☰ GALASIA 1
POLOME
GALASIA
TANGE DUPANYA PEPA
PYAO PYASAKAMAIYAMO DOKO
Pii atupa wambao kandapenge
Wamba Jisasanya Wai Pii Epe doko Juta dupa-kisa iki tayamopa maitakao endakali waka dupa apatame siami-pyaa. Dopa piamopa yangi dupame Jutamanya mana miningimali pyoo mana setapae Goteme Mosese maiyamo dupa watao minao Kitisene angi katamanana leami-pyaa. Dopa leaminopa Polome daa lea-pyaa. Mana setapae dupame Gotenya enomba dokonya tolatae joo katapenge daa. Kataisa lao masoo miningi tenge dokome iki tolatae katenge. Kataisame iki Gotepa endakalipanya kainanya pii lao wasingi.
Esia yuu dokonya Galasia doko Lomanya potopinja mende sia-pyaa. Potopinja dokonya sosa mendapua kateaminopa endakali mendapuame ipupala dupame Gotenya mana dupa pitaka watao minataminopa Goteme endakali dupa tolataena lapengena lao Polonya pii doko pyaanya palyiami-pyaa. Polome pepa dake pyao pituu deaka sambo pii dupa sepenge daana lea-pyaa. Polome lao pituu baa aposele angi doko endakali mendeme makande piami daa. Baa Goteme yapao nyepala aposele katena lao makande pia-pyaa.
Polome Galasia tange dupanya pepa pyao pyasakamaiyamo dokonya pii lyaa dupa:
1:1–10 Pii wambao pepanya piamo dupa
1:11–2:21 Polo aposelenya kenge siamo doko
3:1–4:31 Wai Pii Epe dokome Gotenya kondo kaenge doko panasilyamo
5:1–6:10 Kitisene dupa Kataisanya pundipundi katao koonya mokao nyepae katenge
6:11–18 Polome pii etao lasa leamo dupa
1
1 Namba* aposele Polome pepa dake pyekelyo. Endakali mendeme namba aposele kata latala puu laa naya. Jisasa Kataisapa Takange Goteme Jisasa malunya sakatasiamo dokopa dolapome namba aposele kata leambi. 2 Nambapi* namba-pipa awapa katamano masoo miningi kaiminingi dupa pitakapimi pepa dake Galasia yuu dokonya Gotenya sosa kalyamino dupanya pyao peekelyamano. 3 Naimanya* Takange Gotepa Kamongo Jisasa Kataisapame nyakama kandao mona epe mende palyetala nyakamanya mona doko lyuu lasekena. 4 Jisasa* Kataisame naimanya Gote-kisa Takange dokome pipyali lao masiamoli pyoo baame naima koo singi yuu angenya mokao nyalanya naimanya koo ongonya yanu pyao baa tangeme kumia-pyaa. 5 Tanga* tangapi Takange Goteaka lao tama pipenge lamo! Kiniaka.
Wai Pii Epe waka mende nasilyamona leamo doko
6 Kataisame* mona epe palyoo nisiamo dokonya nyakama ipupa leamo Gote doko nyakamame yapa maita maitala Wai Pii Epe waka mende watao pelyamino dokonya namba walu lelyo! 7 Kiningi,* Wai Pii Epe waka mende nasilyamo. Nasilyamoaka doko, endakali mendapuame nyakamanya masingi minao kyakasakao Kataisanya Wai Pii Epe doko aloo pipuma laka lao masilyamino. 8 Dopa* pilyaminoaka doko, naimanya mendemeaka tamopi kaitinya enjele mendeme tamopi Wai Pii Epe wamba naimame langiamano doko lao langya naenya, waka mendepale mende langitamo kandao doko baa yuu koo ongonya pena kayata! 9 Wamba* naimame langiamano doko nambame deaka langilyo: akali mendeme nyakama Wai Pii Epe wamba siamino doko lao langya naenya, waka mendepale mende langitamo kandao doko, baa yuu koo ongonya pena kayata!
