☰ PANASIAMO 2
2
Epesasa yuu dokonya pepa pyao pyasakamaipi leamo doko
1 “Epesasa* yuu dokonya sosanya enjele kalyamo dokonya dapa lao pepa pyao pyasakamaipi: ‘Nambanya kingi tolae-kaitame bui kalange minao, lama kaiyepae setenge toko golome wasepae kalange kainanya paenge dokome pii dake emba langilyo. 2 Nambame* embanya manapi, lekeleke tengepi, kyoto joo katengepi dutupa masilyo. Dopa pyoo katapala endakali koo dupa etete maka kaenge doko nambame masilyoaka. Endakali dupame naima aposele kalyamanona lengemaka doko, dupa aposele daa, sambo lengema lamo lao embame makande pyoo kandatee. 3 Embame kyoto joo katao, maka nakayao, namba lao masetala kenda pipae nyoo kalyeno. 4 Dopaka doko, emba-kisa tenge mende silyamo: wamba embame tee pyao namba auu kaenoli pyoo indupa auu nakaeleno. 5 Dopana,* wamba embame mana epe minino doko indupa lombapae soo kalyenona dee masepe. Wamba embame tee pyao mana mininoli pyoo dee mona kapilyetala mana doko minape. Daana lao mona kapilyetala nayateno kandao doko, nambame emba katatesa ipupala embanya lama setenge toko doko nyoo nepato. 6 Dopaka* doko, dee mende embame auu pilino doko dapa: embame akali Nikolasa watao miningi endakali dupanya mana dupa etete auu nakayapinopa nambame apata etete auu nakaelyoaka.
7 “ ‘Sipitisame* sosa dupa kandao pii lelyamo doko endakali kalekaita singi dokome sokondape pipenge.
“ ‘Koo dupa yanda pimaiyoo ita minatamo endakali dokome Gotenya Patandisa*yuu dokonya lete katasingi ita dokonya dii lyao nena lato.’
Semena yuu dokonya pepa pyao pyasakamaipi leamo doko
8 “Semena* yuu dokonya sosanya enjele kalyamo dokonya dapa lao pepa pyao pyasakamaipi: ‘Etete wambawapi etawapi doko namba kumapala dee lenge tao katao pii dake emba langilyo. 9 Emba* kenda pipae dupa nyowapi etete daa jowapi kalyeno doko nambame masilyo. Dopaka doko, emba-kisa masoo miningi longo silyamo. Dee endakali mendapuame emba kilya kandelyamino doko nambame masilyoaka. Dupame nyakama Jutana lelyaminoaka doko, dupa Juta daa, Satane tata. 10 Emba-kisa* kenda pipae mende ipanya pilyamona, emba paka nakayape. Sataneme nyakama makande pyaanya nyakamanya endakali mendapua anjalanya pilyamona anjetamopa nyakamame kenda pipae dupa nyoo yuu gii kingi ita mendai katatami. Embame namba tungi pyao katawaka pao embanya kumingi gii doko kandao nyepe. Dopa pitinopa nambame emba lete etete katenge doko yole joo dito.
11 “ ‘Sipitisame* sosa dupa kandao pii lelyamo doko endakali kalekaita singi dokome sokondape pipenge.
“ ‘Koo dupa yanda pimaiyoo ita minatamo endakali doko, lapo pyoo kumingi dokome baa koyasala nayata.’
Pekamama yuu dokonya pepa pyao pyasakamaipi leamo doko
12 “Pekamama* yuu dokonya sosanya enjele kalyamo dokonya dapa lao pepa pyao pyasakamaipi: ‘Namba konjua yangi nenge kata kata petae etete nenge katapae miningi dokome pii dake emba langilyo. 13 Emba Satanenya tenge joo isingi yuu dokonya kalyeno doko nambame masilyo. Dopaka doko, embame namba lao minokondape pingi. Nambanya pii tolao lao panenge akali Andipasa lenge nyakama-pipa awapa kateamino doko, nyakamanya yuu Satane katenge dokonya pyao kumasiami. Dopa piamino gii dokopapi embame namba maita dyaa nayaka. 14 Dopaka* doko, emba-kisa tenge kuki mende silyamo: embanya yuu doo tange mendapuame Belamenya mana pii dupa minokondape pilyamino. Belameme akali Beleke lenge doko mana lamaiyamopa, Belekeme Isataele endakali dupa koo pina lao mapisia-pyaa. Mapisiamopa Isataele dupame tunduma pingi sambo gote lao kundi maitae dupanya nao, kepo kolao piami-pyaa. 15 Dopaka* pyoo embanya yuu doo tangeaka mendapuame Nikolasanya mana pii dupa minokondape pilyaminoaka. 16 Dopana* emba mona kapilyepe. Daa tamo kandao, namba emba-kisa yapa ipupala nambanya nenge kaitanya konjua pyakaetae kalyamo dakeme endakali dupa yanda pimaito.
17 “ ‘Sipitisame* sosa dupa kandao pii lelyamo doko endakali kalekaita singi dokome sokondape pipenge.
“ ‘Koo dupa yanda pimaiyoo ita minatamo endakali doko kaitinya nee yalo petae dokonya nambame maitala, kana kyoo lapae mendenya kenge enenge mende pepa pyapae setamopa baa maitoaka. Dopa pitopa endakali mendaipi mendeme kenge doko nakandata. Kana doko nyetamo endakali dokome iki kandata.’
