6
Sambata Dokonya Kamongo Doko Jisasa
1 Sambata gii andake lapo pyoo dokonya Jisasa baanya disaipolo dupa-pipa wita ee mendenya-kaita peami. Dokopa baanya disaipolo dupame wita dii dupa kii lao nyepapu, kingimi kuku minata pyoo, dii dupa nyoo neami.
2 Dopa piaminopa Parasi mendapuame dokaita lamaiyoo, “Sambata gii dokonya loome napipenge latae singi doko nyakamame aipuma pilyamipi?” leami.
3 Dokopa Jisasame dokaitanya pii yanu pyakamaiyoo, “Dapitapi, baa-pipa kateamipi, dupa lopo kaeyapala, baame pia doko nyakamame itaki napiamipi?
4 Dapita lotuu anda nee nyetae dokonya kolandatala, breta Gote opaa maitae, mee endakali dupame nanapenge, prisa dupame iki napengena lao loome latae singi dupa nyepala, baa-pipa kateami dupa maiyoo neana” lea.
5 Dopa latala Jisasame dokaita lamaiyoo, “Akalinya Ikiningi doko Sambata dokonya apata Kamongo kalyamona” lea.
Akali Kingi Yangi Talyanga Mende Tolasakamaiyamo Doko
6 Sambata gii mendenyaka Jisasa lotuu anda dokonya kolandatala, endakali dupa mana lamaiya. Lotuu andaka dokonya akali kingi tolaetena talyanga mende petea.
7 Peteamopa Mosesanya loo mana nyepaepi, Parasipi dupame Jisasa-kisa tenge setamana lao masetala, Sambata gii dokonya kingi talyanga doko baame tolasakamailyape lao kandakondape petae peteami.
8 Dokaitanya masiami dupa Jisasame kandatala, baame kingi talyanga doko lamaiyoo, “Emba sakatatala, endakali pitakanya enombanya kalya ipu” lea. Dopa leamopa akali doko sakatatala ipao katea.
9 Kateamopa Jisasame dokaita lamaiyoo, “Nambame nyakama tipa mende pitoo: Loome aipa lapae singi? Sambata gii dokonya kalai epe pipengepe, pande koo pipenge? Endakali nisepengepe, pande endakali pyao kumasepengepe?” lea.
10 Dopa latala, baame endakali dupa pitaka kandayoko latala, akali doko lamaiyoo, “Embanya kingi doko tinoko” lea. Dokopa akali dokome Jisasame leali piamopa, baanya kingi doko auu petala kingi yangi epe dopaleaka jia.
11 Dokopa Mosesanya loo mana nyepaepi, Parasipi dupa imbumi etete tii lapala, Jisasa doko aipa pimape lao nyakama-lapo leami.
12 Aposole Dutupa
12 Gii dosa mendasa Jisasa loma salanya yuu manda mendenya pea. Pupala Gote loma soo katao yuu yongasia.
13 Yuu yongateamopa, baanya disaipolo dupa epena latala, dokaitanya akali 12 yapao nyepala, kenge aposole maiya.
14 Akali yapao nyia dutupanya kenge dupa: Saimone, Jisasame kenge mende Pita lea dokopi, Pitanya kaiminingi Andru dokopi, Jemesapi, Jonepi, Pilipapi, Batalomyuapi,
15 Matyuapi, Tomasapi, Alopiusa ikiningi Jemesapi, Selote tata dokonya katenge Saimone lenge dokopi,
16 Jemesa ikiningi Judasapi, yandapipi dupanya kinginya Jisasa maiya akali Judasa Iskariota lenge dokopi, dutupa yapao nyia.
Endakali Longo Kambu Piamino Dupa Nisiamo Doko
17 Jisasa baa akali dutupa-pipa lanao pupala, yuu lamalama mendenya katea. Dokopa baanya disaipolo longo mendapu kambu pyao epeaminopa, Judia yuu yakane dupa pitakanya tangepi, Jerusalema tangepi, Taeyapa Saidonepa dolaponya solowata lembanya tangepi, dupa kambu pyao Jisasanya pii doko salanya ipaowaka, dokaitanya yaina dupa mee jekena lao ipaowaka piami.
