☰ LUKU 2
2
Matiame Jisasa mandeamo doko
(Mt 1:18-25)
1 Akali* Okasatasa lenge doko Loma yuu dokonya Kapomanenya Isingi Mupa katao baame yuu pitakanya endakali dupa kenge pepanya setena lao baame pii doko yuu pitakanya wai lao taya-pyaa. 2 Akali Saitiniasa lenge doko Sitia yuu dokonya kapomane andake kateamo gii dokopa, endakali dupanya kenge pepanya kandasoo piami-pyaa. 3 Kenge pepanya setena lao yuu wakale katenge endakali mendai mendai lao dupa nyakama tangenya yuu taono dupanya peami-pyaa. 4 Dokopa* Josepe baa Dapiti tatanya mandipae dokonyana Galili yuu dokonya taono Nasatete katao, Jutia yuu dokonya Dapitinya taono Beteleme lenge dokonya pea-pyaa. 5 Enda* Matia doko Josepenya nyetana latae peteamo dokonya awapa kenge setambana lao peambi-pyaa. Enda doko wane tongata peteamopa awapa peambi-pyaa. 6 Pao pyakamatala peteambinopa Matia wane maita pia-pyaa. 7 Dokopa* Matiame baanya wane mupa ane doko mandea-pyaa. Mandipala lapalapame ambo pyapala mena pulumakawanya nee nenge tapoko mendenya setapala isoo petea-pyaa. Endakali opone palenge anda dokonya palipenge panda nasiamosa dopa pia-pyaa.
Enjele dupapi mena sipisipi setao katenge akali dupapi
8 Kuka dokonya yuu dosale mena sipisipi setao katenge akali mendapuame nyakamanya mena sipisipi dupa pau mendenya setao kateami-pyaa. 9 Kateaminopa* Kamongonya enjele mende ipupala akali dupa-pipa kalyu pia-pyaa. Kamongonya tii pipae dokome dokaita-kisa tii piyoko leamopa, akali dupame kandatala etete pakame kumiami-pyaa. 10 Dopa* piaminopa enjele dokome dokaita lamaiyoo, “Nyakama paka nakayalapape! Nambame wai pii epe mende minao nyakama langya epelyona salapape! Wai pii epe dokome endakali pitakanya mona etete yaepaseta. 11 Indupa* kuka gii dakepa enda mendeme Dapitinya taono dokonya nyakamanya Pyoo Nyingi Akali doko mandipilyamo. Baa Kataisa. Baa Kamongo doko. 12 Wane* doko dapa petae silyamona, nyakamame kandatala baa lamo lao masalamino. Endangi dokome wane doko lapalapa mendeme ambo pyapala mena pulumakawanya nee nenge tapoko mendenya palelyamona kutao pao kanjaminona,” lea-pyaa.
13 Enjele dokome dopa lateamopa dee kaitinya enjele kambu etete andake mendeme yapa ipao baa-pipa tole katapala dokaitame dapa lao Gote tama pyoo wee leami-pyaa:
14 “Gote* kaitinya katenge doko lao tama pilyamanona pyepape!
Baame isa endakali dupa etete auu kayao masilyamona,
nyakama mona lyuu lao kalyepape!” lao wee leami-pyaa.
15 Dopa latala kaiti-kisa pateaminopa, sipisipi setao katenge akali dupame lao pituu, “Mende pyomo lao Kamongome naima langyomo doko Beteleme dokonya yapa kanja muaa,” lao mende lamai lamai piami-pyaa. 16 Dopa petala dupame Beteleme dokonya yapa pupala Matia Josepepa dolapopi dee wane doko mena pulumakawanya nee nenge tapoko mendenya siamo dokopi dutupa kutao pao kandeami-pyaa. 17 Dupame* kandatala enjele dokome wane dokonya lao pii lamaiyamo siamino dupa lao paneami-pyaa. 18 Lao paneaminopa pii doko siamino endakali dupa pitaka mona andeami-pyaa. 19 Dopaka* doko, Matiame sepala pii dutupa pitaka baanya monanya nene yapao masoo petea-pyaa. 20 Wamba* enjele dokome akali mena sipisipi setao katenge dutupa kandao lamaiyamoli pyoo angi kandatala siamino dupapi kandeamino dupapi dutupa pitaka lao masetala Gote lao lalyoo tama pyoo pilyiami-pyaa.
21 Koto* gii tukulapo dokonya wane dokonya elya pingi kambu kepakamaipenge gii doko epea-pyaa. Dokopa wane dokonya elya pingi kambu kepatakamaitala wane doko kenge Jisasa leami-pyaa. Wamba Matianya inginya wane napeteamopa enjele mendeme kenge lena leamo dokoaka leami-pyaa.
