12
Mana Koo Dupa Wandyoo Kalyepape Leamo Doko
1 Gii dokopa, endakali tausene longo ipao kambu piami dokome, endakalinya moko yango-kisa katao lombapae siami. Dokopa Jisasame tee pyao baanya disaipolo dupa lamaiyoo, “Parasi dupame mana tolatae miningi manemane pingima doko yisa palaonya taengeli pyoo nyakama-kisa taeyatana, kandao kalyepape.
2 Sanga pyatae silyamo dupa pitaka gii mendepa lopapae seta. Yame pyatae silyamo dupa pitaka gii mendepa lopapae setamopa, endakali dupame kandatami.
3 Nyakamame yuu iminjumupa pii lelyamino dupa pitaka, tii pitamopa endakali dupame setami. Andakote rumanya pituu pii kakateame lelyamino dupa, endakali dupame anda ketae katao wii lao latamina” lea.
Gote Iki Paka Kaeyapengena Leamo Doko
4 “Nambanya kaita miningi paluma, yonge doko pyao kumasingima endakali dupame mende apata kapa pao napipengena, dupa nyakamame paka nakaeyalapape.
5 Akali paka kaeyapenge doko, dokona lao nyakama laitaka pitoo: Yonge doko pyao kumasetala, ele panda koo dokonya pyandapenge kyeto singi akali doko nyakamame paka kaeyalapape. Kiningi, akali doko paka kaeyalapape lao nambame nyakama langilyo.
6 Muni konde lapomame iki yaka pimbinakae yungi salimi lengema. Dopaka doko, yaka dupanya mendaipi mende Goteme kame nasingi.
7 Dopaleaka joo, nyakamanya aiyomba iti dupa pitaka mendai-mendai lao Goteme itaki pyapae. Dopana, yaka pimbinakae longo dupa nyakamame ita minao kalyaminona, paka nakaeyalapape” lea.
Kraisa Tatana Lao, Lao Panenge Dokonya Leamo Doko
8 “Nambame nyakama langilyo: Endakali mendeme baa namba tatana lao, endakali waka dupanya enombanya lao panatamo doko, Akalinya Ikiningi dokome akali doko baa tatana lao, Gotenya enjele dupanya enombanya lao panataka.
9 Dopaka doko, endakali mendeme baa namba tata daana lao, endakali waka dupanya enombanya latamo doko, Akalinya Ikiningi dokome akali doko baa tata daakana lao, Gotenya enjele dupanya enombanya lataka.
10 Akalinya Ikiningi doko pii koo lata endakali dokonya koo doko kunao nepakamaita. Dopaka doko, Oli Spirita doko lao nepata endakali dokonya koo doko kunao nepakamaiya naeyata.
11 Endakali dupame nyakama laminao lotuu andapi, isingi akalipi, gapomanepi dupanya pataminopa, nyakama tange kame pinyoo pii aipa lamanape, pii aki lamanape lao masepae longo nyala naeyalapape.
12 Kote lapenge gii dokopaka Oli Spiritame nyakama pii lapenge dutupa mana langitana” lea.
Oapi Longo Setapu Laka Lao Masingi Dokonya Lao Kongali Leamo Doko
13 Dokopa endakali kambu dokonya katea mendeme Jisasa lamaiyoo, “Mana Lenge, namba moeya nyepenge dupa mokosoo peekena lao nambanya kaiminingi doko lamaiyaka” lea.
14 Dokopa Jisasame baa lamaiyoo, “Wane, apimi namba nyakambanya pii tolasoo, oapi mokosingi akali kata leape?” lea.
15 Dopa latala Jisasame endakali dokaita lamaiyoo, “Endakali mendenya lete katenge doko baanya oapi longo setenge dopale daa. Dopana, popaita pingi mana dokome nyakama koeyasetana, kandao kalyepape” lea.
16 Dopa latala baame kongali pii mende dapa lea: “Yuunya kamongo mendenya eenya nee longo andea.
17 Andeamopa baanya moname masoo pituu, ‘Nambanya nee mandyoo setapenge panda mende nasilyamo dokonya, nambame aipa pitoape?’ lao masia.
18 Dopa lao masetala baame lao pituu, ‘Nambame dapa pitoo: Nambanya nee setenge anda dupa lakyepala andake pyoo pitoo. Dopa petala nambanya witapi, oapi epepi dupa pitaka nyoo dokonya setato.
19 Setapala nambanya imambu doko lamaiyoo, “Oapi longo setekelyo dupa ee kana longonya soaka pata. Dopana, emba koto nyoo, nee endakipi nao, eteke pyao katape” lamaitona’ lea.
