☰ 2 TESALONAIKA 3
3
Goteme naima nisina lao nyakamame loma salapape leamo doko
1 Kaimia* paluma, pii dake etao langilyamano: Kamongonya lao pii doko nyakama-kisa alo pyao tayamopa nyakamame auu kayaminoli pyoo endakali waka dupa-kisa alo pyao tayao patamopa dupame auu kaenalena Goteme naima nisina lao loma salapape. 2 Tuu* pyoo koo pingi endakali dupanya kingilyaka naima pyoo nyina lao nyakamame loma salapapeaka. Doko, endakali longome Gote lao masoo minala naelyamino.
3 Dopaka* doko, nyakamame Kamongo doko tungi pyao katapenge. Baame nyakama kyoto injisetala, akali koo dokome koyasala naena lao isoo katata. 4 Naimame* kalai pyepape leamano dupa nyakamame pyoo pilyaminona, tangapi dopaka pitamina lao Kamongo dokome naimanya mona sakatasipumopa masalakao masilyamano.
5 Goteme nyakama auu kayamo dokopa Kataisa kyoto joo kateamo dokopa dolapo masokondape pyepale lao, Kamongo dokome nyakama pyoo laminao paena.
Endakali pitakame kalai pina leamo doko
6 Kaimia* paluma, Kamongo Jisasa Kataisanya kinginya katao naimame kyoto joo nyakama dapa langilyamano: masoo miningi kaiminingi mendeme naima-kisa mana nyiamo dupa watao minala naenya maka maka kayao mee katatamo doko-pipa nyakama awapa nakalyepape. 7-8 Naimame** mana miniamano dupa nyakamame watao minapenge doko nyakama tangeme masilyamino. Wamba naima nyakama-pipa awapa kateamano dokopa naima maka maka kayao mee katapala nyakamanya mende-kisa nee mee nyala nayama. Dopa napinya naimame nyakamanya mende kenda pisala nayamana lao kuka kotakapi lekeleke tao kalai petala nee nao kateama. 9 Naimame* nyakama-kisa nee mee nyiamali kapaka doko, nyakamame naimanya mana watao minalapale lao mana langyuu piama. 10 Wamba* naima nyakama-pipa awapa katao pituu, “Endakali mende kalai pyuani nakayatamo kandao doko, baa nee nanapengena,” lao mana langiama.
11 Naimame* dopa lelyamano doko, nyakamanya endakali mendapuame kalai mendaipi mende napinya maka maka kayao mee katapala, wakamanya dupanya tipa-tipa pyoo paelyamino lapae doko sepala lelyamano. 12 Kamongo* Jisasa Kataisanya kinginya katao naimame endakali dopale dupame dapa pipimili lao kyoto joo lelyamano: dupame mona paliuu katao kalai petala tangenya nee dupa nao katena lelyamano.
13 Dopana,* kaimia paluma, nyakamame mana epe dupa minalanya maka nakayalapape. 14 Naimame* pii pepa pyao peekelyamano datupa endakali mendeme watao minala naya kandeno doko, nyakamame kandokondape petala baa elya kaenalena awapa nakalyepape. 15 Dopaka* doko, nyakamame baa yandapipina lao masala naenya, nyakamanya masoo miningi kaiminingina lao masetala kandao isoo mana lamaiyepape.
Etao lasa leamo pii doko
16 Mona* lyuu lasingi Kamongo dokome koteaka lao mana tata tata dupa pitakanya nyakamanya mona doko lyuu lasekena. Kamongo doko nyakama pitaka-pipa awapa kalyepape.
17 Namba* Polo tangeme pii dalapo pepa pyekelyo: nyakama auu pyoo kalyepape. Nambame pepa pilyo dupa pitakanya nambanya kingi kandena lao makande mendai dakeaka minao pingi.
18 Naimanya Kamongo Jisasa Kataisame nyakama pitaka kandao mona epe palena.
* 3:1 Wee 147:15; Ep 6:19-20; Kl 4:3; 1 Te 1:8; 5:25; Ip 13:18 * 3:2 Lo 10:16; 15:31 * 3:3 Mt 6:13; 1 Ko 1:9; 1 Te 5:24; 1 Jo 2:14 * 3:4 2 Ko 7:16; Ga 5:10; 1 Te 4:10 * 3:6 Mt 18:17; Lo 16:17; 1 Te 4:1,11-12; 5:14; 2 Te 2:15; 3:14 * 3:7-8 Ap 18:3; 1 Ko 11:1; Ga 4:12; Ep 4:28; Pl 3:17; 1 Te 1:6,9 * 3:7-8 Mt 6:11; 1 Te 2:9 * 3:9 Mt 10:10; 1 Ko 9:4; 1 Te 1:6; 2 Te 3:7 * 3:10 1 Te 4:11 * 3:11 2 Te 3:6; 1 Ti 5:13 * 3:12 Jen 3:19; 1 Te 4:1,11 * 3:13 Ga 6:9 * 3:14 1 Ko 5:5,9,11; Ga 6:1; 2 Te 3:6 * 3:15 Mt 18:15-18; 2 Ko 2:7; 1 Te 5:14 * 3:16 Lus 2:4; Jo 14:27; 1 Te 5:23 * 3:17 1 Ko 16:21; Ga 6:11; Kl 4:18
☰