☰ APOSELE 7
7
Sitipename pii leamo doko
1 Dokopa pitisa mupa dokome pii dutupa kiningipi lao pisia-pyaa. 2 Sitipename* pii doko yanu pyao pituu, “Kaimia palupi, apane palupi, nyakamame salapape. Wamba naimanya yumbange Apotakame Etane yuu taono dokonya ene paanya Mesopotemia yuu dokonya kateamo gii dokopa tii pipae Gote doko baa-kisa epea-pyaa. 3 Ipupala* Apotakame lamaiyoo, ‘Embanya yuupi tatapi dupa yakinatala, yuu mende nambame emba laitaka pito dokonya paale,’ lea-pyaa. 4 Dopa* leamopa baanya yuu Kalatia doko yakinatala Apotakame pao Etane yuu dokonya katea-pyaa. Baanya takange doko kumateamopa Goteme baa laminao nyakama kalyamino yuu dakenya epea-pyaa. 5 Goteme* Apotakame baa yuu kuki moko tee mendaipi mende baanya jina lao maiya nayamoaka doko, baapi baanya mandipae tanga katatamino dupapi dupa yuu dakenya katataminopa lao maituna lea-pyaa. Gii dokopa Apotakame baa wane namandenya mee katea-pyaa. 6 Goteme** pii dapa lea-pyaa: ‘Apotakamenya mandipae dupa endakali waka dupanya yuu dokonya tisa nao katatami. Yuu dokonya tange dupame Apotakamenya mandipae dupa kendemane joo katena latala ee kana andate kitomende koyasoo katatami. 7 Dopa* pitaminoaka doko, nambame dokaita kenda pipae maitu. Dopa pitopa Apotakamenya mandipae dupame yuu doko yakinatala yuu dakenya ipao katao namba lao tama tama pyoo katatamina,’ lea-pyaa. 8 Dee* Goteme Apotakame-kisa pii mende lao pituu, wanenya elya pingi kambu kepenge pii doko lao yaki pia-pyaa. Apotakameme Aisake mandipala kote kalange pateamopa baame wane dokonya elya pingi kambu kepakamaiya-pyaa. Maitapyao Aisakeme Jekope mandipala elya pingi kambu kepakamaiya-pyaa. Jekopeme naimanya yumbange kingi ita mende-kisa dee lapoma dupa mandipala dopaka pia-pyaa.
9-10 “Naimanya** yumbange dupame Josepe tilya maitala munimi sambao Isipe yuu dokonya nyoo pena lao maiyami-pyaa. Dopaka doko, Goteme baa-pipa awapa katao kenda pipae dupa pitakanya Josepe pyoo nyia-pyaa. Josepeme Isipe yuu dokonya kiŋi Peto kateasa pupala mona auu pisingipi mana kandengepi Goteme baa maiyamo dupa panasiamopa Petome kandea-pyaa. Kandatala baame Isipe yuu dokopi baanya anda dupapi dupa Josepeme isoo katena lea-pyaa. 11 Gii** dokopa Isipe yuu dokopa Kenane yuu dokopa dolaponya lopo andake mende siamopa etete kenda kayami-pyaa. Ongopa naimanya yumbange dupame neepi mende kandao nyoo naneami-pyaa. 12 Dopaka doko, Jekopeme Isipe yuu dokonya nee silyamo leamino doko sepala naimanya yumbange dupame wambao kanja pena lea-pyaa. 13 Dee* lapo pyoo peaminopa Josepeme baanya kaiminingi dupa lamaiyoo, ‘Namba Josepe kalyona,’ lamaiya-pyaa. Dokopa Petome Josepenya tata lamo lao kandea-pyaa. 14 Josepeme* baanya takange Jekopepi takangenya palu dupa pitaka-pipa awapa epena lea-pyaa. Jekope palu dupa pyasoo kingi ita kalange-kisa dee yuungi-pyaa. 15 Jekope* Isipe yuu dokonya epea-pyaa. Ipupala yuu dokonya katao Jekopepi naimanya yumbange dupapi dupa kumiami-pyaa. 16 Kumata* pilyaminopa Sikeme yuu dokonya soo pao kananda mendenya setapa pingima-pyaa. Wamba Apotakamame akali Emonya wane dupa-kisa kananda mende sambao nyiamo yuu Sikeme lenge dokonyaka soo setengema-pyaa.
