17
Enda akali nyele-nyele paenge mendepa mena kapua mendepale dokopa
1 Pelesa kalange minatae kateamino enjele kalange dupanya mendeme namba kateosa ipupala lao pituu, “Endaki longo satitoponya pitipala akali nyele-nyelepaengenya etete kenge singi enda dokonya yanu nyetamo doko laitaka pitoo ipu.
2 Yuunya kiŋi dupame enda doko-pipa kepo piami. Enda dokonya akali nyele-nyele paenge mana waene jepae dokome yuunya endakali dupa kyekeamina,” lea.
3 Dokopa Oli Sipitisa dokome namba sakatasiamopa, enjele dokome namba nyoo endakali napalenge yuu mendenya pea. Dopa peteamopa mena kapua kate pyapae mendenya ketae enda doko peteamo kandeo. Mena dokonya yonge doko pitakanya Gote lamba lenge pii longo dupa pepa pyatae katea. Mena dokonya aiyomba kalange kateamopa aiyombanya nenge kingi ita mende katea.
4 Enda dokome yongenya pingi wene pyapaepa kate pyapaepa mendalapo petala, golopi, kana auu pipae muni longome sambengepi, mamakupi dupame yati petae petea. Dopa petala kapo penge golome wasepae mende miniamo dokonya baanya akali nyele-nyele paenge mana dokonya aii pyapaepi koopimi tumbatae katea.
5 Baanya kenge kongali pyoo baanya langalunya dapa lao pyatae katea: Bapiloneyuu andake doko, enda akali nyele-nyele paenge dupapi mana aii pyapae miningi endakali dupapinya tengena lao pyatae katea.
6 Enda dokome Gotenya endakalipi Jisasanya lao lao panenge endakali dupapi dupanya taiyoko dupa napala baa kyekea. Dopa piamo doko kandatala namba etete mona andeo.
7 Dokopa enjele dokome namba langyoo, “Aipuma emba mona andelepe? Enda dokopa, mena kapua aiyomba kalange katenge dutupanya nenge kingi ita katenge dokome enda doko mandyuu paenge dokopa, dolaponya tenge yalo petae doko nambame emba langitoo.
8 Embame mena kanjeno doko wamba kateamoaka doko, indupa dee nakalyamona tenda baa yuli koo etete koko dokonya katao pyakalyalanya pilyamona, pyakalyetala pao etete koyalakao koyata. Goteme yuu wasiamo dokonya pituu indupa tuu lao yuunya endakali dupa lete etete katenge kenge singi buku dokonya kenge nasilyamo endakali dupame mena wamba kateamo doko indupa nakatapala, dee katatamo kandatala tenge dokonya mona andatami.
9 “Masingi endakali mendeme kapa pao dake masokondape pipenge. Mena dokonya aiyomba kalange dutupa yuu manda kalange mendatupa makande petae dokonyana, enda doko yuu manda kalange dutupanya ketae petenge. Aiyomba kalange dutupame kiŋi kalangeaka makande petae.
10 Dutupanya yuungi isa patapiminopa indupa mendai kalyamo. Mende doko kiŋi jetala naelyamo. Maitakao baa kiŋi jetala gii kuki katapenge.
11 Mena wamba kateamo indupa nakalyamo doko kiŋi kalange dutupanya tukulapo joo katapala, baa koyalanya kalyamo.
12 “Dopana, aiyombanya nenge kingi ita katapumu kanjeno dutupame kiŋi kingi itaka makande petae. Dutupame endakalipi yuupi dupa isetala naelyaminoaka doko, dupame mena doko-pipa awapa pupu lapae nyepala kiŋi katele lao kilyoko gii mendai katatami.
13 Dutupame masingi mendai iki palyetala nyakamanya pupu lapaepi kyotopi dupa mena doko maingima.
14 Dopa petala dupa-pipa Sipisipi Yakane doko-pipa yanda pitaminopa Sipisipi Yakane dokome dupa ita minata. Doko, baa kamongo dupanya Kamongo katao kiŋi dupanya Kiŋi kalyamo. Goteme ipupa latae endakali dupapi, yapao nyepae endakali dupapi, baa yakinala naenge endakali dupapi dupame baa-pipa katao ita minatamiakana,” lao enjele dokome lea.
15 Dee baame namba langyoo, “Enda akali nyele-nyele paenge doko pitipya dosa endaki longo ipao satyalamo kanjeno dutupame endakali longo limbao kalyamino dupapi, endakali yonge waka waka katenge dupapi, pii wakale wakale lenge dupapi, yuu pitakanya endakali tata dupapi dupa makande petae.
16 Aiyombanya nenge kingi ita mende katapumu kanjeno dupapi, mena dokopi dupame enda akali nyele-nyele paenge doko kandao mona koo palitami. Dupame baanya oapi dupa koyasetala, baa papata petena lao baanya yongenya pingi dupa lyokao nepatamiaka. Dopa petala dupame baanya yonge dupa napala itatenya yangatami.
17 Doko, dupame Gotenya masepae watao minina lao Goteme dupa masepae maitala, dupa mona mendai palyoo katao, dee nyakamanya isingi kalai dupa mena doko maiyoo pao Gotenya pii leamo doko angi jetamo dokonya tuu lena lao masepae maiyaka.
18 Embame enda kanjeno dokome, yuu taono andake yuunya kiŋi dupa isilyamo doko makande petaena,” lao enjele dokome lea.