10 Nambame* dopa lelyo doko endakalimi sepala auu kaena lao lelyope, pande Goteme sepala auu kaena lao lelyope? Nambame endakali dupa andiki andiki pyoo lelyope? Daa, nambame endakali dupa andiki andiki pyoo mee lawaka katapuli kandao doko, Kataisanya kendemane joo nakatapuli.
Polo aposele jiamo dokonya leamo doko
11 Kaimia* paluma, nambame lelyo dake nyakamame masalapape: Wai Pii Epe nambame langio doko endakalinya pii mende daa. 12 Pii* doko namba endakali mendeme langiamopa sala nayo. Endakali mendeme namba mana langya nayaka. Jisasa Kataisame Wai Pii Epe doko namba-kisa panasia.
13 Wamba* nambame Jutamanya mana makandepi miningi dokonya minao katao nambame Gotenya sosa doko etete watao pyao mee jinya nepalanya pyoo katee lapae doko nyakamame sepeami. 14 Namba* tata dokonya nambame namba yale yango longo dupa Jutamanya mana makandepi miningi dokonya ita minao minio. Nambanya yumbangenya mana miniamino dupa nambame etete pupu lao watao minio. 15-16 Dopaka*** doko, wamba nambanya endangimi namba manja naengesa Goteme namba yapao nyia-pyaa. Maitakao baame mona epe palyoo namba ipu lea. Nambame baanya Ikiningi dokonya lao Wai Pii Epe doko endakali tata waka dupa lamaiyakatale lao Goteme mona epe palyetala baanya Ikiningi doko namba laitaka pia. Dopa piamopa nambame endakali mende-kisa pisala nayo. 17 Dee nambame Jetusaleme yuu ongonya aposele wambao kateamino dupanya napeo. Dopa napinya namba Atepia yuu dokonya pupala dee Damasakosa pilyio.
18 Maitakao* ee kana tepoma pateamopa nambame akali Pita doko kanjanya Jetusaleme peo. Pupala, baapa koto kingi ita mende-kisa dee yuungi awapa kateamba. 19 Dokopa* nambame aposele dupanya waka mende nakandeo. Kamongonya kaiminingi Jemesa doko iki kandeo. 20 Indupa* nambame nyakamanya pii pepa pyao peekelyo datupa Gotenya enomba dokonya kiningi lao peekelyona kanjepape! 21 Dee* maitakao namba yuu Sitiapa Silisiapa dolaponya peo. 22 Peopa Kataisanya sosa Jutia yuu dokonya wakale wakale kateamino dupame namba enomba nakandeami. 23 Dupame wamba naima minao koyasoo kateamo akali dokome indupa masoo miningi minao koyasiamo dokonyaka lao mana lamaiyoo kalyamona lapae doko iki soo kateami-pyaa. 24 Dupame namba Goteme dopa piana lapae doko sepala baa lao lalyoo kateami-pyaa.
* 1:1 Lo 1:1; Ga 1:11-12 * 1:2 Lo 1:4 * 1:3 Lo 1:7; Pl 1:2 * 1:4 Ga 2:20; 1 Ti 2:6; Ta 2:14; 1 Jo 5:19 * 1:5 Lo 16:27 * 1:6 Mt 9:16-17; 2 Ko 11:4; 2 Te 2:2 * 1:7 Ap 15:1,24; Ga 5:10 * 1:8 Lo 9:3; 1 Ko 16:22 * 1:9 1 Ko 11:2 * 1:10 Lo 1:1; 1 Te 2:4 * 1:11 Mt 16:17; Lo 1:16-17 * 1:12 Ga 1:1 * 1:13 Ap 8:3; 22:4-5; 26:9-11 * 1:14 Mk 7:3; Ap 22:3; 26:4-5 * 1:15-16 Ais 49:1; Jet 1:5; Lu 1:15 * 1:15-16 Ap 9:3-16; 22:6-10; 26:13-18 * 1:15-16 Mt 16:17; Lo 1:1; Ga 2:7 * 1:18 Jo 1:42; Ap 9:23-30; 11:30 * 1:19 Mt 13:55; Ap 12:17; Ga 2:9 * 1:20 Lo 1:9 * 1:21 Ap 9:30; 11:25-26
☰