PITAME
PEPA PIAMO LAPONGE DOKO
Pii atupa wambao kandapenge
Pitame pepa laponge dake pyapala Kitisene kateamino dupa pitakanya pyasia-pyaa. Pepa piamo tenge angi doko sambo pii mende payapala Kitisenenya masoo miningi doko pyao kumasiaminosa sambo pii dokome dii mandeamo mana koo dupa mee injisoo pia-pyaa. Pitame siamopa Kataisa dee naipatana lao sambo pii doko payamosa endakali dupame Gotepa Jisasa Kataisapa lao masoo minokondape pitaminopa kenda pipae ipata dupa ita minapimi laka lao masoo pia-pyaa. Kataisa baa yapa naipao malisilyamoaka doko, Kamongo dokome “nyakama kandao yapa maka nakayapala mende alu napipimi” laka lao masetala endakali pitaka mona kapilyipimi laka lao masilyamo dokonya malisilyamona lao masoo pia-pyaa.
Pitame pepa piamo laponge dokonya pii lyaa dupa:
1:1-2 Pii wambao pepanya piamo dupa
1:3-21 Goteme endakali dupa ipupa lelyamo
2:1-22 Sambo pii lenge endakali dupa
3:1-18 Kataisa dee ipata
1
1 Namba Saimone Pita Jisasa Kataisanya kendemane-kisa aposele dokome masoo miningi epe naimame minilyamanoli pyoo miningi nyakamanya pepa dake pyao peekelyo. Naimanya Gote-kisa Pyoo Nyingi Jisasa Kataisame mana tolatae miniamo dokonya-kaita masoo miningi doko nyingi.
2 Nyakamame Gotepa naimanya Kamongo Jisasapa lao masokondape pilyamino dokome Gotepa Jisasapame nyakama kandao mona epe mende palyalakao palyetala nyakamanya mona doko etete lyuu lasekena.
Goteme naima ipupa latala yapao nyia
3 Naima lete kalyanyapi Gote watao minalanyapi dolapo nyepenge dupa pitaka Goteme baanya pupu lapae dokome naima dia. Baame baa tangenya tii pipaepa pupu lapaepa dolapome naima ipupa leana lao masokondape pilyamano dokonya-kaita dopa pia.
4 Wamba baame tii pipaepa pupu lapaepa dolaponya-kaita etete angipa etete andakepa dolapo naima ditona leamo dolapo ditia. Dito leamo doko dapa pyoo kini jilyamo: indupa nyakama Gote yale joo katapala, yuunya nyipu laka lao masingi dokonya-kaita endakali koyasala epenge dupa nyakamame wandinya nepao kalyamino.
5 Tenge dutupanyaka minao nyakama mona mendai paliuu Gote lao masoo minilyamino dokome mana epe dupa awapa kyoto joo watao minalapape. Dee mana epe dupa auu pyoo minatamino dokome masepae joo kalyepape.
6 Masepae joo katatamino dokome tange auu pyoo isoo kalyepape. Tange auu pyoo isoo katatamino dokome kyoto joo kalyepape. Kyoto joo katatamino dokome Gote watao minao kalyepape.
7 Gote watao minao katatamino dokome mende auu kaya kaya pyoo kalyepape. Mende auu kaya kaya pyoo katatamino dokome mona setawaka kalyepape.
8 Doko, mana dutupa minatala, minama-minama pyoo epao minatamino kandao doko, nyakama mee ambe nakatao wambu pyoo naimanya Kamongo Jisasa Kataisa doko lao masalakao masoo katatami.
9 Dopaka doko, mana dutupa naminingi endakali dokome opale mende tependale silya doko nakandao lenge monda joo katenge. Baame wamba koo piamo dupa Goteme kunao nepakamaiyamo doko kame singi.
10 Dopana, kaimia paluma, Goteme nyakama ipupa latala yapao nyiamo dokonya kyoto joo epao katawani kayao kalyepape. Dopa pitamino kandao doko, nyakama kapa pao alu napitami.
11 Nyakamame mana dutupa watao minataminopa naimanya Kamongo-kisa Pyoo Nyingi Akali Jisasa Kataisanya isingi panda etete katapenge dokonya kaitini doko pee lao nyakamanya lumbakata.
12 Dopana, nyakamame dopale dupa masoo kiningi pii doko kyoto joo minilyaminoaka doko, dutupanya nambame koteaka lao deaka nyakamanya masingi sakatasakatoo lao masilyo.
13 Namba yuu dakenya lenge tao mee kalyo gii dakepa nyakamanya masingi sakatasakato kandao doko, kapana lao masilyo.
14 Naimanya Kamongo Jisasa Kataisame namba-kisa pitamina lao panasiamoli pyoo gii kuki patatamopa namba alu pipengena lao masilyo.
15 Dopana, namba kumapato gii dokopa nyakamame dopale dupa koteaka lao deaka kapa pao masetaminopa lao pepa dake nambame pyawani kayao pilyo.
Naimame Kataisanya tii pipae doko kandeamana leamo doko
16 Naimame naimanya Kamongo Jisasa Kataisanya pupu lapae dokonyapi baa dee ipatamo dokonyapi lao nyakama pii langiamano doko mee tindi pii mendapua waa katao langya nayama. Naimame Kamongo doko baa kiŋi andake joo kateamo kandeamano doko nyakama langiama.
17 Takange Gote baa kiŋi andake joo tii pipae katao Jisasa andanda semaitala tii pipae maiyoo lao pituu, “Doo kalyamo doko nambanya Ikiningi mona setenge doko kalyamo. Nambame baa kandao etete mona epe palyingina,” lea.
18 Manda etete epe dokonya naima baa-pipa awapa kateamanopa pii kaiti-kisa katao leamo doko siama.
19 Dee potopesa dupame Gotenya pii leamino dupa naimame kiningi angi etetena lao masoo miningina nyakamame pii dupa sokondape pitamino kandao doko, epe. Nyakamame dopa pitamino kandao doko, kiame iminjetaenya tii pisingili pyoo pii dupame tii pisoo pao yuu yongelyamopa yuu yongao bui katenge dokome nyakama mona dokonya ipao tii pisetamo dokonya tuu lata.
20 Nyakamame dake wambao masepenge: endakali mendeme potopesa dupanya pii pepa pyapae singi dupanya tenge dupa lao panao pituu, tangenya masingi watao lao panala nayapenge.
21 Doko wamba potopesa dupame paa mendaipi mende endakalinya masingi mende watao pii laa nayami-pyaa. Daa, Oli Sipitisa dokome dupa lungu piamopa dupame Gotenya pii doko lao paneami-pyaa.