18 Dokopa endakali kenda pisia imambu koo dupa Jisasame watao pyakamaiya.
19 Kyeto baa-kisa paliu pyakalyia dokome endakali yaina dupa pitaka mee jakamaiyamosa, endakali kambu pyao kateami dupa pitakame baa kingimi watandalanya piami.
Endakali Auu Pisingipa Koeyasingipa Dolaponya Leamo Doko
20 Dokopa Jisasame baanya disaipolo dupa lengeme kandatala dapa lea:
“Nyakama daa jepae dupa Goteme auu pisingi. Baanya kingdom doko nyakamanya.
21 “Nyakama indupa lopo kaeyao kalyamino dupa Goteme auu pisingi. Tanga nyakama tiaka kaeyao katatami.
“Nyakama indupa ee lao kalyamino dupa Goteme auu pisingi. Tanga nyakama gii kaeyao katatami.
22 “Nyakamame Akalinya Ikiningi doko wata-minilyaminosa, endakali dupame nyakama imbu kaeyao, maita dyoo, pii koo lao, kenge koo dyoo pilyamino dokopa, Goteme nyakama auu pisingi.
23 Dopana, nyakama dopa pitami gii dokopa, yole andake mende kaiti-kisa setekelyamona, nyakama eteke pyao mona yaepao kalyepape. Dokaitanya yumbange dupame propeta dupa dopaka piami.
24 “Dopaka doko, nyakama yuunya kamongo dupa koeyatami. Nyakamanya mona tambo lasepenge dupa nyepelyamino.
25 “Nyakama indupa nee tiaka kaeyao kalyamino dupa koeyatami. Tanga nyakama lopo kaeyao katatami.
“Nyakama indupa gii kaeyao kalyamino dupa koeyatami. Tanga nyakama yamataka lao ee lao katatami.
26 “Endakali dupa pitakame nyakama lao pii epe lataminopa nyakama koeyatami. Dokaitanya yumbange dupame sambo propeta dupa lao pii epeaka leamina” lea.
Yandapipi Dupa Auu Kaeyapengena Leamo Doko
27 “Nyakama nambanya pii silyamino dupa dapa langilyo: Nyakamanya yandapipi dupa auu kaeyalapape. Nyakama imbu kaeyatami endakali dupa auu pisalapape.
28 Nyakama Goteme koeyasina latami endakali dupa pii epe lamaiyepape. Nyakama pii koo latami endakali dupanya loma sakamaiyepape.
29 Endakali mendeme embanya wakena yangitena kingi kapeme pia-kandeno doko, yangitena apata pina maipi. Endakali mendeme embanya yonge pee kisa pingi doko nyia-kandeno doko, embanya yonge pee isa pingi doko apata nyina kaeyape.
30 Endakali mendeme emba-kisa dopale mende tee latamopa, embame maipi. Endakali mendeme embanya oapi mende nyia-kandeno doko, embame peekena laa naeyape.
31 Endakali waka dupame nyakamanya pyakamili lao masetami dopaka pyoo, nyakamame endakali waka dupanya pyakamaiyepape.
32 Nyakama auu kaeyatami endakali dupaka nyakamame auu kaeyatamino doko, yole aipale mende nyetami? Endakali koo pingi dupame dopaka pingima.
33 Nyakama auu pisetami endakali dupaka nyakamame auu pisetamino doko, yole aipale mende nyetami? Endakali koo pingi dupame dopaka pingima.
34 Nyakamame yanu pyapae nyemana lao masetala dopale mende maitamino doko, yole aipale mende nyetami? Endakali koo pingi dupame koo pingi yango dupa yanu maitami dutupaka yanu pyapae nyetamana lao masetala yanu maingima.
35 Nyakamanya yandapipi dupa auu kaeyao nisalapape. Dupame dopale mende tee lataminopa nyakamame maitala, yanu pyekena laa naeyalapape. Gote Etete Ketae Katenge dokome endakali koo pingipi, yaka pilyino lao mambo napingipi, dupa nisoo katenge. Nyakamame dopaka pitaminopa, Goteme nyakama baanya ikiningina latala, yole andake mende dita.