20 Dopa leamopa Goteme baa lamaiyoo, ‘Emba akali kyakaenge! Indupa kuka gii dakenya embanya lete katenge doko peakalapeno. Peatakatenopa oapi longo nyoo setao kalyeno dupa pitaka endakali waka mendeme nyalapomona’ lea.
21 Endakali mendeme baa tange iki masetala oapi longo nyoo setao katao, Gotenya kalai dupa nisala naeyata doko-kisa dopaka pitana” lea.
Auu Pyoo Katapuli Lao Masingi Dokonya Leamo Doko
22 Dopa latala Jisasame baanya disaipolo dupa lamaiyoo, “Tenge dokonya nambame nyakama dapa langilyo: Nyakama auu pyoo katamana lao masetala, nyakamame nee anja-tae namanape, yonge pee anja-tae pimanape lao masepae longo nyala naeyalapape.
23 Lete katenge doko nee nenge dopale daa. Yonge doko yonge pee pingi dopale daaka.
24 Nyakamame yaka lakepame dupa masalapape. Dupame ee pokala naengema. Dupame nee mandyoo setala naengemaka. Dupanya nee setenge andapi, pandapi mende nasingi. Dopaka doko, Goteme dupa nee maingi. Nyakamame yaka dupa etete ita minao kalya naelyamipi?
25 Nyakamanya mendeme auu pyoo katapuli lao masepae longo nyete dokome, embanya lete katenge dokonya yuu gii mendai waipa setepe?
26 Nyakamame kalai yakane dopale mende napingima-tamo doko, aipuma dopale waka dupanya masepae longo nyilyami?
27 Palao dii dupa dopa pyoo andengena lao masalapape. Dupame kalai mende napingima. Yonge peepi mende wasala naengemaka. Dopaka doko, Solomoneme baanya yati tata epe dupa pitakame yati pia dupanya, palao dii auu pilyamo dopale mendeme baa yati napiana lao nambame nyakama langilyo.
28 Palao taita kepao yangapenge, indupa dii pilyamo dupa Goteme yati pisingi. Dopa pingina, yongenya pipenge dupa Goteme nyakama ditana, aipuma nyakamame baa kuki tungi pilyami?
29 Nyakama neepi, endakipi dupa anja-tae namanape lao kutala naeyao, masepae longo nyala naeyaowaka kalyepape.
30 Isa yuu dakenya akali tata waka dupame dopale dupa kutingima. Dopaka doko, nyakamanya Takange dokome nyakama daa jilyamo dupa kandenge.
31 Dopana, nyakamame Gotenya kingdom doko kutalapape. Dopa pitaminopa, nyakama nyepenge dupa pitaka baame dita.
32 Nyakamanya Takange dokome auu kaengeme baanya kingdom doko nyakama nambanya sipisipi ŋaŋa dupa ditoo lao masilyamona, paka nakaeyalapape.
33 Nyakamanya oapi dupa salimi latala, endakali daa jepae dupa maiyepape. Dopa pitami dokome, nyakamanya munipi, oapi epepi, etala naenge dupa nuu atingi jala naeyata mendenya mandipala kaiti-kisa setataminosa pita. Yuu dokonya pake nenge mende tengesa naepenge. Dupa neneme nao koeyasala naengeaka.
34 Nyakamanya oapi epe dupa setenge panda dokonyaka nyakamanya mona yukuu setengemana” lea.
Depa Latae Kalyepape Leamo Doko
35 “Nyakamanya kalai pyaanya yonge pee pingi doko lakao muu pyoo petala, lama dupa tao katena depa latae kalyepape.
36 Akali andake mende, enda watapae pyatami mendenya katao ipupala, anda kaita gata-gata latamopa, yapa lumbao nyalanya kalai akali mendapu depa latae katengemali pyoo nyakama depa latae kalyepape.
37 Akali andake doko ipupala kandatamopa, luu palya naeyao malisetae katatami kalai akali dupa baame auu piseta. Nambame nyakama kiningi langilyo: Baanya kalai pyaanya yonge pee pingi doko lakao muu pyoo petala, dokaita tokonya petena latala nee nena lao nyoo maita.
38 Kuka andatombepi, yuu yongalanya pitamopapi, baa ipupala kandatamopa, luu palya naeyao baa malisetae katatami kalai akali dupa baame auu piseta.
39 Dake masalapape: Anda tange mendeme pake nenge mende gii dokopa ipapomo lao masiali doko, baanya anda doko kandao isetala, kaluina lao kaeyala naeyali.
40 Dopana, nyakama ambe katatami gii mendepa Akalinya Ikiningi doko ipatana, nyakama apata depa latae kalyepape” lea.
41 Dokopa Pitame baa lamaiyoo, “Kamongo, embame kongali pii doko naima lao lelyepe, pande endakali pitaka lao lelyepe?” lea.