Wane Jisasa mandyuu losuu anda andake dokonya peambino doko
22-23 Kamongonya** mana setapae dupanya dapa lao pepa pyapae singi-pyaa: “Enda mendeme wane mupa doko ane mende mandea kandeno doko, Kamongo dokonyana lao manjepape!” latae singi-pyaa. Dopa lapae singili pyoo Jisasanya endangi takangepame Kamongome mana setapae Mosese maiyamo dupa watao minao wane endangipa dolaponya kaimala pipae walya pyao nepala pupenge gii doko epeamopa, dolapome wane Jisasa doko Kamongo doko maiyanya mandyuu Jetusaleme yuu dokonya peambi-pyaa. 24 Dee* Kamongonya mana setapae dupanya dapa lapae singi-pyaa: “Yaka imi lapoma maiyepape! Daa tamo kandao doko, yaka maileo yakane mendalapo maiyepape!” lapae singi-pyaa. Dopa lapae singiliaka pyoo dolapome Kamongo lao tama pyoo epe mendalapo kundi joo maiyanyaka peambi-pyaa.
25 Gii* dokopa akali Simione lenge mende Jetusaleme yuu dokonya katea-pyaa. Baa akali epe tolatae joo katao Gote lao tama pyoo katenge-pyaa. Akali mendeme Isataele endakali dupa mona yaepasoo kii tamao nyala ipatana lao malisoo katelyamopa Oli Sipitisa doko baa-kisa katenge-pyaa. 26 Oli* Sipitisa dokome wambao Simione doko kandao dapa lamaiya-pyaa: “Emba yapa kumala nayate. Kamongo dokonya Kataisa doko kandatala kumatena,” lea-pyaa. 27 Yuu mende Oli Sipitisa dokome akali Simione dokonya mona sakatasiamopa baa losuu anda andake dokonya pea-pyaa. Gii dokopa Jisasanya endangi takangepame Kamongonya mana seteamoli pyoo losuu anda andake dokonya wane doko mandyuu peambiaka-pyaa. 28 Peambinopa* Simione dokome wane doko kopyoo nyepala Gote lao tama pyoo dapa lea-pyaa:
29 “Kamongo, embame leenoli pilino doko namba embanya kendemane doko mona lyuu lasetala yakinape.
30 Naima* pyoo nyetamo doko nambanya lengeme kandatelyo.
31 Pyoo nyingi doko endakali pitakanya enombanya panateleno.
32 Baa* tii pipae dokome endakali tata waka dupa tii pisoo
emba tata Isataele dupa kamongaseta.”
Simioneme wane doko lao masetala pii dutupa lao Gote tama pia-pyaa.
33 Baame pii dutupa lateamopa wane dokonya endangi takangepa dolapome sepala moname longo lao masoo peteambi-pyaa. 34-35 Dokopa** Simioneme wane Jisasapi endangi takangepi dutupa Goteme auu pisina lao loma setakamaitala, Jisasanya endangi Matia doko lamaiyoo, “Kandeleno, Isataele endakali longo dupa wane dake-kisa kapa pao lombapae setaminopa dee longo dupame sakatatamina lao Goteme baa panasetelyamo. Dokonya endakali longo dupame nyakamanya masingi yalo petae katenge dupa panasoo tanga lataminopa, itate mendeme embanya mona doko yangatana,” Simioneme lea-pyaa.
36 Gii* mendai dokopaka potopesa enda Ana lenge mende petea-pyaa. Baa Asaa tata akali Panyuele dokonya wanenge enda wambake etete mende-pyaa. Baa wamba mapuakaesa akali nyepala akalingipa awapa ee kana kalange pitipiambinopa akalingi kumia-pyaa. 37 Akalingi* kumapeamopa baa walyakae ee kana kingi ita tukulapo-kisa dee kitomende pituu, losuu anda andake doko yakinala nayao petenge-pyaa. Kuka kotakapi baame Gotenya kalai pyakamaiyoo loma soaka pituu nee nanenge gii epelyali pyoo nanao petenge-pyaa. 38 Matiapi,* Josepepi, wane dokopi losuu anda andake dokonya kateamino gii dokopaka baa dutupa kateamino tengesa dosa ipupala Gote lao tama pima-pima pia-pyaa. Jetusaleme dokonya Pyoo Nyingi Akali doko malisoo kateamino endakali dutupa pitaka enda Aname wane dokonya lao pii lamaiya-pyaa.
Maita Josepepame Jisasa mandyuu yuu Nasatete pilyiambino doko
39 Endangi* takangepa dolapome Kamongo dokome pii lao seteamo mana dupa pitaka minao etapala, Galili dokonya pao nyilyambonya yuu taono Nasatete lenge dokonya andaka pilyiambi-pyaa. 40 Dokonya* katao wane doko andapala angi jia-pyaa. Baame manapi masingipi longo lao nyoo kateamopa Goteme baa auu kaya-pyaa.
