10
Jisasame akali kingi ita kalange-kisa dee lapoma dupa kalai pyaa pena leamo doko
1 Maitakao Kamongo dokome akali mendatupa dee yapao nyiaka-pyaa. Baame akali kingi itaka kalange-kisa dee lapoma yapao nyepala akali dutupa lapo lapo lao tole pyatala yuu taonopi endakali kuki palenge yuu dupa pitakanyapi wambao pena lea-pyaa. Baa tange yuu dutupanyaka maitakao watao patona lao masia-pyaa.
2 Dopa lao masetala baame dokaita lamaiyoo, “Indupa eenya nee longo wambu petelyamoaka doko, mandyuu mau pyapenge endakali longo nakalyamino. Dopana, ee tange dokome baanya nee mandyuu mau pyakamaitami endakali mendapua pena lape lao nyakamame loma salapape.
3 Kandeleno! Nambame nyakama mena sipisipi ŋaŋa jepae dupa yana kapua jepae dupanya kainanya pupa lelyona masetala pupape!
4 Nyakamame kaitini payao pituu munipi, nokainapi, moko peepi dupanya mende namandyuu pupa. Nyakamame endakali kaitinisa kandanyetamino dupanya mendaipi mende-pipa pii laloo napyepape.
5 Nyakamame pao anda mendenya kolandatamili pyoo wambao dapa laapape: ‘Anda dakenya palenge endakali dupa mona lyuu lao pilyepape!’ lao lamaiyepape.
6 Anda dokonya endakali dupame pii doko nasetaminopa mona lyuu lasakamaipenge nanjia kandeno doko, mona lyuu lasingi pii doko dokaita-kisa nasoo nyakama tange-kisa dee pilyeta. Anda dokonya palenge endakali mende mona lyuu lasakamaipenge jetamo kandao doko, nyakamanya mona lyuu lasingi pii doko baa-kisa kapa pao seta.
7 Nyakamame anda mendenya puu puu napinya, nyakama lanyetamino anda dokonyaka kalyepape. Kalai akali mendeme baanya kalai dokopa kapa pao yole nyingili pyoo nyakamame neepi endakipi anda tange dokome ditamoli pyoo nalapape.
8 “Dee nyakamame yuu taono mendenya pataminopa dokaitame nyakama lanyiami kandeno doko, endakali dokaitame nee mokosoo ditamili pyoo nalapape.
9 Nyakamame yuu dokonya tange endakali yaina pyapae dupa mee injisakamaiyepape. Dopa petakamaitala dokaita kandao, ‘Goteme nyakama isala ipatelyamona,’ lao pii lamaiyepape.
10 Dee nyakama yuu taono mendenya pataminopa endakali dupame nyakama lanyala nayami kandeno doko, nyakama yuu taono dokonya kaitini dupanya awali lao pupala dapa laapape:
11 ‘Nyakamanya yuu taono dakenya kuni kungumapi dupame naimanya mokonya pateta silyamo dokonya tenge nyakama-kisa silyamona lao lyanda lanya pisilyamano. Dopana, Goteme yuu dake isala ipatelyamona lao masina,’ lao lamaiyepape.
12 Goteme endakali mokosetamo gii dokopa yuu taono dokonya kenda pipae ipatamo dokome Sotoma yuu dokonya kenda pipae ipatamo doko ita minatana lao nambame nyakama langilyona,” Jisasame lea-pyaa.
Mona kapilyala naelyamino dupame koyatama iki lamo lao masina
(Mt 11:20-24)
13 “Taono Kotasina tange dupa koyatami iki lamo! Taono Betesaita tange dupa koyatami ikiaka lamo! Dupame kalai pupu lapae dupa nyakamanya yuu dolaponya kandeami dupa wamba Taya yuupa Saitone yuupa dolaponya endakali dupame kandeamili kandao doko, dokaitame kenai lumbanya aiyombanya pyalyetala mena kende matapu pyoo yuu wamba waka mona kapilyiamili.
14 Goteme endakali mokosetamo gii dokopa yuu dolaponya kenda pipae ipatamo dokome Taya yuupa Saitone yuupa dolaponya kenda pipae doko ita minata.
