mwaasa wootuveliwa channu.
21 Ye khumuuza Labani yoori: “Aphano kiloozeni muukhaaka, maana zafiyela siikhu naasiilaniyeezo.”
22 Labani khuwaakhuwela atthu a waatta a mmuti mphule khuretta njampo.
23 Ila n'ooripa khunthuula mwanawe Liiya khumwinkha Yaakhumpa khurapalelana.
24 Labani khumwinkha karumeyaawe Ziilipa mwanawe Liiya yoori asala anrumeela.
25 Ochiiyeevo, Yaakhumpa khumoona yoori ti Liiya. Ye khulankha olawa omuuzela Labani yoori: “Niini epi okiretteliyeezo? Miiyo akaari okhola khaazi mwaasa wa Rakeele? Khi kiiswa yaya niini okittettekhaka?”
26 Labani khunjipu yoori: “Fweeyo mmuti mwetthu mphu khanizowereeni onlooza otu nttiitthi nttunkhulu ahinaraliwe.
27 Amana zivira siikhu sapa za njampo ntthi, nintta wuulooza otu nkina, paata onaahitaavo okikholela khaazi theenya nyaakha sapa.”
28 Ye khukhupali, khuvira siikhu epile sapa za njampo la harusi ya Liiya, Labani khunthuula Rakeele khunlooza.
29 Khunthuula karumeyaawe Biila khumwinkha mwanawe Rakeele yoori asala anrumeela.
30 Yaakhumpa khurapalelana Rakeele khwiiya wontuvela zayita Liiya. Khurutela theenya onkholela khaazi Labani mpakha nyaakha sapa.
Aana a Yaakhumpa
31 Nnyizinku nawoona yoori Yaakhumpa khaari otuveliwa ti Liiya, khumwinkha mavokozi. Ila Rakeele khaari ovokola.
32 Liiya khwiimittha khumpattha mwaana wanlume, khuntthaja nzina la Ruubeni. Khuri: “Nnyizinku oona ohoowa waka. Aphano phi kinttelaavo ophetiwa ti mannaka.”
33 Khwiimittha theenya khumpattha mwaana nkinoko, khuntthaja nzina la Simiyooni. Khulupa yoori: “Nnyizinku asiila ohituveli waka, akinkha mwaana nkina.”
34 Khwiimittha theenya swaafu kiina khumpattha mwaana khuntthaja nzina la Leevi, khulupa yoori: “Aphano mannaka onttela wiiya wookusanyeya na-miyo mwaasa wompatthela aana attatthu.”
35 Khurutela wiimittha theenya, khumpattha mwaana khulupa yoori: “Swaafu eti kinttela onsifu Nnyizinku.” Ti eto antthajiyeeyo nzina la Yuuda. Aphano khumwiishela mavokozi.