36 Nyakamanya Takange dokome endakali dupa kondo kaengena, nyakamame endakali dupa kondoaka kaeyao kalyepape” lea.
Endakali Yapala Naeyalapape Leamo Doko
37 “Nyakamame endakali dupa yapala naeyalapape. Dokopa Goteme nyakama yapala naeyataka. Nyakamame endakali mende-kisa tenge setapala baa koeyasepengena laa naeyalapape. Dopa pitaminopa, Goteme nyakama-kisa tenge setapala nyakama koeyasepengena laa naeyataka. Endakali mendapuame nyakama koo pingitami dupa kame sakamaiyepape. Dopa pitaminopa, Goteme nyakamanya koo pitami dupa kameaka sakata.
38 Nyakamanya oapi dupa endakali dupa maiyepape. Dopa pitaminopa, Goteme makande mendai dokomeaka nyakama dita. Baame eteteaka longo lyanda-lyanda lao tumbasetamopa, nyakama-kisa eteteaka tumbatala kai lao patana” lea.
39 Dopa latala Jisasame kongali pii mende lamaiyoo, “Lenge monda mendeme lenge monda yango mende kii minao yaka patape? Dolapo lapota kii minatae yulinya pyakala naeyatambipi?
40 Mana nyingi dokome baanya mana lenge doko ita naminingi. Mana nyingi dokome mana nyoo etapala, baanya mana lenge dopaleaka joo katata.
41 Embanya lengenya ita lyoo andake sipya doko nakandao, aipuma embanya kaiminingi dokonya lengenya kuni yakane sipya doko kandakamailyi?
42 Embanya lengenya ita lyoo andake mende seta doko kanja naeyao, aipa petala embanya kaiminingi doko lamaiyoo, ‘Kaimii, embanya lengenya kuni yakane mende silyamona, nyakatoo kae’ late? Emba mana tolatae miningi manemane pingi dokome, wambao embanya lengenya ita lyoo andake silyamo doko nyoo nepape. Dokopa emba lenge auu pyoo tao, embanya kaiminingi dokonya lengenya kuni yakane seta doko nyoo nepakamaitina” lea.
Ita Epe Dupame Dii Koo Namandengena Leamo Doko
43 “Ita epe dupame dii koo namandenge. Ita koo dupame dii epe namandengeaka.
44 Ita mendenya dii mandelya dupa kandatala, ita doko dopale-lamo lao masingi. Ikililyambu kende dupanya piki dii lyilyamopa, endakali mendeme lyao nanyingi. Lyiki kende dupanya getepe dii lyilyamopa, lyao nanyingiaka.
45 Dopaleaka joo, endakali epe mendeme baanya monanya mana epe palelya dokoaka miningi. Endakali koo mendeme baanya monanya mana koo palelya dokoaka miningi. Endakalinya monanya paliu tumbilya dokoaka kambunya pyakalyingina” lea.
Akali Lapomame Anda Lapoma Piambina Lao Kongali Leamo Doko
46 “Nyakamame nambanya pii doko wata-minala naelyamino doko, aipuma namba ‘Kamongo, Kamongo’ lelyami?
47 Endakali mende namba kalyo dokonya ipupala, nambanya pii dupa sepala wata-miningi doko dopalena lao nambame nyakama laitaka pitoo:
48 Endakali doko baa, akali mendeme baanya anda pyaanya, yuu kyeto mendenya muku minapala anda piamo dopale. Anda peteamopa, endaki andake lyepala anda doko piamopa, yuu kyeto mendenya petae dokonyana, emapi mende napia.
49 Dopaka doko, nambanya pii doko sepala wata-minala naenge endakali doko baa, akali mendeme anda muku mende yuu kyeto mendenya minala naenya, mee yuu-kisa anda piamo dopale. Anda peteamopa, endaki andake lyepala anda doko piamopa, anda doko takyulu pia. Takiamo dokome, oapi dupa pitaka koeyana” Jisasame lea.