15 Dee nyakama taono Kapaneame tange dupanya kenge doko kaiti-kisa kapa pao seta laape? Daa, Goteme nyakama yuu koo dokonya pyandatana,” Jisasame lea-pyaa.
16 Dopa latala baame baanya disaipele dupa lamaiyoo, “Endakali mendeme nyakamanya pii silyamo dokome nambanya pii doko silyamoaka. Endakali mendeme nyakama maita dilyamo dokome namba maita dilyamoaka. Dee namba puu leamo Gote doko maita mailyamoakana,” lea-pyaa.
Akali kingi ita kalange-kisa dee lapoma dupa pilyoo epeamino doko
17 Maitakao akali kingi ita kalange-kisa dee lapoma dupa pilyoo ipao pituu mona yaepeami-pyaa. Dokaitame lao pituu, “Kamongo, embame naima kalai pyepape leenoli pyoo pipumanopa, enjele koo dupame naimanya pii sakapimiakana,” leami-pyaa.
18 Dokopa baame dokaita lamaiyoo, “Nambame Satane doko kaiti-kisa yuu wapaka pili lao yapa pyakao mangeamo kandeo.
19 Nyakamame kanopatopi pupusalyowapi dupa-kisa moko katao kaita payao dee nyakamame yandapipi dokonya pupu lapae dupa pitaka ita minao isoo kalyepape lateo. Dopana, dutupanya mendaipi mendeme nyakama kapa pao koyasala nayatana masalapape.
20 Dopaka doko, enjele koo dupame nyakamanya pii sekelyaminona lao mona yaepala naenya, Goteme nyakamanya kenge dupa kaitinya setakao kalyamo dokonya mona yaepalapape,” Jisasame lea-pyaa.
Oli Sipitisame Jisasanya mona etete yaepasiamo doko
(Mt 11:25-27; 13:16-17)
21 Gii dokopaka Oli Sipitisa dokome Jisasanya mona etete yaepasiamopa, Jisasame lao pituu, “Apane, emba yuupi kaitipi dupa pitakanya Kamongo kalyeno! Embame mana longo kandenge endakalipi masepae endakalipi dupame nakandena lao yalo piino dupa endakali wane ŋaŋa joo katengema dupame kandena lao panasiino dokonya nambame emba lao tama pilyo. Kini, Apane, embame pitona lao auu pyoo masiinoli pyoo petee-pyaana,” lea-pyaa.
22 Dopa latala baame dokaita lamaiyoo, “Nambanya Takangeme dupa pitaka nambame isepe lao namba-kisa setea. Endakali mendaipi mendeme Ikiningi doko masala naenge. Takangeme iki masingi. Dee endakali mendaipi mendeme Takange doko masala naengemaka doko, Ikiningimi iki masingi. Dee Ikiningi dokome Takange doko endakali mende laitaka pitoo lao masetala petelyamopa endakali dokome Takange doko lao masingiakana,” Jisasame lea-pyaa.
23 Dopa latala baame kapilyetala baanya disaipele awapa peamino dupa iki lamaiyoo, “Nyakamame lengeme kandelyamino dupanya lao mona yaepasetae kalyamino.
24 Wamba potopesapi kiŋipi longo dupame indupa nyakamame kandelyamino dupa kandapuma laka lao masiaminoaka doko, nakandeami. Pii nyakamame silyamino dupa sipuma laka lao masiaminoaka doko, nasiamina lao nambame nyakama langilyona,” lea-pyaa.
Akali Samatia epe doko
25 Dokopa mana setapae masingi akali mendeme ipupala Jisasa makande pyoo dapa lea-pyaa: “Mana Lenge Akali, nambame aipa petala lete etete katatope?” lea-pyaa.
26 Dokopa Jisasame baa lamaiyoo, “Mana setapae dupanya aipa lao pepa pyapae silyape? Embame tenge aipale mende palipumu itaki pilipi?” lea-pyaa.