17 “Wamba* Goteme Apotakame lamaiyoo tanga dopa pituna lao pii leamo doko angi jalanya tengesa piamopa Isataele tata Isipe kateamino dupa longo joo pee lea-pyaa. 18 Maitakao Josepenya kalai piamo dupa masala naenge kiŋi waka mendeme Isipe yuu doko isoo katea-pyaa. 19 Baame* naima tata dupa minakasoo yumbange dupa minao koyasia-pyaa. Baame nyakamanya wane ŋaŋa dupa lenge tao nakatatamina lao masetala mandyuu nepalapape lea-pyaa. 20 Gii* dokopa enda mendeme wane Mosese doko mandea-pyaa. Wane doko Gotenya lengelyaapi dokonya epe mende-pyaa. Mosese andaka endangimi setao peteamopa kana tepoma pea-pyaa. 21 Maitakao* wane doko kamaka seteamopa Peto wanenge dokome kandao nyepala baanya ikiningi joo mondo pia-pyaa. 22 Isipe* tangenya mana dupa pitaka lamaiyaminopa Moseseme nyoo etapala pii kyoto joo lao kalai pupu lao pyoo katea-pyaa.
23 “Moseseme* ee kana kingi ita kitomende katapala baa tata Isataele dupa kanja patoo lao masetala kanja pea-pyaa. 24 Peamopa Isipe tange mendeme Isataele mende-kisa makongeamo doko kandatala baame Isataele doko nisoo Isipe tange makongeamo doko pyao kumasia-pyaa. 25 Moseseme baa tata dupame namba-kisa Goteme nyakama nisetana lao masilyamino lao masiamoaka doko, dupame dopa lao masala nayami-pyaa. 26 Taita dopa pyoo Moseseme Isataele mendalapo pyao piambino kandatala, baame akali dolaponya mona auu pisakamaiyanya pii epe lamaiyoo, ‘Nyalambo kaiminingi dolapo, aipuma mende koyasa koyasa pilyambipi?’ lea-pyaa. 27 Dopa leamopa akali baanya kaiminingi pimaiyamo dokome Mosese soo nepatala lao pituu, ‘Apimi emba naimanya isingi akalipi pii tolasingi akalipi joo kata lapyape? 28 Kuaka embame akali Isipe tange mende pyao kumasipinoli pyoo namba pyao kumasipuli lao masilipi?’ lea-pyaa. 29 Moseseme* pii doko sepala baa paka pea-pyaa. Pupala yuu Mitiane dokonya tisa nao katao wane ane lapoma mandea-pyaa.
30 “Ee* kana kingi ita kitomende pateamopa Moseseme Sainai manda endakali napalenge yuu dokonya katao itate mende ikililyambu mauu mendenya teamo dokonya enjele mende ita yuli kainanya kateamo kandea-pyaa. 31-32 Moseseme doko kandatala mona andea-pyaa. Mona andao pituu tengesa kanja peamopa, Kamongome baa lamaiyoo, ‘Namba embanya yumbange dupanya Gote doko kalyo. Apotakamepi, Aisakepi, Jekopepi dutupanya Gote doko kalyona,’ lea-pyaa. Moseseme pii doko soo walu lao paka kayapala angi doko kandapenge nanjia-pyaa. 33 Dopa piamopa Kamongome baa lamaiyoo, ‘Yuu emba kalyeno dutupa etete epe. Tenge dokonya embanya moko pee pingi dolapo lyoka. 34 Isipe tange dupame nambanya endakali Isipe kalyamino dupa minao koyasilyamino doko kandatelyo. Dupame tanda nao ee lelyamino doko sepelyo. Sepala namba tangeme mokao nyala ipatelyo. Indupa emba Isipe paalena ipu,’ Kamongo dokome dopa lea-pyaa.
35 “Dupame* Mosese daa latala, ‘Apimi emba naimanya isingi akalipi pii tolasingi akalipi joo kata lapyape?’ leami-pyaa. Dopaka doko, akali doko isingi akalipi pyoo nyingi akalipi lapota joo Goteme katena lea-pyaa. Goteme baanya enjele ikililyambu mauunya kateamo doko-kisa Mosese Isipe pena lea-pyaa. 36 Baa* Isipe kateamo gii dokopapi, solowata pete Kate Pyapae singi dokonya epeamino dokopapi, dee endakali napalenge yuu dokonya ee kana kingi ita kitomende dupa payawaka kateamino gii dokopapi dupanya baame kongalipi kalai paka pipaepi dupa pyoo Isipe yuu doko yakinatala dokaita laminao pea-pyaa. 37 Akali* Mosese dokomeaka Isataele dupa kandao, ‘Namba pyakalya leamoli pyoo Goteme nyakamanya potopesa mende nyakama tata dupanya kaina dokonya pyakalyina lakatana,’ lea-pyaa. 38 Isataele* dupa kambu pyao endakali napalenge yuu dokonya kateamino dokopa Mosese awapaka katea-pyaa. Baa enjele Sainai manda ongonya wamba pii lamaiyamo doko-pipa awapa katao dee naimanya yumbange dupa-pipa awapa kateaka-pyaa. Baame pii lapae lete katenge doko dupa maiyanya nyia-pyaa.
