21
Polo Jetusaleme peamo doko
1 Epesasa tange dupame naima laminao pupala mapateaminopa, naimame dupa lasa latala sipinya pituu Kosa yuu taono dokonya tolao peama. Taita dopa pyoo yuu doko yakinatala sipinya pituu taono Losa peama. Losa yuu doko yakinatala taono Patata lenge dokonya peama.
2 Patata dokonya katao sipi mende Pinisia yuu dokonya paanya pianya naima dokonya pituu peama.
3 Sipinya pao pituu Saipotasa yuu doko kingi koya-kaita siamopa kandamama Sitia yuu taono Taya lenge dokonya peama. Sipi dokome pinju mandyuu yuu dokonya yakineamopa naima isa peama.
4 Taya yuu dokonya naimame masoo miningi endakali mendatupa kandasetala dupa-pipa kote kalange awapa kateama. Oli Sipitisa dokome dupa lungu piamopa dupame Polo lamaiyoo, “Emba Jetusaleme napupi,” leami.
5 Dokopa naima yuu dokonya katapenge gii dutupa katao etapala yuu doko yakinao peama. Masoo miningi akali dupa pitakapi dupanya enda wanepi dupame naima laminao taono dokonya kamalya peami. Dokopa solowata pete leamba dokonya lumame pitipala loma siama.
6 Loma setala naima dupa-pipa lasa laloo petala sipi dokonya pyakalyiamanopa dupa nyakamanya andaka pilyiami.
7 Naimame Taya yuu doko yakinatala sipinya pituu pao Tolemesa peama. Yuu dokonya masoo miningi kaiminingi dupa-pipa kingi nyepala kote mendai awapa kateama.
8 Dopa petala taita dopa pyoo sipinya pituu Sisatia yuu taono dokonya peama. Pupala waiyakali Pilipa lenge dokonya andaka awapa kateama. Pilipa doko wamba Jetusaleme tange masoo miningi dupame akali kalange yapao nyiamino dokonya mende-pyaa.
9 Baanya wanenge mapuakae kitomende dutupa akali napenya Gotenya pii doko panao lamaiyoo petengema-pyaa.
10 Naima kote mendatupa yuu dokonya kateamanopa potopesa Akapasa lenge doko Jutia yuu dokonya katao epea.
11 Baa naima kateamasa ipupala Polonya matapu doko lyokao nyoo Akapasa baanya kingi mokopi dupa yaki petala baame lao pituu, “Oli Sipitisa dokome dapa lelyamo: ‘Juta endakali Jetusaleme kalyamino dupame matapu dake tange doko dapa pyoo anjetala, masoo minala naengema endakali dupa maitamina,’ lelyamo,” lea.
12 Baame pii leamo doko sepala naimapi yuu dokonya tange endakali dupapimi, “Polo emba Jetusaleme napupi,” lao kyoto joo leama.
13 Dopa leamanoaka doko, Polome lao pituu, “Nyakamame aipuma ee lao nambanya mona kenda pisekelyamipi? Nambame Kamongo Jisasa lao masetala Jetusaleme pao anjetae palito dokonya iki depa latae nakalyo. Daa, kumato lao apata depa latae kalyoakana,” lea.
14 Dopa leamopa naimame baanya masingi doko aloo pisakamaipenge nanjiamosa Kamongo Goteme masilyamoli pyoo pina kayama latala pii mende naleama.
15 Kote mendatupa pateamopa naimanya oapi dupa depa latala Jetusaleme peama.
16 Sisatia tange Jisasa masoo miningi endakali mendapuame naima laminao akali Nesonenya andaka palyepale lao mapala peami. Akali Nesone doko Saipotasa tange mende-pyaa. Baame ee kana longo masoo minao katea-pyaa.
Polome Jemesa kanja peamo doko
17 Naima Jetusaleme pao pyakameamano gii dokopa masoo miningi kaiminingi dupame naima mona yaepao lanyiami.
18 Taita dopa pyoo Polo apata Jemesa peteamo dokonya peama. Isingi akali dupa pitaka dokonya awapa peteamiaka-pyaa.
19 Dokopa Polome dokaita kingi nyepala baame kalai piamo dokonya Goteme endakali tata waka dupa-kisa piamo dupa pitaka panao lamaiyokondape pia.
20 Dupame pii doko sepala Gote lao tama piami. Dopa petala Polo lamaiyoo, “Kaimia, embame kandateleno. Juta endakali tausene longo dupame masoo minao katapelyamino. Dokaita pitakame mana setapae dupa etete minokondape pyoo katamana lao masingima.
21 Dopaka doko, akali mendapuame dokaita lamaiyoo lao pituu, ‘Polome Juta endakali tata waka kaina dupanya kalyamino dupame mana setapae Moseseme nyiamo dupa yakinalapape lenge. Nyakamanya wane dupanya elya pingi kambu kepala nayalapape lenge. Mana wambatae dupa watao minala nayalapape lengena,’ lao lamaipimi.
22 Dopana, naimame aipa pimape? Dokaitame emba ipatelenona lapae tenda salamini lumu.
23 Dopana, naimame emba langitamali pipi. Naimanya akali kitomendeme Gote kandao mendita mende kiningi pitamana leami.
24 Embame akali dutupa-pipa awapa pupala dutupame tangenya kaimala pipae walya pyao nepalanya mana miningimali pyoo minao katape. Embame dutupa nisoo yole setakamaipiaka. Dopa petatenopa akali kitomende dutupame nyakamanya mana doko etelyamona lao aiyomba iti tokatami. Mana setapae miningi endakali dupa pitakame mana dutupa kandatala Moseseme mana nyiamo dupa embame watao miningi lamo lao kandatami. Mendapuame emba-kisa pii seteamino dupa mee lamona lao masetamiaka.