Wane kole Jisasa losuu anda andake dokonya kateamo doko
41-42 Ee* kana dii lao Jisasanya endangi takangepa dolapome Napinya Kayamo Gii epe dokonya Jetusaleme yuu dokonya pengembali pyoo, Jisasa baa ee kana kingi ita mende-kisa dee lapoma katapeamopa gii epe dokonya Jetusaleme pengemali pyoo awapa peami-pyaa. 43 Maitakao Napinya Kayamo Gii doko etapeamopa wane Jisasa doko Jetusaleme dokonya mee katea-pyaa. Baanya endangi takangepame wane doko Jetusaleme mee kalyamona lao masala nayao andaka pilyoo peambi-pyaa. 44 Dolapome wane doko endakali dupa-pipa awapa pao pimina lao masiambi-pyaa. Dopa lao masoo pupala alemandi dokonya nyilyambonya palupi kaita miningipi dupa-pipa wane doko awapa pao kalyamipi lao kutiambi-pyaa. 45 Kutao kayapala Jetusaleme dokonya kutala pilyiambi-pyaa. 46 Yuu gii tepo dokonya dolapome losuu anda andake kame dokonya kolamatala, baame mana lenge akali dupanya kainanya pituu dupanya pii dupa sepapu piseta pyoo peteamo kandeambi-pyaa. 47 Akali* dupa pitakame baanya masepaepi pii yanu piapi dupa sepala moname longo lao masiami-pyaa. 48 Endangi* takangepame walu lao baa kandeambi-pyaa. Kandatala endangi dokome Jisasa lamaiyoo, “Wane, embame aipuma nalimba kandao dopa pyepe? Embanya takangepa nalimbame mona etete kenda kayao emba kutao katapumbana,” lea-pyaa. 49 Dokopa* Jisasame dolapo lamaiyoo, “Aipa lao masetala namba kutao katambipi? Nambame nambanya Takangenya anda dakenya pititina lao nyilyambome masala nayapimbipi?” lea-pyaa. 50 Dopa leamopa dolapome baanya pii leamo dokonya tenge masala nayambi-pyaa.
51 Dokopa* baa dolapo-pipa andaka pupala dolaponya pii watao minao katea-pyaa. Dopa piamopa Matiame Jisasanya piipi manapi dutupa pitaka monanya nene yapao masoo petea-pyaa. 52 Jisasa* baanya masingi epepi yongepi lapotanya andama-andama pyoo katea-pyaa. Dopa pyoo katao Gotepi endakalipinya enombasa baa koteaka lao akali epe doko katea-pyaa.
* 2:1 Mt 2:1; Lu 3:1 * 2:4 1 Sam 16:1-13; Jo 7:42 * 2:5 Mt 1:18; Lu 1:27 * 2:7 Mt 1:25 * 2:9 Eke 24:16; Lu 1:11; Ap 5:19 * 2:10 Lu 1:12,14 * 2:11 Mt 1:21; 16:16; Jo 4:42; Ap 2:36; 5:31 * 2:12 1 Sam 2:34; 2 Kiŋ 19:29; Ais 7:14; Lu 1:18-20 * 2:14 Ais 9:6; Ese 3:12; Lu 19:38 * 2:17 Lu 2:10-12 * 2:19 Jen 37:11; Lu 2:51 * 2:20 Lu 1:64; 2:28-38; 5:26; 7:16; 13:13 * 2:21 Lep 12:3; Mt 1:21,25; Lu 1:31,59 * 2:22-23 Lep 12:1-8 * 2:22-23 Eke 13:2,12,15 * 2:24 Lep 5:7; 12:8 * 2:25 Ais 40:1; 49:13; 42:1; Lu 2:38; 23:51 * 2:26 Lu 23:35 * 2:28 Lu 2:20 * 2:30 Ais 40:5; 52:10; Lu 3:6; Ta 2:11 * 2:32 Ais 42:6; 49:6; Jo 8:12; Ap 13:47; 26:23 * 2:34-35 Ais 8:14; Jet 15:10; Mt 21:42; Lu 7:23; 12:51-53; 1 Ko 1:23; 1 Pi 2:8 * 2:34-35 Jo 3:19; 9:39; 19:25-27; Ip 12:3 * 2:36 Jas 19:24; Ap 21:9; 1 Ti 5:9 * 2:37 1 Ti 5:5 * 2:38 Ais 52:9; Lu 2:20; 9:31,51; 13:22,33; 18:31; 19:11,28; 24:21,47 * 2:39 Mt 2:23; Lu 4:16 * 2:40 Isi 13:24; 1 Sam 2:26; Lu 1:80; 2:52 * 2:41-42 Eke 12:1-27; 23:14-17; Dit 16:1-8,16 * 2:47 Lu 4:22; Jo 7:15,46 * 2:48 Mt 12:48; Mk 3:31-35 * 2:49 Jo 2:16 * 2:51 Jen 37:11; Lu 2:19; 4:16 * 2:52 1 Sam 2:26; Pot 3:4; Lu 1:80; 2:40
☰