23
1 Dokopa Polome akali kanjole limbiamino dupa kandokondape petala lao pituu, “Kaimia paluma, nambame Gotenya enomba dokonya mona tolatae paliuu katengena, indupapi dopaka pyoo kalyo,” lea-pyaa.
2 Dopa leamopa pitisa mupa Ananayasa dokome akali mendapua Polo kateamo dosa kateamino dupame Polonya kambu takina lea-pyaa.
3 Dokopa Polome baa lamaiyoo, “Emba kame nengetena tamopae mende kendeme iki tambombatae katenge dopale joo kalyenona Goteme emba pyata! Embame angenya pituu mana setapae dupa watao namba kosimi leenoaka doko, embameaka mana yalao namba dupame pina leeno,” lea-pyaa.
4 Dopa leamopa akali mendatupa tengesa dosa kateamino dutupame baa lamaiyoo, “Embame pitisa mupa doko kandao pii koo leepe?” leami-pyaa.
5 Dokopa Polome lao pituu, “Kaimia paluma, nambame baa pitisa mupana lao masala naelyo. Pii pepa pyapae singi dokonya, ‘Embame embanya tata dokonya isingi akali doko kandao pii koo laa nayape,’ lapae singi doko nambame masilyona,” lea-pyaa.
6 Dokopa kanjole limbiamino doko Satyusipi Patasipi dupa peteamino Polome kandatala puu lao lao pituu, “Kaimia paluma, namba Patasi, namba Patasimiaka mandipae. Nambame endakali kumapae malunya sakatatamano doko lao masoo malisoo katenge dokonya nyakamame namba kosimi lelyaminona,” lea-pyaa.
7 Dopa leamopa Patasipi Satyusipi dupame pii yanda pyoo latala limbiamino doko wakale pyoloo piami-pyaa.
8 Doko, Satyusi dupame endakali kumapae malunya sakatala nayatamina, enjele mendapua nakatengena, sipitisa mendapua nakatengeakana lengema-pyaa. Dopaka doko, Patasi dupame dutupa pitaka masoo lao panengema-pyaa.
9 Dopa pingima dokonya ae andake mende latala mana setapae masingi akali Patasi dupanya mendapuame toya katapala etete kyoto joo lao pituu, “Naimame akali dake kandamanopa kosimi lapenge tenge mende baa-kisa nasilyamo! Sipitisa mendeme tamopi enjele mendeme tamopi baa pii lamaita aipape?” leami-pyaa.
10 Dokopa tata dolapome pii yanda pyoloo piambino doko andake jetala Polo minao kumasetamili jiamosa yanda singi amii isingi mupa dokome paka kaya-pyaa. Dopa petala yanda singi dupame Polo lanyepala laminao nyakamanya andaka pena lea-pyaa.
11 Maitakao kuka dokonya Kamongo dokome Polo paleamo dokonya ipao katapala lao pituu, “Emba kyoto joo katape. Jetusaleme yuu dakenya nambanya lao lao panao kateeno mendai dopaka pyoo Loma yuu dokonya lao panapengena,” lea-pyaa.
Polo pyamana lao pii wasiamino doko
12 Yuu yongateamopa Juta dupa limbatala pii mende lao yaki piamino doko etete lalu lao lelyamanona lao lao pituu, “Naima neepi endakipi nala nayao katao pao Polo pyao kumasetama gii dokonya tuu latama,” leami-pyaa.
13 Pii lao yaki piamino akali dupa kingi ita kitomende-kisa dee mendatupa apata-pyaa.
14 Dupame pitisa mupa dupapi isingi akalipi dupa kateamisa pupala lao pituu, “Naimame pii lao yaki petala lalu lao latelyamanona lao, ‘Neepi endakipi etete kuki mende nala nayao katao pao Polo pyao kumasetama gii dokonya tuu latama,’ lalamano.
15 Dopana, indupa nyakamapi kanjole dupapimi amii isingi mupa dokonya pii pyasakamaiyoo, baame Polo laminao nyakama pititamisa epena laapape. Nyakamame sambo waa katao lao pituu, ‘Naimame Polonya pii dokonya tenge dupa deaka sokondape pimana lao masilyamanona,’ laapape. Baa nyakama pititamisa ipao lai petala nayatamopa pyao kumasemana depa latae katamanana,” leami-pyaa.
16 Dopaka doko, Polo pimalengenya ikiningi dokome Polo kaitinisa isetala pyao kumasetamana leamino pii doko sepala baame yanda singi amii dupanya anda dokonya pupala Polo lamaiya-pyaa.
17 Lamaitiamopa Polome yanda singi amii isingi mende epena latala, “Wane dakeme yanda singi amii isingi mupa doko pii mende lamainalena, embame baa lamina,” lea-pyaa.
