3
Udia dolö Godea wela ifosisi amoli sigi aligilo amolida gowe gadoia namolö dialeala säi
1 Ado dofäfalï amo nilïa nabaha maadei dibe amoda gowe. Afädëa udia dolö Godea wela ifosisi nefolalebe amoli sigi aligilo namolöila helësësa nea galëda, eada hamoi hedabi hamesa neamelë.
2 Amai gabugi, sigi aligilo dolö amoda asigi mogoi, odoaea ea asiala hamosebela made säloea namolö dialea. Amase, udia afädë goaeage, nelebo dibe amo sulubadela asigi gäwila hamoloeage, asigi sigi aligiloeage, mala mogoi hamoloeage, udia dolö söfë maase amoli hedabola aealoeage, säla olelemolö dawadigilo gauiage, namolö dialea.
3 Gagaomolöïe gagaolo ödä edefade made nüloeage, nudumolöïe fodolofalï abadigila made, udia dolö hedabola helësëla hame negeloeage, made gëgëloeage, amase, muni gesami made auloeage, namolö dialea.
4 Hïle udiale malöle hedabola sigi aligiloeage, ea ado säsebe amo hïle malöla ilia hedabola nabeloeage, namolö dialea.
5 Afädëa ïe udiale malöle hedabola made sigi aligiseda, eada udia dolö Godea wela ifosisi nefolalebe amoli abeahäla sigi namolödu.
6 E Geleso sosogo waliomu neloeada namolöi mademelë. Ea gugusäla bimäia hamosa neëgi, Godea mugabe busabalä gudi amo gadola, dolö amobaläge amala hamoloeamelë.
7 Udia dolö segea nefolalebe amolia dolö goda asigi mogoi neala sälo amea namolö dialea. Mida, ilia e gagadesegi, e mugabe busaïe gei dibea ami fädäloeamelë.
Digono dolö amolida gowe gadoia namolö dialeala säi
8 Amo gadola wäla, digono dolö ili asigi mogoimu nea, ado äudä sälo madea namolö dialea. Wani ödä edefade made nüloeage, muni aba adogola made neloeage,
9 iso asigi gagadelai nea, Godeïe ado dofä säi dibe amo gaula mogosamu aligiloeage, namolö dialea.
10 Ilia abilia hamosebelela bimolöïe, dafidi fedogola bealahilä, ilima nemola sämolö made galëda, ilia digono hamoi hamomolö dialea.
11 Amo gadola wäla, ilile udiage asigi mogoimu nea, baagido made säloge, nelebo dibe amo sulubadela asigi gäwila hamologe, mala hamosebe amo sulubadela mogoimu hamosa namolö dialea.
12 Digono dolö udia afädë goaea namolö dialea. Ïe malöge, ïe mosöa aligiloge hedabola sigi aligimolö dialea.
13 Digono dolö nefolalebe amoliada, hamoi hedabi hamosebe amo udia dolöea bealahilä, dolö amolida asigi mogoi neala säsegida, ilia, bedäla made, Yesuma asigi afädë negemäia gelola säla olelemolömelë.
Godeïe ado mala mi dibe amoda edefademalämelëla säi
14 Na beba gowe dëdësaleada, di neebea gui hä, fodolofalï moholöla helësësa neawe.
15 Dëdëla ïaseweïe mida, ne hä di neebea fodolo made maaseda, beba gowe nidelahilä, dia udia dolö Godeïe mosöa nefolalebe amolia mala gomalä hamomolö dibela dawadigimolömelë. Godeïe mosöla säsebe amoda, Gode namolöi neebea wela ifosisi amoli nefolaleamelë. Ea wela ifosisi amolida igau gadoige, bagifufu gadoige, ado dofä amo iila neëgi nefolaleamelë.
16 Godeïe ado mi dafidi ulufadigila made, negesi dilo. Amoda geloi edefade gelola dibe amo afädëa iso gäwi made gabula sämolöi mademelë.
Eda dolö domalola ulufala digai.
Godeïe Gesamia e mogoifalï neamelëla olei.
Selesaia fiia e melï.
Ïe ado mala fii odoama säla ï.
Udia dolö sege elö elölagi nefolalo amolia ema asigi afädë negei.
E selesaia mosöa yo digalo dibea ami fedalasimelë.