39 “Dopa* piamoaka doko, naimanya yumbange dupame Moseseme pii leamo dupa nasemana lao masiami-pyaa. Dopa lao masetala Mosese yakinatala moname Isipe yuu dokonya pilyiami-pyaa. 40 Dupame* Etone lamaiyoo, ‘Naimanya kaita laitaka pyoo wambata gote mendapua embame wasaka. Naima Isipe yakinatala kamanda laminao epeamo akali Mosese doko aipa piape lao naimame masala naelyamanona,’ leami-pyaa. 41 Gii* dokopa dokaitame pulumakao ŋaŋa jepae mende wasepala nyakamanya sambo gote wasepae doko tama pyoo oapi dupa kundi maiyami-pyaa. Nyakamame nyakama tangenya kingimi wasepae doko lao masoo mona yaepao kateami-pyaa. 42 Dopa** piaminopa Goteme dupa maita maitala niki kanapi buipi dopale kaiti-kisa katenge dupa tama pima pena kaya-pyaa. Ongonya potopesa dupanya pii pepa pyapae dokonya dapa lao pyapae silyamo:
‘Nyakama Isataele dupame endakali napalenge yuu dokonya
ee kana kingi ita kitomende dupanya payao kateamino dokopa
nyakama pulumakao sipisipipi dupa namba lao kundi dyoo tama piamipi?
43 Nyakamame sambo gote Moloko lao tama pingi sele anda dokopa
sambo gote Lepane makande pyoo bui wasepae dokopa dolapo tama pitamana lao wasepala soo payami daape.
Dokonya nambame nyakama yuu Bapilone omotena-kaita waka kalyepale lao watao nepatona,’ lapae silyamo.
44 “Naimanya* yumbange dupame endakali napalenge yuu dokonya katao Gote kalyamona lao panasingi sele anda doko dupanya katakamaiya-pyaa. Goteme Mosese kandao sele anda dopa pyoo pina lao makande maitiamopa Moseseme makande kandeamo dopaka pyoo piami-pyaa. 45 Maitapyao* naimanya yumbange dupame sele anda doko nyakamanya takange dupa-kisa nyepala nyoo minao Jasua-pipa tata waka dupanya yuusa epeami-pyaa. Goteme yuu dupanya tange dupa watao nepata-nepata piamopa yuu doko nyoaka peami-pyaa. Dopa pyoo sele anda doko soo peamino doko pao Dapiti kateamo gii doko kandao nyiami-pyaa. 46 Goteme* Dapiti auu kayamopa baame Jekopenya Gote doko katenge panda mende wasakamaitoo lao masetala Gote-kisa tee lea-pyaa. 47 Dopaka* doko, Solomoneme Gotenya anda mende pyakamaiya-pyaa. 48 Pyakamaiyamoaka* doko, Gote etete ketae waka katenge doko endakali kingimi anda petae dupanya nakatenge. Potopesa mendenya pii dokome Kamongome dapa leana lapae silyamo:
49 ‘Kaiti* doko nambanya isoo petenge toko dokona, isa yuu doko nambanya moko pundipundi singina nyakamame anda aipale mende nambanya pyakatamipi? Namba panda andusa imambu nyotoope?
50 Nambanya kingimi dupa pitaka wasala nayope?’ lea-pyaa.
51 “Nyakama* mona pyakilyetae paliuu katao monapi kalepimi netesa endakali joo kalyamino. Koteaka lao nyakamame Oli Sipitisa doko kandao tanga lao nyakamanya yumbange dupame piaminoliaka pyoo kalyamino. 52 Wamba* nyakamanya yumbange dupame potopesa dupanya mendaipi mende api watao pyala nayami-pyaape? Potopesa kateamino dupame akali etete tolatae mende ipatana lao panasiaminopa yumbange dupame dokaita pyao kumasiami daape. Indupa nyakamame akali doko enge nyepala pyao kumasiami. 53 Wamba* Goteme baanya enjele dupame mana setapae dupa nyakama-kisa panasiamoaka doko, nyakamame watao minala nayamina,” Sitipename dopa lea-pyaa.
