7
Jisasame isingi akali mendenya kendemane mende saka nyiamo doko
(Mt 8:5-13)
1 Jisasame endakali dupa pii lamaiyoo etapala baa yuu taono Kapaneame lenge dokonya pea-pyaa.
2 Peamopa yanda singi amii isingi akali mende yuu dokonya katea-pyaa. Akali dokonya kendemane baa tange mona setenge mende kateamo doko yaina nyepala etete kumapenge joo sia-pyaa.
3 Dokopa yanda singi isingi dokome Jisasa doko kalyamo lapae sepala Jutamanya isingi akali mendapuame Jisasa tee lao lanyakala pena lao pituu, “Nambanya kendemane doko nisekena laminao ipupape,” lea-pyaa.
4-5 Dokaitame Jisasa kateamo dokonya pupala kyoto joo dapa lao tee leami-pyaa: “Amii isingi dokome naima nisoo naimanya losuu anda doko pyekeana, baa akali auu pipaena, embame baanya pii doko sakamaiyoo nisakapili yakana,” leami-pyaa.
6 Dopa leaminopa Jisasa baa dokaita-pipa ipupala yanda singi isingi akali dokonya andalyaasa joo epeaminopa, yanda singi isingi dokonya kaita miningi mendapuame baanya wai minao pupala Jisasa lamaiyoo, “Akali Andake, emba maka kayatena naipupi! Emba nambanya andaka kapa pao ipupenge namba akali epe, daa.
7 Namba akali koo doko emba-kisa ipupuli doko kapa najipyalina lao masilyo. Dopaka doko, embame piimi iki latenopa nambanya kendemane doko saka paapomo.
8 Namba apata akali kenge singi mendenya pundipundi katenge. Dee yanda singi mendapua nambanya pundipundi katengemaka. Dupanya mende pena lelyopa, baa penge. Mende epena lelyopa, baa epenge. Dee nambanya kendemane mendeme mende pina lelyopa, baame pingina,” lelyamona lao baanya wai minao epeamino akali dupame leami-pyaa.
9 Dopa leaminopa Jisasame sepala akali doko kandao longo lao masia-pyaa. Dopa petala endakali longo baa watao epeamino dupa kandapilyetala lamaiyoo, “Nambame Isataele endakali dupanya masoo miningi akali dopale mende etete nakandapuna lao nyakama langilyona,” lea-pyaa.
10 Dokopa yanda singi amii isingi dokome pena leamopa epeamino akali dupa pilyoo andaka peaminopa, kendemane doko mee katengeli petae kateamo pao kandeami-pyaa.
Jisasame enda walyakae mendenya ikiningi kumapae sakatasiamo doko
11 Taita dopa pyoo Jisasa yuu taono Nena lenge dokonya pea-pyaa. Baanya disaipele dupapi endakali kambu longo mendapua-pipa awapa peami-pyaa.
12 Yuu taono dokonya lome kambu tengesa dosa peaminopa akali mendapuame akali kumapae mende malu pyaanya soo epeami-pyaa. Akali kumiamo dokonya endangi dokome wane mendai doko iki mandipiamopa enda dokonya akalingi doko wamba kumia-pyaa. Yuu taono dokonya tange endakali longo dupa enda doko-pipa awapa epeami-pyaa.
13 Kamongo dokome enda doko kandatala kondo kayapao pituu, “Emba ee kaya,” lea-pyaa.
14 Dopa latala baame tengesa pupala kingimi akali kumapae soo epeamino lapa toko dokonya watandeamopa, akali soo epeamino dupame mee sakatae kateami-pyaa. Dokopa Jisasame lao pituu, “Wane! Emba sakata lelyona, sakata!” lea-pyaa.
15 Dokopa wane kumapae doko sakatatala dee pii lao peteamopa, Jisasame baa endangi dokopa awapa pena lea-pyaa.
16 Dopa piamopa endakali dupa pitakame paka kayapala Gote lao tama pyoo, “Potopesa andake mende naimanya kainanya ipao katapelyamo! Goteme baanya endakali dupa kondo lao nisala ipatelyamona,” leami-pyaa.
