6
Nasatete tange dupame Jisasa kandao mona koo palyiamino doko
(Mt 13:53-58; Lu 4:16-30)
1 Jisasame yuu doko yakinatala baa tangenya yuu tenge dokonya pea-pyaa.
2 Pupala Sambasa gii doko epeamopa baame Jutamanya losuu anda dokonya mana lamaiya-pyaa. Lamaiyamopa pii siamino endakali longo dupame walu latala lao pituu, “Baame mana datupa anjatae nyia laape? Masepae baa maiya lamo doko aipale laa kanjemape? Baame kalai pupu lapae dopale dupa aipa petala pilya kanjemape?
3 Akali dake akali kamonda kalai pingi doko daa kandamuape? Baa enda Matia ikiningi, Jemesapi, Josisapi, Jutasapi, Saimonepi dutupanya kaiminingi daape? Baanya pimalenge dupa ae naima-pipa awapa napilyamape?” leami-pyaa. Dopa latala dupame Jisasa kandao mona koo palyiami-pyaa.
4 Dokopa Jisasame dokaita lamaiyoo, “Yuu dupa pitakanya potopesa mende andanda semaingimaka doko, baanya yuu tengepi, baa tatapi, baa palupi dupame iki baa andanda semaiya naengemana,” lea-pyaa.
5 Dokopa baame kalai pupu lapae mende yuu doo kapa pao napia-pyaa. Dopaka doko, baame endakali yaina pyapae kuki mendatupa-kisa iki kingi setapa pyoo mee injisia-pyaa.
6 Endakali dupame masoo minala nayaminosa baa mona andea-pyaa.
Maitakao Jisasa baa yuu taono yakane soo peamo dupanya pao endakali dupa mana lamaiya-pyaa.
Jisasame akali kingi ita-kisa dee lapoma pena leamo doko
(Mt 10:5-15; Lu 9:1-6)
7 Jisasame akali disaipele kingi ita mende-kisa dee lapoma dutupa epena latala enjele koo dupa watao pina lao pupu lasetala dupa lapo lapo lao pena lea-pyaa.
8 Pena lao pituu dapa pyepape lea-pyaa: “Nyakama kaita patamino dokonya mende naminao pangali iki minao pupape. Nee mende manja nayalapape. Nokaina mandipenge mende manja nayalapape. Muni mende manja nayalapape.
9 Dopaka doko, nyakama moko pee pyoo pupape. Yonge pee lapoma lao pyoo napupape,” lea-pyaa.
10 Dopa latala dee baame dokaita lamaiyoo, “Nyakama anda mendenya kolandeami kandeno doko, yuu dokonya katataminoli pyoo anda dokonyaka kalyepape.
11 Yuu mendenya tange endakali dupame nyakama taeme ipamini lamo lao lanyala nayawapi nyakamanya pii doko nasowapi piami kandeno doko, nyakamame yuu doko yakinatala pupape. Pao pituu dupame kandatala masina lao nyakamanya mokonya kuni kungumapi patatamo dupa lyanda lanya nepalapapena,” Jisasame lea-pyaa.
12 Dopa leamopa dupame pupala endakali dupa mona kapilyina lao pii lamaiyami-pyaa.
13 Pii lamaiyoo pituu enjele koo longo mendapua watao piami-pyaa. Dee endakali yaina pyapae longo mendapuanya olipi ipange kai latakamaitala yaina dupa mee injisiami-pyaa.
Jone Kaimbu Pingi kumiamo doko
(Mt 14:1-12; Lu 3:19-20; 9:7-9)
14 Jisasanya kenge doko yuu dupa pitakanya taya-pyaa. Dopa piamopa Kiŋi Etote dokome Jisasanya lao pii doko sia-pyaa. Dupame lao pituu, “Jone Kaimbu Pingi doko malunya sakatatala kalai pupu lapae dupa pyoo kalyamona,” leami-pyaa.
15 Yangi dupame lao pituu, “Baa Ilainjana,” leami-pyaa. Yangi dupame, “Baa potopesa kateamino dopale potopesa mendena,” leami-pyaa.
16 Etoteme pii doko sepala lao pituu, “Wamba nambame mange kepeo Jone doko sakatapyana,” lea-pyaa.
17-18 Wamba akali Etote dokome baanya kaiminingi Pilipa etanenge Etotiasa lenge doko tondao nyia-pyaa. Dopa piamopa, Joneme Etote lamaiyoo, “Embame embanya kaimininginya etanenge tondao nyilino doko kopeta pilinona,” lea-pyaa. Dopa lati siamosa Etoteme enda Etotiasa doko lao masetala baameaka yanda singi mendapuame Jone doko anjina latala anjingi andaka ŋili kendeme anjinya palyia-pyaa.