Sitipena kaname piamino doko
54 Pii* dokome akali kanjole dupanya mona kenda pipita siamosa dupame Sitipena kandao etete imbu kayapala nenge kitikato lao neami-pyaa. 55 Dopa* piaminoaka doko, Oli Sipitisa dokome Sitipena-kisa tumbatae katao kaiti-kisa kandalyetala pituu Gotenya tii pipae dokopa Jisasa Gotenya kingi tolae dokonya kateamo dokopa dolapo kandea-pyaa. 56 Baame* kandatao pituu, “Nyakama kandalapa!” lea-pyaa. “Kaiti doko saa papa laloo pipumopa Endakalinya Ikiningi doko Gotenya kingi tolae dokonya kalyamo doko nambame kandelyona,” lea-pyaa. 57 Dokopa nyakama tomba nao ala lao pii nasoo pitakame mona mendai paliuu mangayatala ipao Sitipena miniami-pyaa. 58 Minatala* baa yuu taono dokonya netesa watao pyasetala kaname piami-pyaa. Sitipena kosimi leamino akali dokaitame nyakamanya yonge pee pingi dupa lyokapala akali patange Solo lenge mendenya moko kateamo dosa seteami-pyaa. 59 Dupame* kaname pyao kateaminopa Sitipename loma soo pituu, “Kamongo Jisasa, embame nambanya imambu doko nyepe!” lea-pyaa. 60 Dopa* latala luma lakapala puu lao lao pituu, “Kamongo, embame koo pilyamino dakenya yanu nyala nayape!” latala kumia-pyaa.
* 7:2 Jen 11:31; Wee 29:3 * 7:3 Jen 12:1 * 7:4 Jen 11:31–12:5; 15:7 * 7:5 Jen 12:7; 13:15; 15:18; 17:8 * 7:6 Eke 12:40 * 7:6 Jen 15:13-14 * 7:7 Eke 3:12 * 7:8 Jen 17:9-14; 21:2-4; 25:24-26; 29:31–30:24; 35:16-18,22-26; Jo 7:22 * 7:9-10 Jen 37:11,28; 39:1-3,21-23; 45:4 * 7:9-10 Jen 41:37-44; Wee 105:21 * 7:11 Jen 41:54-55 * 7:11 Jen 42:1-5 * 7:13 Jen 45:1-4,16 * 7:14 Jen 45:9-11,17-18; 46:27 * 7:15 Jen 46:1-7; 49:33; Dit 10:22 * 7:16 Jen 23:2-20; 33:19; 50:12; Jas 24:32 * 7:17 Eke 1:7-8 * 7:19 Eke 1:10-11,15-22 * 7:20 Eke 2:2; Ip 2:2 * 7:21 Eke 2:3-10 * 7:22 Lu 24:19 * 7:23 Eke 2:11-15 * 7:29 Eke 2:21-22; 18:3-4 * 7:30 Eke 3:1-10 * 7:35 Eke 2:14 * 7:36 Eke 14:21; Nam 14:33; Emo 5:25 * 7:37 Dit 18:15,18; Ap 3:22 * 7:38 Eke 19:1–20:17; Dit 5:1-33; 9:9-11; Jo 1:17; Ap 7:53 * 7:39 Nam 14:3 * 7:40 Eke 32:1,23 * 7:41 Eke 32:2-6 * 7:42 Jet 19:13 * 7:42 Emo 5:25-27 * 7:44 Eke 25:9,40; Ip 8:5 * 7:45 Dit 32:49; Jas 3:14-17; 23:9; 18:1 * 7:46 2 Sam 7:1-16; 1 Ktl 17:1-14; Wee 132:1-5 * 7:47 1 Kiŋ 6:1 * 7:48 Ap 17:24; Ip 9:11,24 * 7:49 Ais 66:1-2 * 7:51 Eke 32:9; 33:3,5; Nam 27:14; 2 Ktl 30:7-8; 36:14-16; Ais 63:10; Jet 6:10; 9:26 * 7:52 Mt 23:31-35; Ap 2:23; 3:14 * 7:53 Ap 7:38; Ga 3:19; Ip 2:2 * 7:54 Ap 5:33 * 7:55 Eke 24:16; Mt 22:44; Ap 2:33-34; 5:31 * 7:56 Dan 7:13; Mt 26:64; Kl 3:1 * 7:58 Ap 22:20; 26:10; Ga 1:13; Ip 13:12 * 7:59 Wee 31:5; Lu 23:46 * 7:60 Lu 23:34
☰