2
Tesalonaika yuu dokonya kalai piamino dupa
1 Kaimia paluma, naima nyakama kateamino dokonya ipao kalai piamano doko mee maa yangatae nakalyamona lao nyakama tangeme masilyamino.
2 Wambao Pilipae yuu dokonya endakali dupame naima kandanya palyetala, mee pyao koyasiamino doko nyakamame masilyamino. Dopa piaminoaka doko, naimanya Goteme naima nisiamopa paka nakayao baanya Wai Pii Epe doko lekeleke tao nyakama langiama.
3 Naimame nyakama mona sakatasoo pii langingi doko sambo pii lawapi, mona koo palyowapi, nyakama minakasowapi langya naenge.
4 Dopa lao langya naenya, Goteme Wai Pii Epe lao panenge kalai doko naima ditala kapana leamoli pyoo naimame pingi. Endakali dupame kapa lamo lena lao naimame dopa pyaa naenya, Goteme naimanya mona kandatala kapa lamo lena lao dopa pingi.
5 Naimame nyakama andiki andiki pyoo piipi mende etete naleamina lao nyakamame masilyamino. Dee oapi nyipu laka lao putiti kaenge doko yapae pyaanya sambo naleamina lao Gotemepi kandeaka.
6-7 Naima Kataisanya aposele dupa alyasale joo katapenge jiamoaka doko, nyakamapi endakali waka dupapimi naima lalyimili lao masala nayama. Dopa lao masala naenya, naima nyakama-pipa awapa kateamano dokopa patapata lao kateama. Enda mendeme baanya wane dupa wanawana lao isingili pyoo naimame nyakama isoo kateama.
8 Nyakama naimanya mona setenge endakali joo kateamino dokonya naimame nyakama etete auu kayapala mona epe paliuu Gotenya Wai Pii Epe doko iki nyakama langya naenya, naimanya mona doko apata nyakama diamaka.
9 Kaimia paluma, naimame kalai lekeleke tao tanda nao piamano doko nyakamame kame sala naenya, masilyamino. Naimame nyakamanya mende kenda pisala nayalanya kuka kotakapi naima tangenya kalai peta pyoo Gotenya Wai Pii Epe doko nyakama langiama.
10 Naimame nyakama Gote lao masoo miningi endakali dupa kandao etete epe tolao pyoo koopi mende napyoo kateamano doko nyakamapi Gotepimi kandatala kalyamino.
11 Takangeme baa tangenya wane dupa-kisa pingili pyoo, naimame nyakama mendai mendai lao dupa-kisa piamina lao masilyamino.
12 Nyakama Gotenya tii pipae dokonya katataminopa baame nyakama isoo katatopa lao ipupa leamo Gote dokonya mana dupanya etete kapa patae payalapale lao naimame nyakamanya mona minao sakataseta pupu laseta pyoo pii kyoto joo langiama.
13 Naimame Gotenya pii lapae nyakama langiamano doko nyakamame sepala endakalinya piina lao masala naenya, Gotenya pii angina lao masoo siami. Pii dokome nyakama masoo miningi endakali dupa pupu lasilyamo dokonya apata naimame koteaka lao Gote kandao yaka pilino lenge.
14 Kaimia paluma, Gotenya sosa dupa Kataisa Jisasa-pipa pakatae Jutia yuu ongonya katengemali pyoo nyakama kalyamino. Juta endakali dupame sosa dupa tanda maiyamino dopaka pyoo nyakama tata mendai dupame nyakama tanda diami.
15 Juta dupame potopesa dupa pyao kumasetala Kamongo Jisasa doko pyao kumasoaka petala naima apata tanda dyoo watao piami. Dupame endakali dupa pitaka yandapipi jetala Goteme mana auu kaenge doko tanga lengema.
16 Dokopa Goteme endakali tata waka dupa pyoo nyina lao naimame dupa pii lamailyamanopa Juta dupame kaitini lyokengema. Dupame dopa pyoo koteaka lao koo pilyamino doko pyoo tumbingima. Dopana indupa Gotenya imbu kaenge doko dupa-kisa ipatelyamo.
Polome Tesalonaika tange dupa dee kandawani kayamo doko
17 Kaimia paluma, wane muiyeneme endangi takangepi nakandengeli pyoo gii kuki mende naimame nyakama nakandeamanoaka doko, naimame nyakama masoo kateama. Dopa petala naimame nyakama etete kandawanimi kumapala kanja ipanya makande pyoo etete lekeleke teama.
18 Naimame nyakama kateamisa ipawani kayama. Namba Polome nyakama kateamisa ipawani kayapala ipatoo lao deaka makande peta peta pio. Dopaka doko, Sataneme naima minanjia.
19 Naimanya Kamongo Jisasa dee ipatamopa baanya enomba dokonya naimame api kandatamanopa lao masoo malisilyamape? Naimame api kandao mona epe palitamape? Naimame api yole etete andake doko jetamosa tama pitamape? Doko nyakamaka daape.
20 Kiningi, indupa naimame nyakama masetala eteke pyao mona yaepelyamano.