19 Doko, enda Etotiasa dokome Jone imbu kayapala pyao kumasalanya piamopa kapa napea-pyaa.
20 Doko, Etoteme Jone doko akali tolatae epe etete mende lamo lao kandatala baa paka kayapala auu pyoo isoo katea-pyaa. Baame Jonenya pii dupa sepala epao mona andeamoaka doko, baanya pii doko auu kayao sia-pyaa.
21 Jone pyapenge gii angi mende enda Etotiasa dokome kandao nyia-pyaa. Etotenya mandenge gii doko epeamopa baame akali andake dupapi, yanda singi amii isingi mupa dupapi, Galili tange akali andake dupapi dupanya nee yangakamaiya-pyaa.
22 Dopa piamopa nee nao peteamino dokonya Etotiasa wanenge doko ipao kolandatala lyia-pyaa. Dokopa Etote mauwapi dee baa-pipa awapa nee nao peteamino dupame etete auu kayami-pyaa. Dopa petala Kiŋi Etote dokome wanaku doko lamaiyoo, “Embame opale mende namba-kisa tee lateno doko embame latenoli pyoo nambame emba dyaapona,” lea-pyaa.
23 Baame lao pituu, “Opale mende embame nambame isoo kalyo dokonya yangipa kapa lao tee lateli pyoo kiningi etete nambame dyaapona,” lea-pyaa.
24 Dopa leamopa wanaku doko endangi peteasa pupala endangi pisoo, “Aki mende dina lao tee lawape?” lea-pyaa. Endangimi baa lamaiyoo, “Jone Kaimbu Pingi dokonya aiyomba doko dina lape,” lea-pyaa.
25 Dokopa wanaku dokome pupae yapa kiŋi doko peteasa ipupala, “Embame Jone Kaimbu Pingi dokonya aiyomba doko kepao pelesa mendenya setapala epapuaka dipi laka lao masilyona,” lao tee lea-pyaa.
26 Dopa leamopa kiŋi doko etete mona kenda kaya-pyaa. Dopa piamoaka doko, wambao baame etete kiningi lelyona leamo dokopi dee endakali baa-pipa awapa peteamino dupapi lao masetala wanaku dokonya pii nepala nayatoo lao masia-pyaa.
27 Dopa lao masetala dokopaka yanda singi mendeme Jonenya aiyomba doko kepao nyala pena lea-pyaa. Dokopa yanda singi dokome anjingi andaka pupala Jonenya aiyomba doko kepao nyia-pyaa.
28 Kepao nyepala pelesa mendenya setapala nyoo ipao wanaku doko maiya-pyaa. Wanaku dokome nyoo baanya endangi maiya-pyaa.
29 Dokopa Jonenya disaipele dupame doko sepala baa nyoo pao malu piami-pyaa.
Jisasame akali taosene yuungi dupa nee maiyamo doko
(Mt 14:13-21; Lu 9:10-17; Jo 6:1-13)
30 Kote mendepa aposele dupa Jisasa kateamo dokonya ipao kambu pyatala nyakamame opale piami dupa pitakapi pii mana lamaiyamipi dupa dopa pipuma lao baa lamaiyami-pyaa.
31 Dokopa endakali longo dupa pata ipata piaminopa Jisasapi baanya disaipele dupapi nee napenge gii nasia-pyaa. Dopa piamosa baame dokaita lamaiyoo, “Naima iki endakali napalenge yuu mendakaita kuki koto nyemana mona ipupa,” lea-pyaa.
32 Dopa leamopa dokaita sipi mendenya pao pyakalyetala nyakama iki endakali napalenge yuu mendakaita peami-pyaa.
33 Peaminopa endakali longo dupame dutupa lamo lao kandatala yuu taono dupa pitakanya tange endakali dupame mee kaitini alo pyatala nyakama wambao pao kateami-pyaa.
34 Jisasame netesa pao pyakamatala endakali kambu andake mende kateamino kandea-pyaa. Dokaita sipisipi setao katenge akali mende nakatenge dopale joo kateamino kandatala kondome kumapala baame opale longonya lao mana lamaiya-pyaa.
35 Indupa niki lenge landa pyalanya piamopa baanya disaipele dupame baa kateasa ipupala lao pituu, “Yuu dakenya endakali napalengema lamo. Dee indupa yuu kualanya pilyamoaka.