17 Jisasanya lao pii dupa Jutia yuupi yuu waka dupa pitakanyapi lao tayami-pyaa.
Joneme baanya disaipele lapoma Jisasa kateasa pena leamo doko
(Mt 11:2-19)
18-19 Jisasanya lao pii doko lao tayaminopa Jonenya disaipele dupame pii dupa pitaka sepala Jone lamaiyami-pyaa. Lamaitiaminopa baame baanya disaipele lapoma epena latala Kamongo doko kateasa pii dapa lao pisala pena lea-pyaa: “Emba akali mende ‘Ipatana’ latae dokope, pande naimame akali waka mende malisemape?” lao pisala pena lea-pyaa.
20 Dopa lateamopa dolapome Jisasa kateamo dokonya pao tuu latala baa lamaiyoo, “Jone Kaimbu Pingi dokome nalimba emba katapisa pupa lao pituu, ‘Emba akali mende “Ipatana” latae dokope, pande waka mende malisemape lao pisala pupa,’ lamona,” leambi-pyaa.
21 Gii dokopa Jisasame endakali yaina tata tatame pyapae dupapi enjele koo paleta dupapi dupa auu pisakamaiyoo, endakali lenge koo dupa dee lenge tasakamaita pyoo katea-pyaa.
22 Dokopa Jisasame Jonenya disaipele dolapo lamaiyoo, “Nyilyambome pilyetala kandelyambino dupapi silyambino dupapi Jone lamaiyepape. Lenge koo dupa dee lenge telyamino. Moko koo dupa kaita paelyamino. Kopetali dupa mee jilyamino. Kaleketa dupame pii silyamino. Endakali kumapae dupa dee lenge tao kalyamino. Endakali tipya dupame Wai Pii Epe doko silyamino.
23 Dee akali mendeme namba maka kayapala mona lapo palyala naenge doko mona yaepasetae kalyamona, pii dutupa Jone lamaiyepape,” Jisasame lea-pyaa.
24 Dokopa Jonenya pii minao epeambino dolapome Jisasanya pii doko sepala pilyeteambinopa, Jisasame endakali kambu pyao kateamino dupa Jonenya lao pii dapa lamaiya-pyaa: “Wamba nyakamame endakali napalenge yuu dokonya aki mende kanja peamipi? Kembo maitangepi mende poome ema-ema pyoo kateamo kanja peamipi?
25 Pande akali mende yonge pee epe tambo lapae yati pipae mende pyoo kateamo kanja peamipi? Yonge pee epe yati pipae pyoo opale apalepi epe longo setengema dupa yuu isingi kiŋi dupanya andaka katengema.
26 Kiniaka doko, nyakamame aki mende kanja peamipi? Potopesa mende kanja peamipi? Kini, baa potopesa kateamo kandeaminoaka doko, baa mee potopesa mende daana lelyo.
27 Akali doko kandao dapa lao pepa pyapae silyamo: ‘Kaneleno! Nambame nambanya wai minao paenge akali doko embanya wambao pekena latopa embanya kaita doko depa lanya setakatana,’ lapae silyamo.
28 Yuunya endakali dupa pitaka Joneme ita minao kalyamona lao nambame nyakama langilyo. Kiniaka doko, endakali mende Goteme isilyamo endakali dupanya etete anasale joo katenge dokome Jone ita miningi.
29 “Wamba Jonenya pii doko siamino endakali dupa pitakapi takisa nyingi akali dupapi dupame Jonenya kaimbu nyiamino dokome Gotenya pii nyakama-kisa siamo doko tolataena lao lao paneami.
30 Dopaka doko, akali Patasipi mana setapae masingi akalipi wamba Jonenya kaimbu nanyiamino dupame Goteme nyakamanya epe pyakamaitona lao masiamo doko maita maiyami.
31 “Dopana nambame endakali indupa kalyamino dupa aki mendepa makande pyuape? Dokaita aipa pipaema laa kanjemape?
32 Wane kole dupame kamapi dupanya kambu lapoma pyao pitipala pii dapa lao yanu pyaloo pyoo lengema:
‘Naimame nyakamanya pulupapulatakalamanoaka doko,
nyakama lyala nayalamino!
Nyakama kondo kayao ee latalamanoaka doko,
nyakamame itingi laa nayalamino!’
Wane dupame opa lao katengemana, nyakama dopalema lamona,” lea-pyaa.
33 “Jone Kaimbu Pingi doko ipupala nee endakipi epe mende nanao katapumopa nyakamame baa kandao, ‘Enjele koo mendeme baa minao kyakasilyamona,’ lelyamino.
