13
Ere etenga-etenga nere ila gaude nigoboya.
1 Tere Kristen, tere etenga-etenga gai-gai tebere huwanyatege nere ila nigagu.
2 Onodu saini nere fai matane fereha, nere tere tebere ulate langa mayogunga, tere nere hanigedu tebere mata langa goyei nomo fanyimu waha adai awagu. Tere isiya, amina fai ila nere isane, nere fai ila hanigedu bode nebere mata langa oofa nigei nomo bode goyane. Ono wane wa nere fai hanigedu nebere mata langa mayane waha, wa nere ensel. Onodu nere isane wa, nere fai oofa nigane. Ono wane wa uwa, nere ensel tigini oofa nigane.
3 Tere Itou nomo fai-aita dagou mata langa yafade waha bonade ninatege isagu, tere fere nere ngate dagou mata langa yafaya dorofe. Onodu tere fai nere honggoro fai inyabamu nigide waha bonade ninatege isagu. Tere isiya, tere oula beha langa gai yafaya, onou bona tere fere nere honggoro fai edo langa fanyimu onouhanga ono tigodbode.
4 Fai-aita bagu teguruwou no dada hilobainga tigini, onodu tere fai-aita bagu teguruwou waha, tebere teguruwou oofa dewadenga, no Itou ago langa tigini jijiga uwau inyona. Tere isiya, Itou no nere fai-aita longi fanyimu hogo fere-fere onode waha kabaka agou inyaba nigonbona.
5 Tere moni bona agetege warou nomo fanyimu adai oojo wagu. Tere benou isagu, dada tere amina yaasuya waha tere edo tigou. Itou no amina benou lehigaiha, “Ji ne ada awa hinon boni. Ji ne awa hinehenga ewenga ada yafau ganga. Gai uwanga uwa.”
6 Onou bona, ere edo ebere huwanyage dangamudu boya, ere benou edo lewoboya,
“Anyakaro no ji hoyo hihina
onou bona ji ada umugon boni.
Fai nere ji dada ete ada ono hiyodbode.”
Ere Yesus oojo tuwei nomo adai mayau higou.
7 Tere tebere bori mata mora bagu bonade ninatege isagu, nere amina Itou nomo beele malalamudu letigane. Tere fanyimu nere golowane waha bonade ninatege isi bonade, tere nere nebere huwanyanege ngalengawou fanyimu oojo wagu.
8 Yesus Kristus nomo fanyimu no hogo etenga onounga, feyo langa, elbe langa, onodu iinga saini oruwa huunta langa fere onounga inyonbona.
9 Waha bona, tere beele hogo fere-fere adai awa nigadenga, tere tebere huwanyatege kuse tagi bode ono tigogunga, tere Itou nomo jala awagu ganga. Ere Itou nomo aau warou awa tuwedenga, no ere ebere huwanyage dangamu hagona. Ere ebere huwanyage no da nyei nomo nuuni beele hogo fere-fere langa ada danga tona. Fanyimu waha no nere fai-aita waha langa golode waha hoyo nigei uwa.
10 Ere alta inyina, onodu pris nere sel bori mata langa haruwe ono-onode waha, nere alta waha langa da ada todbode.
11 Pris mora bagu no sipsip bulumakao bagu ganenege elegedu bona, no ganenege waha jauli gai guuni waha huwanya langa goidu bona, une uuluwei nomo eeya muru wari-warina. Ariya nere kaafa waha nebere genege gala, nere haumu dui langa eeya langa biteru-biterude.
12 Onou waha bona, Yesus fere no taon nomo orei dui langa jimiri aulai, nomo ganemu no edo langa nere fai-aita ono nigonga, nere Itou ago langa jijiga uwaunga uwau heigogunga, no nere hangada nigonga nere Itou nomo fai-aita tigini yafodbode.
13 Onou waha bona ere fere, no bagu haumu dui langa goidu boya, mayau no aulai dorofe, ere fere auloboya.
14 Ere isiya, oula beha langa ere taon ete no gai-gai inyi-inyina waha uwau. Onou wa, ere taon waha iinga heigonga uroboya itariya.
15 Onou waha bona, ere saini oruwa la, Yesus unyi langa Itou unyi anyakaro tuwoboya, waha no ere Itou eeya muru wari fuya dorofe inyonbona. Yo, saini oruwa ere ebere hurage wa no unyi isou wonbona.
16 Onodu tere nere fai-aita fanyimu hilobainga ono nigagu. Onodu nere ila dada bode tutu nigei mata wogunga, tere tebere dada ila nere hoyo nigei nomo bonade nigagu. Tere fanyimu onouha onowei nomo agetege adai digou, taate bona, eeya muru onouha waha Itou no gaude tu‑tuna.
Itou no edo langa ono higonga yafa dewoboya.
17 Tere tebere mora bagu nere tere hoyo tigei nomo bode, nere gai-gai tere oofa tigi-tigide. Onodu iinga nere nebere haruwe oruwanga ono wane waha bode Itou letuwodbode. Onou waha bona, tere nebere beele oojo bonade, nebere huuna langa yafagu. Tere onou ono bonade wonga, nere edega bode, nere nebere haruwe tebode, nere huwanyanege ada ou nigona. Nere tere oofa tigei nomo huwanyanege ou nigei mata wonga, waha no tere ada hoyo tigona.
18 Tere Itou hauya tubonade, no ere hoyo higei nomo bonade isoki tuwagu. Ere benou isiya, ere ebere huwanyage wa, Itou ago langa tigini inyina. Onodu saini oruwa la ere tigini golowei nomo gau higina.
19 Ji gaude hina wa, tere Itou ji hoyo hiyei nomo bona hauya tuwagu. Ono wadenga, ji tere bagu edo fasayadu mayonboni.
20 Ere ebere Anyakaro Yesus no sipsip nebere oofa nigou Fai danga bagu, no nogo nomo ganemu no gai-gai yafou nomo beele baara tawou waha dangamuwei nomo bona higaiha, ono wainga Itou no matmat langa ege jaimu tuwaiha. Onodu elebe Itou no huwanyage foinga inyou fanyimu nomo hugu,
21 no edo la onowou hilobainga oruwanga ono wonga, tere tebere agetege auma yafou langa danga bagu heigonga, tere no nomo gauwou tigini edo langa oojo wagu ganga. Yesus Kristus nomo haruwe langa, no edo ere oruwa ono higonga fanyimu oruwa gauna waha elego boya. Onodu saini oruwa langa, ere oruwa edo no unyi isou woboya. Ngalenga.
Pas nomo beele usuwou.
22 O baabo gane, ji gauni wa, tere tebere agetege kuli tafadedu bonade, ji tere tebere huwanyatege dangamu tagei nomo beele yerege taginaha beha waha aagu wagu, taate bona, ji pas yerege tagini beha no gai ufaro uwa.
23 Ji tere benou letigoni ononi, nere ebere baige Timoti awa tuwane, no ege dagou mata langa yafei uwa. No ji bagu fasayadu mayei mata wonga wa ji no ngare gaara mai terigo boyare.
24 Ere ebere kaiyewou, tere tebere mora oruwanga bagu, nere Itou nomo fai-aita oruwanga bagu nigagu. Nere Itali kantri awadu mayane waha, nere fere kaiyewou huuru tagide.
25 Itou nomo aau warou edo tere oruwanga langa inyonbona.