36 Dopa pilyamona embame dokaita ee silyamo dupanyapi yuu taono yakane soo pelyamo dupanyapi nee akipi tange sambao nama pena laa,” leami-pyaa.
37 Dopaka doko, baame yanu pyao dokaita lamaiyoo, “Nyakamameaka dokaita nee maiyepa,” lea-pyaa. Dokaitame baa lamaiyoo, “Naimame pupala muni kina andate lapoma dupame betesa sambapala endakali datupa nena lao maimape?” leami-pyaa.
38 Dopa leaminopa baame dokaita lamaiyoo, “Betesa akipate silyape lao kanja pupa,” lea-pyaa. Dokaitame kandatala baa lamaiyoo, “Betesa yuungi wapaka lapoma pyoo silyamona,” leami-pyaa.
39 Baame disaipele dupa lamaiyoo, “Tanu dupanya endakali dupa pitaka wakale wakale lao kambu pyao petena laapa,” lea-pyaa.
40 Dokopa endakali dupa andate mendai lawapi kingi ita yuungi lawapi kambu pyao peteami-pyaa.
41 Dopa piaminopa baame betesa yuungi wapaka lapoma pyoo siamo dutupa nyepala kaiti-kisa kandalyetae katao yaka pilino lea-pyaa. Yaka pilino latala baame betesa dutupa konjepala baanya disaipele dupame mokosoo maina lao maiya-pyaa. Dopa petala baame wapaka lapoma dolapo endakali dupa pitakanya konjakamaiyaka-pyaa.
42 Dopa piamopa dokaita pitakame nao tiaka kayami-pyaa.
43 Dokopa disaipele dupame betesapi wapakapi konjepae kakana siamo dupa nyoo baseketa mandi kingi ita-kisa dee lapomanya mandyuu tumbasiami-pyaa.
44 Nee neamino akali dupa taosene yuungimi neami-pyaa.
Jisasa endaki ketae moko katao payamo doko
(Mt 14:22-33; Jo 6:15-21)
45 Dokopa Jisasame baanya disaipele dupa sipi dokonya pyakalyina latala endaki pete ongonya yangitena Betesaita yuu ongonya wambao pao katena latala baame endakali dupa pena lea-pyaa.
46 Baame endakali dupa pena lao lasa latala baa loma salanya yuu manda mendenya pea-pyaa.
47 Pupala Jisasa baa iki katea-pyaa. Yuu kuala epeamopa sipi doko endaki pete kaina dokonya pea-pyaa.
48 Dokopa poo andake mende paanya peamino dokaita-kaita lao epeamosa dokaitame lekeleke tao endaki tandyuu peamino Jisasame kandea-pyaa. Kandatala yuu yongalanya pee payamopa baa endaki pete ketae dokonya moko katao ipupala dokaita nyoo maita pyalanya pia-pyaa.
49 Baa endaki pete ketae dokonya moko katao payamo kandatala dupame timango mende lamo lao masetala ae leami-pyaa.
50 Dokaita pitakame baa kandatala pakame kumiami-pyaa.
Dokopa yapa Jisasame dokaita lamaiyoo, “Namba kalyona, nyakama paka nakaenya, mona palyepa!” lea-pyaa.
51 Dopa latala dokaita sipinya peteamino dokonya pyakalyiamopa poo leamo doko yatu lea-pyaa. Dopa piamopa dokaitame etete mona andeami-pyaa.
52 Dupame betesa neamino tenge doko masala nayao mona pyakilyia-pyaa.
Jisasame Genesatete yuu dokonya yaina dupa mee jakamaiyamo doko
(Mt 14:34-36)
53 Dokopa dupa endaki pete dokonya yangi-kaita pupala Genesatete yuu ongonya sipi doko minao seteami-pyaa.
54 Dupame sipi doko yakinatala epeaminopa endakali dupame pupae Jisasa epelyamo lao kandeami-pyaa.
55 Baa lamo lao kandatala endakali dupame yuu doo siamo dupa pitakanya alo pyao pupala endakali yaina pyapae dupa lapa tokonya setapala soo epeami-pyaa. Baa dosa kalyamo leamili pyoo soo ipata piami-pyaa.
56 Baa yuu taono andakepi yakanepi mee yuupi dupanya peamoli pyoo endakali dupame endakali yaina pyapae dupa lapa tokonya setapala soo ipupala kamapi dupanya setapa piami-pyaa. Dopa petala baanya yonge pee ketae pingi londe dokonya puna dosa iki watandenalena lao kyoto joo leami-pyaa. Baanya yonge peenya watandeamino endakali dupa pitakanya yaina dupa mee jeta piami-pyaa.