42 Dopa leamopa Kamongome lao pituu, “Akali andake mendeme kalai akali dupa akali mendeme isina latamopa, dokaita isoo katao, nee napenge gii dokonya nee mokosoo maiyoo katapenge kalai akali masepae epe palenge, pii sakamaingi doko baa api?
43 Baanya akali andake doko ipupala, kalai akali dokome dopa pyoo katata kandatala, baa auu piseta.
44 Nambame nyakama kiningi langilyo: Akali andake dokome baanya oapi dupa pitaka kalai akali dokomeaka isakao katena lata.
45 Dopaka doko, kalai akali dokome baanya moname masoo pituu, ‘Nambanya akali andake doko tanga-waka ipatana’ lao masetala, tee pyao kalai wanakupi, kalai akali yangopi dupa pyapapu, neepi, biapi dupa nao kyakao katatamo doko,
46 kalai akali dokonya akali andake doko naipapomo lao masetala, ambe katata gii mendepa ipata. Ipupala akali andake dokome kalai akali koo doko kepapala, pii wata-minala naengema endakali dupa katatami panda dokonya katena lata.
47 Kalai akali mendeme baanya akali andake dokonya maseta doko kandataka doko, kalai pyaanya depa nalao, akali andake dokonya masetali pyoo napyoaka pitamo doko, baa konjame longo lao pyao indyeta.
48 Dopaka doko, kalai akali mendeme masala naeyao, kalai kopeta pita mendenya baa konjame longo lao pyao indyala naeyapenge-tamo doko, baa kukiaka pyao indyeta. Akali mende longo lao mailyamo doko, longo laowaka mokosoo peekena lenge. Akali mendeme longo lao isekena lao mailyamo doko, baa-kisa longo lao tee lengena” lea.
Mona Setao Katena Lao Naepeona Leamo Doko
49 “Nambame isa yuu dake tena lao ita kaiyoo palyala epeona, indupa kaiyoo palyetae katapya laka lao masilyo.
50 Nambame kaimbu kenda paleta mende nyepenge doko ene ipumupa, mona etete kenda pilyamo. Kaimbu doko nyoo etato dokopa yaka jeta.
51 Endakali dupa isa yuu dakenya mona setao katena laanya namba epeena lao masilyamipi? Daa, wakale pyaloo pingi mana doko sakatasala epeona lao nambame nyakama langilyo.
52 Indupa pituu, anda mendainya endakali yungi palengema dutupa wakale pyaloo pyaamino. Dokopa lapomame tepoma yanda pimaiyambino. Tepoma dutupame lapoma dolapo yanda pimaiyaminoaka.
53 Dutupa wakale pyaloo petala, takange dokome baanya ikiningi doko yanda pimaitamopa, ikiningi dokome baanya takange doko yanda pimaiyapomo. Endangi dokome baanya wanenge doko yanda pimaitamopa, wanenge dokome baanya endangi doko yanda pimaiyapomo. Endangi dokome baanya aeyange doko yanda pimaitamopa, aeyange dokome baanya enda aeyange doko yanda pimaiyapomona” lea.
Aloo Pipae Epelyamo Dupanya Leamo Doko
54 Dopa latala pii dake apata endakali kambu doko lamaiyoo, “Niki landa pingitena kopa soo pyakalyilyamo kanju petala nyakamame lao pituu, ‘Aiyuu ipapome-lamona’ lelyamino doko, kiningiaka epenge.
55 Poo kyeto mende kingi tolaetena lelyamo kandatala nyakamame lao pituu, ‘Itaita pyoo paina pyaapome-lamona’ lelyamino doko, kiningiaka dopa pingi.
56 Nyakama kiningi kandenge manemane pipae dupame yuupa, kaitipa dolapo kandatala, taita dopa pita-lamo lao kandengemaka doko, indupa gii dakepa pilyamo dupa aipuma nyakamame dopa pilyamo lao nakandelyamipi?” lea.
Enesa Pii Lao Tolasepengena Leamo Doko
57 “Aipuma nyakamame auu pyoo masetala, mana tolatae dupa andukupi lao yapala naelyami?
58 Emba kotimi lata endakali doko-pipa pii lao tolasingi akali mendeme pii lao tolasekena lao pao pituu, kaitinisa embame baa auu pisepe. Dopa napitino doko, baame emba pyalya lao nyoo jasa doko maitamopa, jasa dokome emba yanda singi doko maita. Dokopa yanda singi dokome emba anjinya pyandata.
59 Anjetae paliu, koteme maipi latami dutupa maiyoo etatenopa, emba mokatamina lao nambame emba langilyona” lea.