20
Satane Doko Ee Kana Tausene Mendai Anjinya Palyiamo Doko
1 Dokopa yuli koo, mendasa soo etala naenge dokonya kii dokopa, sene kende andake mendepa, dolapo enjele mendeme minao, kaiti-kisa katao isa epeamo kandeo.
2 Enjele doko ipupala, yuu dakenya endakali dupa pitaka minakasingi kanopato pambea, yuu wambatae koo akali Satane doko minatala, ee kana tausene mendai anjetae palena lao sene kende dokome anjia.
3 Yuu pitakanya akali tata dupa Sataneme dee minakasala naena latala, ee kana tausene mendai yuli koo, mendasa soo etala naenge dokonya katena lao, enjele dokome baa watanya pyandatala, kaita pai laa-kao latala, wakaiya jepae mende katambea. Ee kana tausene mendai doko patatamopa, baa mokopae gii kuki iki katapenge.
4 Dokopa kiŋi petenge toko mendapuanya endakali mendapu peteamino kandeo. Endakali dupa yapena lao Goteme dokaita kyeto maiya. Maitiamopa Jisasanya kenge dokopa, Gotenya pii dokopa, dolapo lao paneaminosa, pyao mange kepeaminopa kumiami endakali dupa peteamino kandeo. Endakali dokaitame yana kapu dokopa, yana kapu dokonya waingi tao wasepae dokopa, dolapo mambo pyala naeyao, yana kapu dokonya kongali doko langalupi, kingipi dupanya pyatae nakataowaka pia. Endakali dokaita lete katenge doko nyepala, ee kana tausene mendai Kraisa-pipa isoo kateami.
5 Dokaita wambao malunya sakateami dokaita. (Gii dokopa endakali waka kumiami dokaita lenge tao sakatala naeyami. Ee kana tausene mendai doko pateamopa, lenge tao sakateami.)
6 Endakali wambao malunya sakatatami dupa Gotenya latae, auu pisetae dupa. Lapo pyoo kumingi dokonya pupu lapae dokome dokaita ita naminata. Dokaita Gotepa, Kraisapanya prisa katao, ee kana tausene mendai dokonya Kraisa-pipa isoo katatami.
Satane Doko Itate Tao Katenge Panda Dokonya Soo Pyandeamo Doko
7 Ee kana tausene mendai doko etapatamopa, Satane anjinya palyia doko mokata.
8 Dokopa baame yuu dakenya akali tata Gogopi Magogopi lenge, yuu denge kitomende dutupanya palelyamino dupa pitaka minakasalanya pata. Baame yanda pina lao dokaita nyoo kambu pyatamopa, dupanya kindi doko solowata lembanya kee-pipa kapa pata.
9 Dokopa dokaita lalyoo ipao, yuu doko pitaka tumbasetala, endakali Gotenya latae dupa palengema, siti Goteme auu kaenge doko katao kakopatami. Dopaka doko, kaitinya katao itate tapeta mende Goteme isa epena latamopa, dokaita yangao etaseta.
10 Dopa pitamopa, yana kapu dokopa, sambo propeta dokopa, dolapo wamba soo pyandea, kana yuli tao katenge, itate andake dokonyaka endakali minakasingi Satane doko soo pyandata. Soo pyandatatamopa, tanga-tangapi dutupa kuka kotakapi koteaka lao tanda nyoo katatami.
Kiŋi Toko Dokonya Petenge Akali Dokome Endakali Yapeamo Doko
11 Dokopa kiŋi petenge toko andake kyeo lapae mende sia dokonya akali mende peteamo kandeo. Akali dokonya enombanya yuupa, kaitipa dolapo paka peambinopa, dolapo sepenge panda mende nasia.
12 Dokopa endakali kumapae kenge singi nasingipi dupa kiŋi petenge toko dokonya enombanya kateaminopa, buku mendapu lumbapae siamo kandeo. Lete katapenge endakali dupanya kenge pyapae singi buku doko lumbapae siaka. Endakali kumapae dupanya mana miniamili pyoo, buku dokonya pepa pyapae sia dupame endakali dupa yapea.
13 Dokopa solowata dokopi, kumingi dokopi, endakali kumapae dupa katengema panda dokopi, dutupame nyakamanya endakali kumapae dupa kiŋi petenge toko dokonya petea doko maiyaminopa, baame dokaita mendai-mendai lao mana miniamili pyoo yapea.
14 Yapatala baame kumingi dokopa, endakali kumapae dupa katengema panda dokopa, dolapo itate andake tao katenge dokonya soo pyandea. Itate andake tao katenge doko, kumingi lapo pyoo doko.
15 Lete katapenge endakali dupanya kenge pyapae singi buku dokonya kenge nasia endakali dupa itate andake tao katenge dokonya soo pyandeaka.