27 Dopa leamopa baame pii yanu pyao, “ ‘Embame embanya Kamongo Gote doko auu kayao katao, embanya monapi, imambupi, pupu lapaepi, masingipi dutupa pitakame Gote baa maitae katape.’ ‘Embame emba tange auu kaengeli pyoo embanya endakali yango doko auu kayao katape,’ lapae silyamona,” lea-pyaa.
28 Dokopa Jisasame baa lamaiyoo, “Embame pii auu pyoo yanu pilinona, dopaka pyoo katapala lete etete katatena,” lea-pyaa.
29 Jisasame dopa leamopa mana setapae masingi akali dokome endakalinya lengelyaapi dupanya baa akali tolatae katapu laka lao masetala Jisasa pisoo, “Nambanya endakali yango doko apipi?” lea-pyaa.
30 Dokopa Jisasame baanya pii doko sepala yanu pyao, “Yuu mendepa akali mende Jetusaleme katao Jeteko paanya lanao pea-pyaa. Peamopa akali makongapae koo mendapuame kaitinisa minao mangotala baa pyao indinya kumapenge joo setapala baanya yonge peepi oapi dupa nyoo peami-pyaa.
31 Pateaminopa pitisa mende kaitini dokonya epeamo dokome akali pyapae doko kandatala lemba pyatala pea-pyaa.
32 Maitakao akali Lipai tata mende epeamo dokome dopaka pyoo akali pyapae doko kandatala lemba pyatalaka pea-pyaa.
33 Dee enakao akali Samatia mendeme kaitini dokonya pao pituu akali doko kandatala kondo kaya-pyaa.
34 Baame akali pyapae siamo dosa tengesa pupala olipi ipangepi waenepi mendapua pyapae dupanya katatakamaitala yaki pyakamaiya-pyaa. Dopa petala baame akali pyapae siamo doko kopinya baanya mena dongi maita dokonya setapala mandyuu pao endakali opone palenge anda mendenya palena latala baa setao palea-pyaa.
35 Yongama baame anda isoo katenge akali doko muni kina lapo joo maitala baa lamaiyoo, ‘Embame akali dake isokondape pyakape. Embanya muni mendapua apata akali dake-kisa nepate pitamo kandao dutupa namba pilyoo ae ipato ongopa yanu pyakatona,’ lea-pyaana,” Jisasame lea-pyaa.
36 Dopa latala Jisasame akali doko pisoo, “Akali mendapuame akali doko pyao indipala pateaminopa, dee akali tepoma kaitini dokonya epeamino dupanya apimi akali pyapae siamo dokonya yango joo nisiana lao masilipi?” lea-pyaa.
37 Dokopa mana setapae masingi akali dokome lao pituu, “Akali kondo kayapala nisia lumu dokoaka lumuna,” lea-pyaa. Dopa leamopa Jisasame baa lamaiyoo, “Dopana, embame pupala dopaka pyoo katape,” lea-pyaa.
Jisasame enda Mata Matiapa kanja peamo doko
38 Jisasapi baanya disaipele dupa-pipa kaitini pao yuu taono yakane mendenya pyakameaminopa, enda Mata lenge mendeme Jisasa baanya andaka lanyia-pyaa.
39 Dokopa Matanya kakingi Matia lenge dokome Kamongo Jisasanya mana nyotoo lao baa peteamo dokonya ipao baanya pii doko soo petea-pyaa.
40 Dopa pyoo peteamopa Matame nee akipi depa lao kalai longo piamosa mona tambea-pyaa. Dopa piamopa baame ipao Jisasa lamaiyoo, “Nambanya kakingi dokome nambame iki nee depa laale lao kingi nandilyamo doko, Kamongo, embame nakandalepe? Baame namba nisina lamai!” lea-pyaa.
41 Dopa leamopa Kamongo dokome baanya pii yanu pyakamaiyoo, “Mata, Mata, embame longo dupa moname masoo nea kayao pilino.
42 Dopaka doko, mendai iki mende nea kayapenge jilyamo. Matiame epe doko moname yapao nyepala pilyamona doko mendeme kapa pao nyoo nepakamaiya nayatana,” lea-pyaa.