Tayataita yuu dokonya pepa pyao pyasakamaipi leamo doko
18 “Tayataita* yuu dokonya sosanya enjele kalyamo dokonya dapa lao pepa pyao pyasakamaipi: ‘Namba Gotenya Ikiningi, nambanya lenge dolapo itate yuli jepae moko kape dolapo kana botonja joo polepole pingi dokome pii dake emba langilyo. 19 Embame namba lao masoo minao, endakali dupa auu kayao, dupa nisoo, kyoto joo katao mana minilino dutupa nambame masilyo. Embame indupa mana epe minilino dutupame wambao mana miniino dutupa ita minilyamo. 20 Dopaka* doko, emba-kisa tenge mende silyamo: embame enda Jesapele doko sosanya petena kaeleno. Dopa pipinopa enda dokome baa potopesana latala nambanya kendemane dupame kepo kolawapi, dee tunduma pingi sambo gote lao kundi maitae dupanya natamipi pina lao dupa minakasoo mana lamaingi. 21 Nambame baa mona kapilyina lao yuu gii mendatupa petena kayo. Dopaka doko, baa mona kapilyala nayao baanya kepo kolenge mana doko maita maiya nayapuli lao masilyamo. 22 Dopana nambame enda doko-kisa yaina mende pena latala nyoo isa setato. Baa-pipa kepo kolao paelyamino akali dupa mona kapilyala nayatamino kandao doko, nambame kenda pipae andake mende dupa-kisa pena latoaka. 23 Baanya* wane dupa apata kumina lao nambame pyao kumasoto. Dopa pitopa endakali dupa pitakanya ingi monapi dupa nambame kandokondape pingi lamo lao sosanya endakali kalyamino dupa pitakame kandatami. Dopana nyakama mendai mendai lao dupanya mana minatamili pyoo nambame yanu pyato.
24 “ ‘Dopaka* doko, nyakama endakali yangi yuu Tayataita kalyamino dupame mana pii dake watao minala naelyamino. Satanenya mana watao miningi dupame mana angina lengema dokonya nyakamame mana nyala nayamiaka. Dopana nambame nyakama-kisa kenda pipae waka mende setala nayato lao langilyo. 25 Dopaka* doko, nyakamame mana minilyamino dupa pitaka minokondape pyoo minao pao namba ipato gii dokonya tuu laapape. 26 Endakali* mendeme koo dupa yanda pimaiyoo ita minao baanya gii etatamo dokonya tuu lao nambanya mana watao minatamo doko, nambame baa yuu pitakanya endakali dupa isoo katena lato. 27 Baame aene kolyepe mende minao endaki sanima penge pyao tambele pyoo dupa isoo katata. 28 Namba* nambanya Takangeme endakali dupa isoo katape leamoli pyoo, nambame endakali dokome isoo katena lato. Dee nambame baa yuu yongao bui katenge doko maitoaka.
29 “ ‘Sipitisame sosa dupa kandao pii lelyamo doko endakali kalekaita singi dokome sokondape pipenge.’
* 2:1 Pa 1:12,16,20; 3:1 * 2:2 2 Ko 11:13,15; 1 Te 1:3; 1 Jo 4:1; Pa 2:19; 3:1,8,15 * 2:5 Pa 2:16,22; 3:3,19 * 2:6 Wee 139:21 * 2:7 Pot 3:18; Ese 28:13; 31:8-9; Mt 13:9; Pa 2:7,11,29; 3:6,13,22; 22:2,14,19 * 2:7 patandisa Juta dupame Gotenya kaiti yuu auu pyoo katapenge enenge mende silyamona lao masetala kenge Patandisa lengema-pyaa. * 2:8 Ais 44:6; 48:12; Pa 1:17; 22:13 * 2:9 Lo 5:3; 2 Ko 11:14-15; 2 Ti 2:12; Je 2:5; Pa 3:9 * 2:10 Dan 1:12,14; Mt 10:28; Lu 22:31-33; Jo 8:37-44; 1 Ko 9:25; 2 Ti 4:8; Je 1:12; Pa 3:9,11 * 2:11 Pa 2:7; 20:6,14; 21:8 * 2:12 Ais 49:2; Ip 4:12; Pa 1:16; 2:16; 19:15 * 2:14 Nam 22:2,5,7; 25:1-2; 31:16; Dit 23:4; 1 Ko 8:10; 2 Pi 2:1,15; Ju 11 * 2:15 Pa 2:6 * 2:16 Pa 1:16; 2:12; 3:11; 19:15; 22:7,12,20 * 2:17 Eke 16:4,14-15,33-34; Wee 78:24; Ais 62:2; 65:15; Jo 6:48-50; Pa 2:7; 3:12; 19:12 * 2:18 Dan 10:6; Pa 1:14-15; 19:12 * 2:20 Nam 25:1-2; 1 Kiŋ 16:31; 2 Kiŋ 9:22,30; Pa 2:14 * 2:23 Wee 7:9; 62:12; Pot 24:12; Jet 11:20; 17:20; Ap 1:24; Lo 2:6; 2 Ti 4:14; Pa 18:6; 20:12-13 * 2:24 Pa 3:8-11 * 2:25 Pa 3:11 * 2:26 Wee 2:8-9; Pa 12:5; 19:5,15 * 2:28 Ais 14:12; 2 Pi 1:19; Pa 22:16
☰