18 Dopa latemopa amii isingi dokome wane doko laminao yanda singi amii isingi mupa doko peteasa pupala baa lamaiyoo, “Akali anjetae katenge Polo dokome namba ipu latala wane dakeme emba pii mende langina lamina lapyanya, laminao epelyona langyapomona,” lea-pyaa.
19 Dopa lateamopa yanda singi amii isingi mupa dokome wane doko kii minao umbisale pupala nyalambo iki katao, “Embame namba aki pii mende langitipi?” lao pisia-pyaa.
20 Dopa lao pisiamopa wane dokome lao pituu, “Juta dupame sambo waa katao pii lao kambutala, ‘Naimame Polonya pii tenge mendapua sokondape pyoo setama lao masilyamanona, embame baa laminao naima kanjole dupa-kisa ipupi lamana,’ lalamino.
21 Dopaka doko, embame dupanya pii doko sakamaiya nayape. Doko, dupanya akali kingi ita kitomendenya ulutename Polo pyao kumasetami gii dokonya tuu lao neepi endakipi nala nayao katatamana lao pii lalu lao lelyamanona lalamino. Indupa dupame dopa pimana lao depa latala embame kanjole dupanya pii doko ŋee laale lao masilyaminona,” lea-pyaa.
22 Dopa leamopa yanda singi amii isingi mupa dokome wane doko lamaiyoo, “Embane pii namba langyeno dutupa endakali mende lamaiya nayape,” daa latala pena lea-pyaa.
Kolotiasa Lisiasa dokome Polo Pilikisa kateasa pena leamo doko
23 Dokopa yanda singi amii isingi mupa dokome yanda singi amii isingi lapoma epena latala dolapo lamaiyoo, “Nyalambome yanda singi amii andate lapomapi, dee mena osa maitanya petenge akali kingi ita kalangepi, dee yandate miningi akali andate lapoma dupapi dutupa-pipa Polo Sisatia yuu dokonya kuka kiloko mange mendai wakyoo latamopa penalena depa lena lamaiyepape.
24 Akali Polo doko pitipenge mena osa mendapua depa latakamaitala baa kapomane andake Pilikisa kalyamo dokonya auu pyoo laminao pupalena,” lea-pyaa.
25 Dopa latala baame pepa mende dapa lao pia-pyaa:
26 “Namba Kolotiasa Lisiasame pepa dake kapomane andake akali epe Pilikisa embanya pyao peekelyo. Emba auu pyoo katape.
27 Juta dupame akali dake minatala pyao kumasalanya piaminopa baa Loma tangena lapimino sepala nambapi yanda singi amii dupapimi alo pyao pupala dupanya kingi pongo liangao nyipuma.
28 Dokaitame aipuma akali dake-kisa pii setamipi lao sotoo latala nambame baa nyakamanya kanjole limbao pitipimino dokonya nambame baa laminao pupu.
29 Dopa petala akali dake-kisa pii setamino dupanya baa pyao kumasepengepi anjepengepi tenge mende baa-kisa sipumu nakandapu. Dupame nyakamanya mana setapae dupanya pii tenge mendapuanya iki baa-kisa pii setapimi.
30 Juta dupame akali dake pyao kumasemana lao pii wasoo lapimino doko mendeme namba langitapyanya nambame baa emba katapisa epena lelyo. Akali dake kandao kosimi lamana lapimino dupame emba-kisa panao lena lao lamaitilyona,” lao yanda singi amii isingi mupa dokome Pilikisanya pepa pyakamaiya-pyaa.
31 Dopa lao pyapeamopa yanda singi amii dupame pii leamoli pyoo Polo laminao taono Andipatisa yuu dokonya kuka peami-pyaa.
32 Taita dopa pyoo yanda singi amii kaitini peamino dupame mena osa maitanya pituu peamino dupa-pipa Polo awapa Sisatia yuu dokonya pena kayapala nyakama andaka pilyiami-pyaa.
33 Akali mena osa maitanya pituu peamino dupame Sisatia yuu dokonya pao pyakamatala pepa pyapae doko kapomane andake doko maitala Polo baanya kinginya yakineami-pyaa.
34 Dokopa kapomane andake dokome pepa pyapae doko itaki pyao kandatala Polo pisoo, “Emba yuu potopinja anja tangepe?” lea-pyaa. Dopa leamopa Polome, “Namba Silisia tangena,” lea-pyaa.
35 Dokopa kapomane andake dokome Polo lamaiyoo, “Akali mendapuame emba kosimi laa ipataminopa nambame embanya pii doko sakatona,” lea-pyaa. Dopa latala baame yanda singi mendapuame Polo laminao pupala Etoteme anda andake piamo dokonya isoo katena lea-pyaa.