34 Indupa Endakalinya Ikiningi doko ipupala nee endakipi epe nao katamopa nyakamame baa kandao, ‘Nee endakipi tuu lao nawaka katao takisa nyingi akalipi koo mana minao paenge endakali dupa-pipa kaita minao kalyamona,’ lelyamino.
35 Dopaka pyoo endakali dupame Gotenya masepae doko watao minatala dokopa, baanya masepae doko tolataena lao panasingimana,” Jisasame lea-pyaa.
Enda mendenya koo pingi yanu dupa kunao nepakamaiyamo doko
36 Akali Patasi mendeme Jisasa baanya andaka nee nambana epena leamopa Jisasa pao andaka kolandatala nee nalanya petea-pyaa.
37 Dokopa yuu taono dokonya enda mana koo minao paenge mendeme, ‘Jisasa baa Patasi dokonya andaka nee nalanya ipao pilyamona,’ lapae sia-pyaa. Sepala enda dokome wele penge yakane mendenya wele tunduma pipae peteta mende minao epea-pyaa.
38 Ipupala Jisasanya moko seteamo dosa pitipala ee leamosa ee ipange epeamo dokome Jisasanya moko tombe lea-pyaa. Dokopa enda dokonya asili iti dokome kunanya nepakamaiyoo baame Jisasa lao tama pyoo baanya moko dolapo nunu longo pyoo wele kai lao kai pyakamaiya-pyaa.
39 Dokopa Jisasa epena leamo akali Patasi dokome kandatala dapa lao masia-pyaa: “Akali dake kini potopesa mende pili kandao doko, enda dokome baa watandelyamo dokopa baa mana koo minao paengena lao masipyalina,” lao masia-pyaa.
40 Dopa lao masiamopa Jisasame baa lamaiyoo, “Saimone, emba nambame pii mende langitoo,” lea-pyaa. Dopa leamopa Saimoneme baa lamaiyoo, “Mana Lenge Akali, embame pii doko laa,” lea-pyaa.
41 Dokopa Jisasame lao pituu, “Akali mendenya saandi lapoma akali lapoma-kisa sia. Mende doko-kisa muni kina andate yuungi siamopa, mende doko-kisa kina kingi ita yuungi siana,” lea-pyaa.
42 Akali dolapome saandi dolapo kapa pao yanu pyatambili nanjiamo kandatala akali saandi tange dokome dolapo kandao yanu napyakatambina latala kayalakao kaya-pyaa. Dopana, dolaponya andukumi baa etete auu kaya lusilyamape?” lea-pyaa.
43 Dopa leamopa Saimoneme pii yanu pyao, “Akali saandi andake siamo dokome etete auu kaya lumuna,” lea-pyaa. Dopa leamopa Jisasame baa lamaiyoo, “Embame auu pyoo masoo leenona,” lea-pyaa.
44 Dopa latala baame enda doko enomba maitae katao Saimone lamaiyoo, “Embame enda dake kandelepe? Namba embanya andaka ipupupa, embame nambanya moko kaimbu pyatale lao endaki nanjenoaka doko, enda dakeme baanya lengenya ee ipange dokome nambanya moko tombe latakala baanya asili iti dokome kunanya nepakalamo.
45 Embame namba andaka lanyoo nunu napyenoaka doko, enda dakeme namba andaka kolandalo dokopa namba tama pyoo nambanya moko dolapo nunu pyoaka pituu yapa kayala naelyamo.
46 Embame nambanya aiyombanya olipi ipangeme kai napyakalenoaka doko, enda dakeme nambanya moko dolapo wele tunduma pipaeme kai pyakalamo.
47 Enda dakeme etete auu kayapumu dokome baanya koo longo dupa kunao nepatekelyamo lao laitaka pilyamo. Dopaka doko, endakali mendeme baa tangenya koo kunao nepatae dupa kuki lamona lao masilyamo dokome Gote kukiaka auu kaengena lao emba langilyona,” lea-pyaa.
48 Dopa latala Jisasame enda doko lamaiyoo, “Embanya koo dupa etapelyamona,” lea-pyaa.
49 Dokopa akali baa-pipa awapa tokonya nee nao peteamino dupame nyakamalapo lao pituu, “Akali dake apimi koo dupa, ‘Etapelyamona,’ lelya kanjemape?” leami-pyaa.
50 Dopa leaminopa Jisasame enda doko lamaiyoo, “Embame masoo minapino dokome emba pyoo nyepelyamona, mona yaepatala puu,” lea-pyaa.