25 Wamba naimame pii wasepala endakali tata waka Gote lao masoo minao kalyamino dupanya pepa pyasakamaiyama. Dokaitame sambo gote dupanya kundi maitae nee dupapi, taiyoko dupapi, mena yakapi mange minao kaimindokao kumasetae dupapi dupa nala nayao kepo kolao paenge mana dupa kaena lao pepa pyaseteamana,” lao Jemesapi Jetusaleme tange isingi akali dupapimi Polo lamaiyami.
26 Dopa leaminopa Polome akali kitomende dutupa lanyepala dupa-pipa kaimala pipae walya pyao nepenge mana doko miniami-pyaa. Dopa petala taita dopa pyoo Polome losuu anda andake dokonya pupala pitisa dupa lamaiyoo, “Kote tokange patatamopa kaimala pipae walya pyao nepenge mana minilyamano doko minao etatama. Dokopa nyakama mendai mendai lawame Gote lao kundi maiya ipatamina,” lamaiya-pyaa.
Juta dupame Polo losuu anda andake dokonya anjiamino doko
27 Maitakao mana doko minapenge gii kalange doko ipanya piamopa Juta endakali Esia yuu dokonya katao epeamino dupame Polo losuu anda andake kame dokonya kateamo kandatala, endakali pitakanya mona minao kyakasiami-pyaa. Dokopa dupame puu lao Polo minatala puu lao dapa leami-pyaa.
28 “Nyakama Isataele endakali dupame naima nisala ipupa! Akali dakeme yuu pitakanya pupala endakali dupa lamaiyoo, naima tata dokopi, naimanya mana setapae dupapi, panda epe dakepi dutupa kandanya palyina lao mana lamaingi. Dee mana koo mendeaka minao baame endakali tata waka mendatupa laminao losuu anda andake kame dakenya ipupala panda epe dake kapo pilyamona,” leami-pyaa.
29 Dupame Epesasa tange akali Topimasa lenge doko Polopa taono Jetusaleme dokonya kateambino kandatala Polome laminao losuu anda kame dokonya ipape lao masetala dopa leami-pyaa.
30 Dokopa Jetusaleme tange endakali dupa pitakame mona koo palyetala alo pyao ipao Polo minatala pyalya lao nyoo kamaka peami-pyaa. Dopa peteaminopa mendapuame pupae lao losuu anda andake dokonya kame kaitini dupa pai leami-pyaa.
31 Dopa petala Polo pyao kumasalanya pyoo kateaminopa Jetusaleme tange dupa pitaka kyakalya kyakana pyoo kalyamino lapae doko yanda singi amii isingi mupa doko lamaiyamino sia-pyaa.
32 Sepala baame lee mendai yanda singi amii mendapuapi amii isingi mendapuapi dupa lanyepala awapa alo pyao epeami-pyaa. Epeaminopa Jetusaleme tange dupame kandatala Polo dee napinya kayami-pyaa.
33 Dokopa yanda singi amii isingi mupa dokome Polo kateamo dokonya tengesa ipupala baa puu lao minia-pyaa. Minatae katao yanda singi mendapuame ŋili kende lapomame Polo anjina latala baame endakali kateamino dupa pisoo, “Akali dake apipi? Akali dakeme aipa pyaape?” lea-pyaa.
34 Dopa leamopa endakali longo kateamino dupanya mendapuame Polo kandao pii mendeaka lao ae leaminopa mendapuame mendeaka lao ae lao kilikale leaminosa yanda singi amii isingi mupa dokome pii tenge angi doko kapa pao sepenge najia-pyaa. Dokopa baame yanda singi dupa lamaiyoo, “Polo laminao yanda singi anda mendenya kolandena,” lea-pyaa.
35 Yanda singi dupame Polo laminao anda namba ketae kolandenge kana toko dokonya pyakalyalanya piaminopa endakali longo kateamino dupame koyasemana kalai piaminosa yanda singi dupame Polo soo kana toko dokonya pyakalyiami-pyaa.
36 Endakali longo dupame watao ipao puu lao lao pituu, “Baa pyao kumasema!” leami-pyaa.
Polome baa tange dopa pipaena leamo doko
37 Yanda singi dupame Polo laminao andaka kolandalanya piaminopa baame yanda singi amii isingi mupa doko lamaiyoo, “Nambame pii mende kapa pao emba langyuape?” lea-pyaa. Dopa leamopa yanda singi amii isingi mupa dokome baa lamaiyoo, “Emba Gitiki pii lengepe?
38 Kuki wambale Isipe tange mendeme akali tausene kitomende dupa nyepala konjua dupa minao yanda mende pyaanya endakali napalenge yuu dokonya peana, emba akali dokope lao masilyona,” lao pisia-pyaa.
39 Dopa leamopa Polome, “Namba Juta. Namba Silisia yuu dokonya taono kenge singi Tasasa tange mendena, nambame endakali dakaita pii mende lamaiyoape?” lea-pyaa.
40 Dopa leamopa yanda singi amii isingi mupa dokome kapana lateamopa Polome kana toko ketae dokonya toya katao kingi pee latala pii kaena lea-pyaa. Dokopa dupame pii kayateaminopa Polome Iputu pii lao dapa lea-pyaa: